Tite 3 - NYANMIƐN NDƐ'N 1998

Sa kpa nga Kristfuɛ yo'n

¹ Kpɛn bé wla kɛ be bu be nga be sie be'n nin be nga be jran bé ja nun'n be sran, man bé nyin yi be, sa kpa kwlaa nga be se be kɛ be yo'n, man be yo.

² Nán man be kan sran wun ndɛ, nán man be klo utre, man be yaci sa cɛ, man sran'n kwlaa be wun kɛ be ti wɛtɛfuɛ.

³ Afin laa e kusu e ti sinnglinfuɛ yɛ e ti nyin keklefuɛ. Be lakali ye man e yacili atin kpafuɛ'n, é nyin b'ɔ blo ninnge wafa-wafa'n kwlaa nin mɛn dilɛ'n su'n ti e kacili kɛ kanga sa, laa e ti klunwifuɛ, yɛ é nyin ci sran nin like, laa é wun yo tɛ yɛ e kpɔ e wun.

⁴ Sanngɛ kɛ e Defuɛ Nyanmiɛn yili i kpa yolɛ'n nin sran'm be klolɛ'n i nglo'n,

⁵ ɔ deli ye. Nán kɛ e yoli sa kpa wie ti yɛ ɔ deli ye-ɔ, sanngɛ i bɔbɔ yɛ ɔ sili ye aunnvuɛ sɔ-ɔ. Kɛ i Wawɛ'n wuli ye uflɛ, wunnzinlɛ bɔ i bɔbɔ Nyanmiɛn wunnzinnin ye'n ti, b'ɔ man e kacili sran uflɛ'n, yɛ ɔ deli ye-ɔ.

⁶ Afin e Defuɛ Krist-Jésus ti Nyanmiɛn fɛli i Wawɛ'n mannin ye i klun-ufue su

⁷ nan ye nga ɔ yo ye'n ti'n, ɔ ´bu e sran kpa yɛ ɔ man e ´nyan anannganman nguan nga i waan ɔ ´man ye bɔ é wla o su'n.

⁸ Ndɛ nga n ´kɛn i yɛ'n ti nanwlɛ weiin. N klo kɛ a jran ndɛ sɔ'n su kpa nan be nga be lafi Nyanmiɛn su'n be fa ye yolɛ'n kaci be junman. I sɔ yolɛ'n ti kpa, ɔ yo sran'm bé wun sa ye.

⁹ Sanngɛ nán fa ɔ wun wla sinnzin akplowa silɛ'n, nin be nannan-nannan'm be osu finwlɛ i kunndɛlɛ'n, nin utre, nin mmla'n su akplowa silɛ'n be nun. Be ti like ngbɛn, be yo-man sa fi ye.

¹⁰ Sran ng'ɔ fa ngbaciɛ wla sran'm be afiɛn'n, sɛ a kan kle i kpɛ kun, kpɛ nnyɔn b'ɔ fa-man'n, yi ɔ́ nyin i wun,

¹¹ afin a si kɛ i sɔ sran liɛ'n wa saci, yɛ sa ng'ɔ yo'n kle kɛ ɔ ti-man kpa.

Ngaliɛ

¹² Sɛ n sunman Artemas annzɛ Tisik ɔ wun lɔ'n, mian ɔ́ nyin bla man e yia Nikopolis, afin lɛ yɛ m bu i kɛ n ´tran ayrɛ blɛ nun-ɔn.

¹³ Gua Zenas b'ɔ ti mmla sifuɛ'n nin Apolɔs be atin klanman nan like fi a mian-man be.

¹⁴ Kle e minniɛn'm be kusu kɛ be `di junman klanman nan b'a nyan like nga bé sa miɛn i wun'n, nán man be bubu bé sa nin bé ja tran su.

I nuan yralɛ

¹⁵ Be kwlaa nga be nin min o wa'n be ´yo wɔ like. N ´yo e klofuɛ nga be lafi Nyanmiɛn su'n be like. N ´yra mín nuan kɛ amun kwlaa an nyan ye!