Ngɔjue Fɛfɛ Kpa'n 7 - NYANMIƐN NDƐ'N 1998

(Bla kaklaakla mun nin talua mun be waan)

¹ Famiɛn yi, kpɛ ɔ wun, kpɛ ɔ wun, kpɛ ɔ wun, kpɛ ɔ wun man e nian wɔ. ?Ɔ yo sɛ ti yɛ amun nian famiɛn'n i yi'n sɔ-ɔ? Amun niɛn i kɛ be su nian able wie bɔ sran akpasua nnyɔn b'a yia be su si'n sa.

(Yasua'n waan)

² Kɛ ɔ ja'm be o ɔ ngbabua'm be nun'n, be ti nglanman o! Famiɛn wa bla, ɔ́ bo lengle nun'n ti kɛ be kɔmin afle bɔ ajuindifuɛ'n ɔ yo'n sa.

³ Ɔ ku bo'n ɔ ti kɛ klowa kukluku wie bɔ nzan fannin fannin'n tu-man nun'n sa. Ɔ wunnɛn'n ɔ ti kɛ ble bɔ b'a tiɛn i nuan bɔ lis sin yiɛ i'n sa.

⁴ Ɔ nyɔnflɛn nnyɔn'm be ti kɛ wannzannin ba nnyɔn bɔ bé nin wuli be nda'n sa.

⁵ Ɔ kɔmin'n ɔ ti kɛ sua mlomlo wie yɛ b'a fa sui je b'a kplan sa. Ɔ nyinma'm be ti kɛ Ɛsbɔn lɔ fɛtɛ nga be o klɔ dan sɔ'n i anuan wun lɛ'n sa. Ɔ bue'n ɔ ti kɛ Liban lɔ klɔ sasawlɛ sua kluklu nga i nyin kaci Damas bue'n su lɔ'n sa.

⁶ Ɔ ti'n ɔ jin ɔ́ ti su sa ceiin kɛ Karmɛl oka'n sa. Ɔ ti'n bɔ b'a yo'n, i wafa'n waan ɔ ´yo ɔkwlɛ kankankan. Kɛ famiɛn kun nian ɔ timuɛn'n sa'n, ɔ jran-an ɔ jran-man.

⁷ A ti klanman o! A ti klanman lele kpe nun! Min anwlɛnba, wɔ yɛ man min klun jɔ-ɔ.

⁸ A ti tiaan seiin kɛ mme wie sa. Ɔ nyɔnflɛn'm be ti kɛ aye otre wie sa.

⁹ I ti min waan n ´fu mme'n su nan n ´ko trɛ i otre'n sa kplo. Man ɔ nyɔnflɛn'n yo kɛ vinyi mma'n i sɔsɔwa'n sa. Man ɔ bue buɛ'm be nun bɔn fɛɛn kɛ pɔmun fanninfannin sa.

¹⁰ Sɛ ɔ́ nuan'n ɔ ti nzan'n, wuun n ´se kɛ man ɔ yo nɛnkɛn-nɛnkɛn kɛ nzan ng'ɔ ti kpa'n sa. Nzan sɔ'n ti min adeba'n i kunngba liɛ. Kɛ e ´lafi'n, nzan sɔ'n ɔ sonji é nuan bui'n su.

(Talua'n waan)

¹¹ N ti min adeba'n i liɛ, yɛ min yɛ i konvi sɔ min-ɔn.

Sran bɔ be klo i sa'n ɔ ti muae sa (Talua'n waan)

¹² Min adeba, bla e `fite e wɔ blo lɔ. E `wɔ klɔ kaan wie su e ko la lɔ kɔnguɛ.

¹³ E `wɔ vinyi fie'n nun lɔ nglɛmun ndɛ kpa'n. E `ko nian sɛ vinyi'm b'a bo nnyrɛ o, sɛ be nyrɛ'm b'a kpuke o, sɛ grenadie'm b'a bo nyrɛ o. Sɛ e ju lɔ'n, n ´fa min wun m man wɔ.

¹⁴ Mandragɔr'm be bɔnlɛ fɛɛn'n ɔ'a fa lika'n ngba. Waka bɔ be mma'm be yo fɛ'n be wafa-wafa'n kwlaa be o e sua'n i anuan'n nun. Uflɛ-uflɛ'm be o nun, nga b'a cɛ'n kusu be o nun. Min adeba, wɔ yɛ n fali be n sieli wɔ-ɔ.