Ngɔjue Fɛfɛ Kpa'n 8 - NYANMIƐN NDƐ'N 1998

¹ Ee! Sɛ ɔ ti kɛ a ti min niaan bian yɛ sɛ a nɔnnin mín nin i nyɔnflɛn'n wie'n, wuun sɛ e nin wɔ e yia gua su lɔ'n nan e tɔ e wun nun'n, sran'm be nyin su ci-man min.

² N ´fa wɔ n ´kɔ mín nin i awlo lɔ. Yɛ a ´kle min like. M ´man wɔ min vinyi nzan fanninfannin nin min grenadie mma nzan lɔflɛ'n wie a ´nɔn!

³ Man ɔ fɛ i sa bɛ'n suan mín ti. Man ɔ fɛ i sa fama'n cici min!

⁴ Zerizalɛm talua mun, n ´srɛ amun kpa ti-ɔ, nán amun tinnge klolɛ'n. Sɛ klolɛ'n ti sran'n, wuun n ´se kɛ nán an tinnge i ka nan i jasolɛ dɔ'n ɔ'a ju.

(Talua'n i janvuɛ'm be waan)

⁵ ?Nan bla onin yɛ ɔ fin aawlɛ flɛnnɛn'n nun lɔ ba b'ɔ kisɛ i adeba'n su nin-ɔn? N tinngeli wɔ pɔmun waka'n bo lɛ kan ɔ́ nin wunnzɛli wɔ lɛ'n. N tinngeli wɔ kan ɔ wuli wɔ'n lɛ'n, kan a wunnin wia'n i wun lɛ'n.

Klolɛ i wunmiɛn ng'ɔ lɛ i'n i ndɛ (Talua'n waan)

⁶ Sɛ be yo sɔ-ɔ ɔ yo ye'n, wuun n ´se kɛ a `fa min sie wɔ anwlɛn'n su kɛ nzɔliɛ sa, wuun n ´se kɛ a `fa min ta ɔ́ sa'n su kɛ nzɔliɛ sa. Afin klolɛ'n ɔ kwla kɛ wie'n sa. Sɛ a wu sran kun ti'n, be bli wɔ-ɔ a bli-man. Ɔ ti kɛ blɔlɔ kɔlɛ'n sa, ɔ lɛ-mɛn i ayre. Kwla silɛ'n ɔ jue sran'n nun kɛ sin sa, ɔ jue kɛ sin sroesroe wie sa .

⁷ Man klolɛ'n ɔ yo kɛ like bɔ be wun i nin be nyinma'n sa, yɛ man be fa jenvie'n i nun nzue'n kwlaa be utu su, ɔ su kwla kɛn-mɛn i ase. Man nzue ba'm be kwlaa be sonji sin su, sanngɛ be nunnun i-ɔ ɔ yo-man ye. Kannzɛ man sran kun fɛ i bo ninnge kpakpa'n kwlaa man kɛ ɔ ´fa to klolɛ'n, san finfin cɛ yɛ be ´yo i-ɔ.

(Talua'n i niaan bian'm be waan)

⁸ E lɛ e sinma bla kun bɔ i nyɔnflɛn nian ba-man. ?Blɛ nga be ´kɛn i jalɛ ndɛ'n, nguɛ yɛ e ´yo mɛn i-ɔ?

⁹ Sɛ e sinma sɔ'n ɔ ti kɛ klɔ wun talɛ sa'n, wuun e ´kpɛ talɛ sɔ'n i ti su nglo lɔ buɛ nga be nian nun be sasa klɔ'n, wuun e ´yo buɛ sɔ mun nin sika. Sɛ e sinma sɔ'n ɔ ti kɛ anuan sa'n, wuun e ´fa sɛdri waka kun e ´jɛ sin.

(Talua'n waan)

¹⁰ N ti kɛ klɔ wun talɛ sa, min nyɔnflɛn'm be ti i sasawlɛ sua. Min adeba'n i liɛ'n, min yɛ man i anwlɛnba'n ɔ tɔ nzue nun-ɔn.

(Yasua'n waan)

¹¹ Salomɔn lɛ i vinyi fie kun Baal-Amɔn lɔ. Ɔ fa mannin sran wie mun kɛ be nian su. Be nga be klo kɛ be ´ti fie sɔ'n, i nun vinyi'n bé su mma'n wie'n Salomɔn man be yi jɛtɛ ufue mma akpi.

¹² Min vinyi liɛ'n, m bɔbɔ yɛ n nian su-ɔ. Salomɔn, fa ɔ sika jɛtɛ ufue akpi'n, bɔ i nun ya nnyɔn ti vinyi su nianfuɛ'm be liɛ'n.

¹³ Mmo klanman ɔ bɔ a o tro fie'm be nun lɔ'n, janvuɛ wie'm be kunndɛ kɛ be ´ti ɔ nɛn'n. Ijɔ man n ti. Se min kɛ:

¹⁴ «Min adeba, wanndi bla. Wanndi glaunglaun kɛ wannzannin wie sa, annzɛ flete gbanflɛn wie sa, wanndi bla oka nga bé su bɔn fɛɛn'n be su wa.»