Ngɔjue Fɛfɛ Kpa'n 6 - NYANMIƐN NDƐ'N 1998

(Talua'n i janvuɛ'm be waan)

¹ ?Mmo klanman, ninfan li yɛ wɔ adeba'n ɔ ɔli nin-ɔn? Kle ye atin ng'ɔ fali'n man e uka wɔ e kunndɛ i.

(Talua'n waan)

² Min adeba'n ɔ ɔli i wunmiɛn delɛ lika'n nun kan ɔ tɛli i nnya-nnya fannin'm be lɔ'n. Ɔ fɛli i bua mun ɔli didilɛ lɔ, yɛ ɔ ɔli lis nyrɛ tilɛ.

³ Min adeba'n ɔ ti min liɛ, n kusu n ti i liɛ. Kan lis nyrɛ'm be o lɛ'n, lɛ yɛ ɔ fɛ i nnɛn mun kɔ didilɛ-ɔ.

Bla bɔ be klo i kpa'n, i wafa ng'ɔ fa ti'n (Yasua'n waan)

⁴ A ti klanman o! Min adeba, a ti klanman kɛ Tirza klɔ'n sa. A ti klanman kɛ Zerizalɛm klɔ'n sa. Sanngɛ a yo sro kɛ sonja akpasua wie bɔ be titi be flanga'n i bo lɛ'n sa.

⁵ Nán kpɛ ɔ nyin min wun wa, afin kɛ a nian min sa'n, n jran-an ɔ jran-man. Ɔ timuɛn'n ɔ guagua kɛ boli akpasua wie bɔ be fin Galaad oka'n su be su jra'n sa.

⁶ Ɔ je'm be ti fuaii kɛ bua akpasua wie bɔ be fin nzue nɔnwlɛ lɔ be su ba'n sa. Be ti nda ngunmin, be ba nnyɔn-nnyɔn. Ɔ lɛ-man kɛ nga yɛ ɔ lɛ-man wiengu-ɔ.

⁷ Kɛ be nian ɔ tannin fɛtɛfɛtɛ ng'ɔ kata ɔ nyrun'n i bo lɔ'n, be wun ɔ fuka mun. Be ti mlanmlan ɔ waan grenadie mma yɛ b'a kpaci nun b'a fa utu-utu i lɛ sa.

⁸ Famiɛn'n i yi'm be ti ablesiɛn, i soman'm be ti ablaɔcuɛ, yɛ i talua'm be liɛ be si-man be nuan.

⁹ Sanngɛ bla kunngba cɛ yɛ min nyin o i sin-ɔn. I yɛ ɔ ti kɛ min auble sa-a, fɔ ba kun sa nun-mɛn i wun. Ɔ ti i nin i wa bla kunngba cɛ, i yɛ i nin klo i-ɔ. Kɛ talua'm be wun i'n, be se i kɛ ɔ liɛ su ti ye . Famiɛn'n i yi mun nin i soman mun be yi i ayɛ, be se kɛ:

¹⁰ «?Wan yɛlɛ bla ng'ɔ ti i liɛ kɛ wia b'ɔ su tu i bo sa'n? Ɔ ti klanman kɛ anglo ba'n sa. Ɔ ti kɛ wia b'ɔ su kpaja'n sa. Sanngɛ ɔ yo sro kɛ sonja akpasua wie bɔ be titi be flanga'n i bo lɛ'n sa.»

¹¹ N wɔli nuaye fie'n nun lɔ. N wɔli kongo'n nun lɔ. N wɔli waka mma bɔ be su fifi'n be nianlɛ. Min waan n ´ko nian sɛ vinyi'm be su fifi o! Min waan n ´ko nian sɛ grenadie'm be su bo nnyrɛ o!

¹² Kpɛkuun, n konvi ɔ'a sɔ wɔ. N wun-man sa nga wlɛ. Ɔ waan sran b'ɔ wo alɛ kakaklolo nun bɔ i konvi ɔ'a sɔ alɛ kɔlɛ'n sa.