Tite 1 - NYANMIƐN NDƐ'N 1998

Pɔl klɛ fluwa nga ko mannin Tit

¹ M Pɔl n ti Nyanmiɛn i sran bɔ Jésus-Krist sunmannin min kɛ n uka be nga Nyanmiɛn kpali be'n man be lafi i su kpa, yɛ be wun ndɛ nanwlɛ nga be bɔ be nyin yi Nyanmiɛn'n be si i'n i wlɛ kpa

² nan be fa be wla gua anannganman nguan'n su. Nyanmiɛn b'ɔ bua-man ato'n, kɛ ɔ nian yi-man mɛn'n, ɔ sieli kɛ e nyan nguan sɔ'n.

³ Kɛ blɛ ng'ɔ sieli'n juli'n, ɔ yili i ndɛ sɔ'n i nglo. E Defuɛ Nyanmiɛn'n yɛ ɔ fa ndɛ sɔ'n wlali ń sa nun kɛ n kan-an.

⁴ Ɔ man n ´klɛ fluwa nga blɛ wɔ Tit bɔ a ti ń wa sakpa'n, yɛlɛ kɛ Nyanmiɛn kunngba'n su yɛ e nnyɔn'n e lafi-ɔ. Man e Si Nyanmiɛn nin e Defuɛ Krist-Jésus be man a nyan ye, yɛ man ɔ́ wun jɔ wɔ fɔuun !

Ɔ fa Krɛt lɔ asɔnun'm be siesielɛ'n wlɛli i Tit sa nun

⁵ N yacili wɔ Krɛt lɔ kɛ a siesie sa nga b'a wie-mɛn i siesie'n yɛ a sie asɔnun kpɛnngbɛn klɔklɔ'm be su. Bu be sielɛ ndɛ nga n kan kleli wɔ'n i akunndan.

⁶ N kɛnnin i kɛ man sran nga be ´fɛ i sie asɔnun kpɛnngbɛn'n ɔ yo sran bɔ be kwla saci-mɛn i wun kaan sa, bɔ i yi ti kun, bɔ i mma'm be lafi Nyanmiɛn su, bɔ be kwla saci-man be dunman kɛ be nzuɛn ti tɛ, yɛ bé nyin ti kekle.

⁷ Man asɔnun sunianfuɛ sɔ'n yo sran bɔ be kwla saci-mɛn i wun kaan sa, afin ɔ nian Nyanmiɛn ninnge'm be su. Nán man ɔ yo sran b'ɔ yo i bɔbɔ i klun sa, yɛ nán man ɔ yo ya fafuɛ, nin nzan nɔnfuɛ, nin utre klofuɛ, nin sran b'ɔ kunndɛ sika i wafa ng'ɔ ti-mɛn i su'n.

⁸ Sanngɛ man ɔ yo sran b'ɔ ti aklunyefuɛ, b'ɔ klo sa ng'ɔ ti kpa'n, b'ɔ yo sa i nuan su'n, b'ɔ ti sran kpa, b'ɔ ti Nyanmiɛn liɛ mlɔnmlɔn, b'ɔ si i bɔbɔ wun su nian.

⁹ Man ɔ yo sran b'ɔ lafi ndɛ nanwlɛ nga be kleli i'n su kpa nan ndɛ nanwlɛ b'ɔ kle'n ti, ɔ kwla tu sran'm be fɔ, yɛ ɔ kle be nga be kpalo i ndɛ'n kɛ be si kɛ b'a fɔn .

¹⁰ Afin sran kpanngban bé nyin ti kekle, yɛ be kan ndɛ ngbɛn-ngbɛn fa laka sran mun. Be kpanngban lika be fin Zuif'm bɔ b'a kaci Kristfuɛ'n be nun.

¹¹ Se i sɔfuɛ'm be kɛ be `yaci be ndɛ sɔ'm be kanlɛ. Be kle like ng'ɔ ti-mɛn i su'n, be fa kunndɛ sika ng'ɔ ti-mɛn i kunndɛwlɛ'n, ɔ man be bo awlo wie mun sekesekeseke.

¹² Krɛtfuɛ'm be bɔbɔ be like klefuɛ kun seli kɛ: «Krɛtfuɛ'm be bua ato titi, be ti nnɛn wlɛfuɛ, yɛ be ti nvɛɛfuɛ nin aliɛ safuɛ.»

¹³ I ndɛ sɔ'n ti nanwlɛ. I sɔ'n ti'n, ijɔ be kpa, man be lafi Nyanmiɛn su kpa,

¹⁴ nan b'a lafi-man Zuif'm be ndɛ b'ɔ ti kɛ ngua sa'n su, yɛ man be lafi i su kpa nan b'a yo-man sa nga sran nga b'a yaci ndɛ nanwlɛ'n be se be kɛ be yo'n ti.

¹⁵ Sran nga be akunndan'n ti kpa'n, like kwlaa ti kpa be nyrun, sanngɛ sran nga be akunndan'n ti-man kpa'n, bɔ be lafi-man Nyanmiɛn su'n, like fi ti-man kpa be nyrun. Afin be akunndan'n ti tɛtɛ, be ´yo sa-a be klun ti-man be.

¹⁶ Be yo bé wun kɛ be si Nyanmiɛn, sanngɛ sa nga be yo'n ɔ kle-man kɛ be si i. Bé wun yo tɛ, bé nyin ti kekle, yɛ be kwla yo-man sa kpa bɔ kun sa.