Ngɔjue Fɛfɛ Kpa'n 4 - NYANMIƐN NDƐ'N 1998

(Yasua'n waan)

¹ A ti klanman o, min janvuɛ kpa! A ti klanman dan o! Kɛ be nian ɔ tannin fɛtɛfɛtɛ ng'ɔ kata ɔ nyrun'n i sin lɔ'n, be wun ɔ nyinma bɔ be klanman'n ti kɛ auble'm be klanman'n sa'n. Ɔ timuɛn'n ɔ guagua ɔ wun kɛ boli bla akpasua wie bɔ be fin Galaad oka'n su be su jra'n sa.

² Ɔ je'm be ti fuaii kɛ bua akpasua wie bɔ be fin be ndrɛ'n kpɛkpɛlɛ'n sa. Be fin nzue nɔnwlɛ lɔ be su ba, be ti nda ngunmin, be ba nnyɔn-nnyɔn. Ɔ lɛ-man kɛ nga yɛ ɔ lɛ-man wiengu-ɔ.

³ Ɔ nuan bui'm be ti kɛ tannin tanmue tiaan ɔkwlɛ wie sa. Ɔ nuan'n ɔ yo nyɛnmɛn. Kɛ be nian ɔ tannin fɛtɛfɛtɛ ng'ɔ kata ɔ nyrun'n i bo lɔ'n, be wun ɔ fuka mun. Be ti mlanmlan ɔ waan grenadie mma yɛ b'a kpaci nun b'a fa utu-utu i lɛ sa.

⁴ Ɔ kɔmin'n ti kɛ David i sua mlomlo bɔ be kplɛn i kɛ be ´fa alɛ ninnge'm be ´sie nun'n sa. Nyrɛn akpi sata-sata sua sɔ'n i wun sin yiɛ i. Nyrɛn sɔ'm be ti safunyrɛn'm be liɛ.

⁵ Ɔ nyɔnflɛn nnyɔn'm be ti kɛ wannzannin ba nnyɔn sa. Be ti kɛ wannzannin nda nnyɔn bɔ be jin lis nun be su didi'n sa.

⁶ Kɛ aliɛ'n ɔ'a jɔ bɔ aunngban fɛfɛ'n ɔ ´fita'n, bɔ ninnge'm be fɔnvɔ'm be yo tɛnndɛn'n n ´kɔ oka'n bɔ mir o su'n i su lɔ, n ´kɔ kpɔlɛ bɔ ansans o su'n i su lɔ.

⁷ N janvuɛ kpa, a ti klanman dan. Fɔ fi nun-man ɔ́ wun.

⁸ Min yi , jaso Liban lɔ bla min sin. Jaso Liban lɔ bla min sin. Jaso Amana oka'n su lɔ bla. Jaso Sɛnir nin Ɛrmɔn oka'm bé su kan asɔmɔli'm be la lɔ'n nan bla, jaso kan kangale'm be tran lɔ'n nan bla.

⁹ Min niaan bla, min yi, kɛ a to ɔ́ nyin mín su sa'n, sɛ kpɛ kunngba bɔbɔ-ɔ, n jran-an ɔ jran-man kun. Kɛ n nian ɔ kɔmin afle'n, sɛ kpɛ kunngba cɛ yɛ n niannin bɔbɔ-ɔ, n jran-an ɔ jran-man kun.

¹⁰ Min niaan bla, min yi, kɛ n klo wɔ'n ti, kɛ n wun wɔ'n, n jran-an ɔ jran-man kun. Klolɛ bɔ a klo min'n, sɛ ɔ ti nzan'n, wuun n ´se kɛ i fɛ liɛ'n tra ngba. Ɔ parfɛn liɛ'm be bɔn fannin tra nguɛn wafa-wafa'm be kwlaa.

¹¹ Min yi, ɔ nuan bui'm be su ti nɛnkɛn-nɛnkɛn kɛ awɛma nzue sa. Ɔ taaman'n i bo ti awɛma nzue nin nɔnnɔn ngunmin. Ɔ tralɛ'm be bɔn klanman kɛ Liban waka mun sa.

¹² Min niaan bla, min yi, a ti kɛ wunmiɛn delɛ lika kun bɔ i wun ti sisiwa'n sa. A ti kɛ nzue ti kun bɔ i wun ti sisiwa'n sa. Yɛ a ti kɛ nzue b'ɔ fin like nun fite, bɔ i anuan'n nun ti towa'n sa.

¹³ A ti nɔnman-nɔnman kɛ grenadie bɔ be nyin klanman fie'n nun, bɔ be mma'm be ti nɛnkɛn-nɛnkɛn kpa'n sa. Ene nin nar waka'm be fifi fie sɔ'n nun wie.

¹⁴ Nar nin safran, nin lorie fanninfannin'n, nin sinamɔm, nin waka nga be bɔn fɛɛn'n be kwlaa, nin mir, nin aloɛs, ɔ nin waka nga be bɔn klanman tra su'n be o fie sɔ'n nun wie.

¹⁵ A ti kɛ nzue b'ɔ o wunmiɛn delɛ lika wie nun b'ɔ fin like nun fite'n sa. A ti kɛ nzue ti kun bɔ i nzue'n sonji Liban lɔ'n sa .

(Talua'n waan)

¹⁶ Nglo lɔ aunngban, fita. Ngua lɔ aunngban, fita wie. Amun `fita min wunmiɛn delɛ lika'n su man i bɔnlɛ fɛɛn'n ɔ tru lika'n nun. Min adeba, wlu ɔ tro fie'n nun nan di i nun mma fɛfɛfɛ mun.