Tite 2 - NYANMIƐN NDƐ'N 1998

Ndɛ nanwlɛ nga be kle'n

¹ Sanngɛ ɔ liɛ'n, nian ndɛ nanwlɛ nga be kleli wɔ'n su kle.

² Se yasua kpɛnngbɛn'm be kɛ be bu akunndan, yɛ be di nanwlɛ, be yo sa i nuan su, be jran kekle be lafi Nyanmiɛn su, be klo Nyanmiɛn nin sran, be tra be anwlɛn.

³ Kan kle bla kpɛnngbɛn'm be kɛ be kusu be yo sa nga Nyanmiɛn sran yo-ɔ ɔ ti su'n. Nán man be di abla, yɛ nán man be yo nzan nɔnfuɛ. Man be yo sa ng'ɔ ti kpa'n

⁴ nan be fa kle talua mun kɛ be `klo bé wun nin be mma mun,

⁵ be yo sa i nuan su, nán man be yo sa sukusuku, man be yo awlo bla kpa, man be yo klun-ufuefuɛ, nán man be fa bé nyin wlawla bé wun mun, man be bu be sran, nan sran fi a se-man kɛ Nyanmiɛn ndɛ'n ti-man kpa.

⁶ Kan kle gbanflɛn'm be kɛ be kusu be yo sa i nuan su.

⁷ Sa'n kwlaa nun ɔ bɔbɔ yo sa ng'ɔ ti kpa'n, man be nian ɔ liɛ'n su yo. Like nga a kle'n, kle i kpa, nán fa yo aɔwi.

⁸ Kan ndɛ ng'ɔ ti kpa'n nan sran fi a se-man kɛ ndɛ nga a kan'n ti tɛ, nan ɔ kpɔfuɛ'm bé nyin gua ase, afin be su wun-man é wun ndɛ fi kan-man.

⁹ Kan kle kanga'm be kɛ sa'n kwlaa nun be bu be min'm be sran, yɛ be yo sa ng'ɔ jɔ be klun'n, nán man be kpalo bé nuan

¹⁰ yɛ nán man be wua be. Sanngɛ man be yo sran bɔ be kwla fa bé wla gua be su titi, yɛ man be bu e Defuɛ Nyanmiɛn'n i ndɛ nga e kle'n i ndɛ kpa sa'n kwlaa nun.

¹¹ Afin Nyanmiɛn a yi ye nga ɔ yo sran b'ɔ man sran'm be kwlaa be kwla nyan bé ti'n i nglo.

¹² Ye sɔ b'ɔ yoli ye'n ti, ɔ kle e kɛ e yaci sa b'ɔ yo-man Nyanmiɛn fɛ'n nin mɛn nun ninnge nga é nyin blo be su'n, nan blɛ nga e o nun yɛ'n, e yo sa ng'ɔ ti i nuan su'n, nin sa ng'ɔ ti kpa'n, yɛ e sro Nyanmiɛn.

¹³ E yo sɔ nan e minndɛ cɛn kpa nga e wla o su kɛ e Nyanmiɛn Kpli'n nin e Defuɛ Krist-Jésus be wa yi bé wun nglo'n.

¹⁴ E ti Jésus ɔ fɛli i wun mannin nan ɔ ´yi ye sa tɛtɛ'n kwlaa nun nan e `kaci i sa ti sran bɔ é wun sa tɛtɛ'n kwlaa ɔ'a wie, bɔ e tu e klun yo sran ye .

¹⁵ Se be kɛ be yo sa sɔ mun, tu be fɔ, sran ng'ɔ yo sa'n, ijɔ i, man be si kɛ Nyanmiɛn yɛ ɔ sieli wɔ kɛ a di junman sɔ nin-ɔn. Nán fa ɔ wun man sran fi man ɔ yo ɔ finfin.