Ngɔjue Fɛfɛ Kpa'n 5 - NYANMIƐN NDƐ'N 1998

(Yasua'n waan)

¹ Min niaan bla, min yi, n su wlu min wunmiɛn delɛ lika'n nun. N ´ti min mir'n i mma'n, n ´kpɛkpɛ min ijre fanninfannin'n. N ´nɔn min awɛma nzue'n. N ´nɔnnɔn min awɛma nzue'n. N ´nɔn min nzan nin min nɔnnɔn'n. Min janvuɛ mun, amun `di, amun `nɔn. Sɛ be nɔn klolɛ'n ɔ yo ye'n, wuun n ´se kɛ amun `nɔn, man ɔ bo amun kɛ nzan sa.

(Talua i janvuɛ'm be waan) Kɛ bla'n ɔ ´tike i janvuɛ i anuan'n, wuun ɔ'a ɔ lalaa (Talua'n waan)

² Lafilɛ'n ɔ'a fa min, sanngɛ sɛ min akunndan'n ti sran'n, wuun n ´se kɛ i nyin o su. N ti min adeba'n i nɛn'n. Ɔ bobo anuan'n, i waan: Min niaan bla, n janvuɛ kpa, min auble, manmin klanman beblebe, tike min anuan. Bɔlɛ'n ɔ'a gua min ti'n su. Kɔnguɛ bɔlɛ'n ɔ'a lua mín timuɛn'n sa pɔtii.

(Yasua'n waan) (Talua'n waan)

³ M'an yi min wun tralɛ'n. ?Kɛ ɔ o yɛ'n n wa wlɛ i ekun? N wunnzinnin min ja'm be wun. ?Kɛ ɔ o yɛ'n n wa yo be fiɛn ekun?

⁴ Min adeba'n fɛli i sa'n wlɛli i fenɛtri'n i toklo'n nun. Ɔ yoli min annvɔ, i ti min anwlɛnba'n sisi n klun lɔ sa kpu kpu kpu.

⁵ Yɛ kle, yɛ n ´jaso n ´ko tike min adeba'n i anuan-an. Min sa nun'n ti mir ngunmin. Kɛ n ´ko tra anuan'n i like bɔ be fa tike'n, mir'n b'ɔ sonji-sonji min sama'm be su'n, ɔ kali su.

⁶ Yɛ n tikeli min adeba'n i anuan-an. Kannzu ɔ'a sɛ i sin ɔ'a ɔ. Kɛ ɔ ´flɛ min lɛ'n, m'an wun-man nun kpa. Yɛ n ´wanndi n ´su i su-ɔ. N kunndɛli i lele nán wunlɛ yɛ n ko wun i-ɔ. N flɛli i lele m'an ti-mɛn i ngan.

⁷ E nin klɔ'n i su nianfuɛ nga be wlan-wlan klɔ'n nun'n e yiali. Be boli min, be kplokploli min wun, be deli min tannin b'ɔ gua min wati su'n. Gladi difuɛ sɔ'm be nanti-nanti klɔ'n i talɛ'n su be sin.

⁸ Ee! Zerizalɛm talua mun, ?Sɛ amun wun min adeba'n, amun ´se i sɛ? N ´srɛ amun kpa ti-ɔ, amun `se i kɛ m'an wu i ti kpo i klolɛ'n dunman nun.

(Talua'n i janvuɛ'm be waan)

⁹ ?Mmo talua klanman beblebe, wɔ adeba kpa nin-ɔn, nguɛ yɛ ɔ o i wun b'ɔ nun-man sran uflɛ wun-ɔn? ?Nguɛ yɛ ɔ o i wun b'ɔ nun-man sran uflɛ wun bɔ man a srɛ e sɔ-ɔ?

(Talua'n waan)

¹⁰ Min adeba'n ɔ ti sa ɔkwlɛ biaii. Sɛ ɔ o sran akpi blu (10.000) be afiɛn bɔbɔ'n, i wlɛ wunlɛ yo-man ya.

¹¹ I ti'n ɔ ti klanman kɛ sika ɔkwlɛ mɔnnɛn sa. I timuɛn'n ɔ ti tɔlɛtɔlɛ kɛ waka nyrɛ sa. I timuɛn sɔ'n ɔ ti ble tikitiki kɛ kɔkɔkuankuan i wunnɛn'n sa.

¹² I nyinma'm be klanman'n ti kɛ auble'm b'ɔ be o nzue nuan'n be klanman'n sa. I nyinma'm be ufue'n ɔ ti fuaii kɛ nɔnnɔn sa.

¹³ A wun i fuka mun-ɔn, ɔ waan b'a kpɛ lika wie nan b'a ta nun nnya-nnya nin ijre fannin fannin sa. I fuka'm be ti fuaii mlanmlan kɛ lis sa. Be su'n ti mir ngunmin.

¹⁴ I sa'm be ti kɛ sika ɔkwlɛ nga bɔ b'a fa krizoliti b'a wlawla be nun'n sa. I wunnɛn'n ɔ ti kɛ sui je bɔ b'a yo i wun treketreke bɔ b'a fa safir b'a siesie su'n sa.

¹⁵ A wun i ja mun-ɔn, ɔ waan marbru ufue wie yɛ b'a sɛsɛ i mlomlo nan b'a fa kplankplan sika ɔkwlɛ like wie nun sa. Sika ɔkwlɛ sɔ'n ti jrɛiin kpa. Kɛ ɔ jin sa'n, ɔ yo nyɛnmɛn o, ɔ waan Liban lɔ oka wie-ɔ! Kɛ ɔ jin sa'n, ɔ ti sɔ seiin, ɔ waan sɛdri waka wie-ɔ.

¹⁶ I nuan bui'n ti sa lɛkɛlɛkɛlɛkɛ. Nanwlɛ ɔ ti sran klanman sakpa o! Zerizalɛm talua mun, min adeba'n i wafa b'ɔ ti'n yɛ ɔ o lɛ-ɔ. Kɛ n janvuɛ'n fa ti'n yɛ ɔ o lɛ-ɔ .