Sofoni 2 - NYANMIƐN NDƐ'N 1998

Wɛtɛɛfuɛ mun, an `mantan Anannganman

¹ Amun bɔ amun si-man nyannzuɛn'n amun `kan amun anwlɛn'n i ase nan amun `bu akunndan kpa,

² kɛ ɔ ko yo nan Anannganman i ya cɛn dan'n ju-ɔ, amu'an bo-man b'a sanndi-man le kunngba kɛ awie wla sa, nan Anannganman ɔ'a fɛ-mɛn i ya dan'n ɔ'a gua-man amun su'n ti.

³ Mɛn'n nun wɛtɛɛfuɛ mun, amun bɔ amun nanti Anannganman i mmla'n su'n, amun `mantan Anannganman. Amun `yo nanwlɛfuɛ, amun `kan amun wun ase be man Nyanmiɛn'n. Amun `kan amun wun ase be mɛn i, i liɛ'n, nja, sɛ i ya cɛn'n ju-ɔ, amun ´nyan amun ti o.

Wia atɔliɛ lɔfuɛ mun

⁴ Gaza wa tɔ koun, Askalɔn ´nunnun mlɔnmlɔnmlɔn. Be wa fuan Asdɔdfuɛ mun wia klakla kpa'n nun. Ekrɔnfuɛ'm be kusu, be wa tu be bo klɔ'n su.

⁵ Amun bɔ an fin Keret, bɔ an tran jenvie'n nuan'n, amun yako! Afin amún wun ndɛ nga Anannganman'n ɔ'a kan'n, ɔ ti-man blɛblɛ. I waan: «Kanaan bɔ a ti Filistifuɛ'm be mɛn'n, n ´nunnun wɔ, n ´nunkun ɔ́ su sran'n kwlaa.

⁶ Wɔ asiɛ ng'ɔ la jenvie'n nuan lɔ'n, ɔ ´kaci nnɛn'm be didiwlɛ, lɛ yɛ nnɛn kankanfuɛ'm be ´fa be nnɛn mun be ´sin-ɔn, lɛ yɛ be ´sisi be bua'm be kuku'n yɛ be ´fa be ´gua nun-ɔn.»

⁷ I sɔ lika liɛ ng'ɔ o jenvie nuan lɔ'n, Zidafuɛ'm be ´fa be nnɛn'm be ´kɔ didilɛ lɔ, kpɛkuun nnɔsua be ´ko la Askalɔn sua'm be nun lɔ. Afin Anannganman be Nyanmiɛn'n ɔ wa nian be lika, ɔ ´fa be ´sie be osu laa'n nun .

Wia afiliɛ lɔfuɛ mun

⁸ «Nzowa nga Moabfuɛ'm be kpɛli min sran mun'n, asanse nga Amɔnfuɛ'm be dili be'n, n tili. Blɔlɛ nga be bɔbɔ be blɔ kɛ be lika liɛ'n i kpa tra Izraɛlfuɛ'm be lika liɛ'n, n tili.

⁹ Ɔ man i ti m bɔbɔ min Anannganman bɔ n sie mɛn wunmuan'n, m'an ta nda kɛ sɛ Moab ɔ'a yo-man kɛ Gomɔr sa'n, wuun nán min Izraɛl Nyanmiɛn nin-ɔn. Be lika'n ´kaci njin asiɛ, san ijre tɛtɛ'm be kunngba yɛ be ´fu nun-ɔn, ɔ ´saci mlɔnmlɔnmlɔn. Min nvle nunfuɛ nga be kali'n, be ´fɛn be bo ninnge mun, yɛ be ´fa asiɛ'n yo be liɛ.»

¹⁰ Be tutre bɔ be dili'n, ɔ nin nzowa nga be kpɛli Anannganman b'ɔ sie mɛn wunmuan'n i sran mun'n, i su sa nga be ko nyɛn i'n, yɛ ɔ o lɛ-ɔ.

¹¹ Anannganman'n su yo-man be blɛblɛ, ɔ ´kuakua asiɛ'n su amuɛn fanunfanun mun. Ɔ man nvle nga be o mmua-mmua kpa'n be ´koto i bo bé mɛn'm be nun sɛsɛsɛ .

Nglo lɔ nvle nin ngua lɔ nvle mun

¹² «Etiopifuɛ mun, amun kusu n ´yo man alɛ'n ´di amun.» Anannganman yɛ ɔ se sɔ-ɔ.

¹³ Anannganman nin be nga be o mɛn'n i nglo lɔ lika liɛ nun'n be ´yia nun. Ɔ ´nunnun Asiri, ɔ ´yo man Niniv ´nunnun, ɔ ´kaci aawlɛ flɛnnɛn, ɔ su yo-man like ye.

¹⁴ Ɔ ´kaci klɔ nnɛn nin nnɛn wafa-wafa'n kwlakwla be tranwlɛ, ɔ liɛ akpatue'm be ´fɛ i sua'm bé ti buwlɛ lika'n be ´yo be lawlɛ. Sua'm be fenɛtri'm be nun yɛ anunman'm be ´kpan-an. Kɛ a kpɛn sua'm be anuan'm be nun sa'n, a ´wun kɛ ninnge'm b'a saci be tru lɛ. Sɛdri waka'm bé bo ´wie tu.

¹⁵ «Sran kwlaa ng'ɔ ´sin i wun lɛ'n, srilɛ'n yɛ be sri wɔ-ɔ, be keje be sa be se kɛ: ?Klɔ klanman bɔ i nunfuɛ'm be klun ti-man be'n, bɔ be bu i kɛ be lɛ-man wunsu'n yɛlɛ nga ɔ'a yo sa yɛ'n? ?Klɔ sɔ'n yɛlɛ nga ɔ'a nunnun mlɔnmlɔnmlɔn bɔ ɔ'a kaci nnɛn'm be lawlɛ yɛ'n? »