Sofoni 1 - NYANMIƐN NDƐ'N 1998

¹ Ndɛ nga Anannganman kan kleli Sofoni'n yɛ ɔ o yɛ. Ezekias wa Amaria i wa liɛ Gɛdalia, i kusu wa liɛ Kisi i klun ba yɛlɛ Sofoni. Zida famiɛn Zozias bɔ i si yɛlɛ Amɔn'n, i blɛ su yɛ Nyanmiɛn kannin ndɛ sɔ'n kleli Sofoni-ɔ.

Nyanmiɛn nin asiɛ wunmuan'n b'a nyɛn i

² Anannganman wan yoo: «N wa nunnun asiɛ'n su ninnge'm be kwlaa.

³ N ´nunnun sran nin nnɛn mun, anunman nga be tu be sin nglo'n nin kpatra nga be o jenvie nun'n, n ´nunnun be, klunwifuɛ mun nin bé sa nuan ninnge tɛtɛ nga be yoli'n, n ´nunnun be. N su yaci-man sran ba kun sa asiɛ'n su.» Anannganman'n yɛ ɔ kan sɔ-ɔ.

Nyanmiɛn nin Zida nvle'n, nin Zerizalɛmfuɛ mun b'a nyɛn i

⁴ «Zida nvle'n nin Zerizalɛmfuɛ mun be wa wun min. Baal wun ninnge ng'ɔ ka wa'n, n ´yi, i sufuɛ nin i nyrun jranfuɛ'm be dunman liɛ'n ´mlin mlɔnmlɔnmlɔn.

⁵ Sran nga be fu sua'm bé ti'n su be koto nzraama'm be bo'n, ɔ nin be bɔ be koto Anannganman'n bo be tɛ i nda kpɛkuun be kunngba'n be ta amuɛn Milkɔm nda'n, n ´nunnun be.

⁶ Be nga be kaci bé sin be si min Anannganman, bɔ be bua-man min ndɛ nun, be usa-man min ngwlɛlɛ afɛ'n, n ´nunnun be.»

⁷ An `muan amún nuan Anannganman Nyanmiɛn nyrun, Anannganman'n i ya cɛn'n ɔ'a mantan koko. Anannganman'n ɔ'a siesie tɛ yilɛ'n, be nga ɔ ko flɛ be'n, ɔ'a yo be saun .

⁸ «Mín tɛ yilɛ cɛn sɔ nun'n, i kpɛnngbɛn mun o, i famiɛn awlo lɔ sran dandan mun o, n ´tu be fɔ. Be kwlaa nga be fa nvle uflɛ'm be nzuɛn'n, n ´tu be fɔ .

⁹ I sɔ cɛn liɛ nun'n, be bɔ be ju Nyanmiɛn sua'n i anuan'n nun bɔ be tu be tra i tiaan nga be fa wlu nun lɔ su'n, kɛ sran bɔ be si-man Nyanmiɛn'n be sa'n, n ´tu be fɔ. Be nga bɔ b'a fa awie'n nin sa tɛtɛ yolɛ'n b'a fa nyan bé wun, bɔ i sɔ ninnge'm b'a yi be amuɛn sua mun piɛ'n, n ´tu be fɔ.

¹⁰ I cɛn sɔ nun'n, kpanlɛ ´tɛ Jue Anuan'n nun lɔ, yɛ awuyomo ´tɛ klɔ'n i akpasua uflɛ'n su lɔ. Nganniɛn dan ´tɛ kpɔlɛ'm be su.» Anannganman'n yɛ ɔ kan sɔ-ɔ.

¹¹ «Amun nga amun tran ngua lɔ'n, an `bo awuyomo, afin aata difuɛ'm be kwlaa be su wa wu, sika kunndɛfuɛ'm be kwlaa bé ja su wa mlin be bo asiɛ'n su.

¹² Blɛ sɔ nun'n, n ´sɔ kannin n ´nian-nian Zerizalɛm i kɔtɔkakɔtɔka nin i longolongo'm be kwlaa be nun. Be bɔ be klun ti-man be, be o lɛ diin kɛ nzan bɔ ɔ'a klo ɔ'a jrɛn i bo'n sa. Be se be wun kɛ: ‹Man e ti sa ke! Anannganman su kwla yo-man like fi! Sa kpa o, sa tɛ o, ɔ kwla-man wie fi yo!› E nin be sɔfuɛ mun e wa yia nun.

¹³ Be wa fɛn bé bo ninnge kpakpa mun, bé sua'm be wa bubu. Sua nga be wa kplan'n, be su tran-man nun, vinyi nga be wa ta'n, be su nɔn-mɛn i nzan .»

Anannganman i cɛn'n ɔ'a mantan

¹⁴ Anannganman i cɛn dan'n ɔ'a mantan koko, ɔ ba ndɛndɛ kpa, ɔ'a mantan koko. Cɛn sɔ nun'n, alowa'n ´jaso woo, awuyomo'n ´tɛ. Safunyrɛn'n bɔbɔ ɔ ´kpan kɛ: «Be `de min o, be `de min o!»

¹⁵ Cɛn sɔ'n, ɔ ´yo Nyanmiɛn i ya i nglo yilɛ cɛn, ɔ su yo-man aklunjuɛ cɛn, ɔ ´yo awlaboɛ cɛn. Ɔ ti mɛn'n nin ninnge'm be nunnunlɛ cɛn. Cɛn sɔ'n, aosin'n ɔ ´wla tritritritri. Ɔ ´yo nzue mlanlɛ lika sa tuun, yɛ ɔ ´yo bɔlɛ ufue lika sa munnduun .

¹⁶ Sonja nga be fin lika wie be bali kɛ be nin be kpɔfuɛ mun be ´kun alɛ'n, be ´bo awɛ yɛ be ´kpan alɛ kpanlɛ. Klɔ nga be si be wun'n, bɔ be lɛ sasawlɛ sua nglo-nglo'n be nin be nunfuɛ'm bé kun.

¹⁷ «N ´fa nyrɛnnɛn'n n ´yi i sran'm be su, be ´nanti kɛ anyansifuɛ mun sa. Fɔnlɛ bɔ be fɔnnin Anannganman wun'n ti, be mmoja'n ´sonji lika'n nun kɛ nzue sa, yɛ be fuɛn'n ´kplɔ kɛ ofuɛ su like sa.»

¹⁸ Anannganman i ya cɛn dan nun'n, be sika nin be sika ɔkwlɛ'n be su kwla de-man be. I ya b'ɔ ti kɛ sin sa'n, ɔ ´nunnun mɛn wunmuan'n. Ee, nanwlɛ, ɔ ´yo kekle o! Anannganman ´nunnun asiɛ'n su sran'm be ngba sekeseke .