Ngɔjue Fɛfɛ Kpa'n 3 - NYANMIƐN NDƐ'N 1998

Bla'n i laliɛ b'ɔ ´cɛn-ɔn, ɔ su kunndɛ i adeba'n sin'n (Talua'n waan)

¹ Kɔnguɛ'n, lafilɛ nun'n n kunndɛli n sran'n bɔ n klo i'n. N kunndɛli i lele ngbɛn.

² Yɛ n waan n wa jaso m bo sin yia klɔ'n, min waan n ´sin akpɔ'm bé su kan sran'm be yia lɛ'n, min waan n ´ko kunndɛ n sran bɔ n klo i'n. Kɛ n kunndɛli i lele'n, m'an wun-mɛn i.

³ E nin klɔ'n su nianfuɛ nga be wlan klɔ'n nun'n e yiali, n usali be kɛ: «?Amun wunnin n sran bɔ n klo i'n?»

⁴ Kɛ n sannin bé wun cɛ'n, n ´nian-an, n sran bɔ n klo i'n yɛ ɔ o yɛ. Nan m'an trɛ i kplo. M'an yaci-mɛn i nun kun. N cuɛnnin i lele e ko wluli mín nin b'ɔ wunnzɛli min'n i sua ba'n nun lɔ.

⁵ Zerizalɛm talua mun, n ´srɛ amun kpa ti-ɔ, sɛ klolɛ'n ɔ ti sran'n, wuun n ´se kɛ nán amun tinnge i, wuun n ´se kɛ nán amun tinnge i ka nan i jasolɛ dɔ'n ɔ'a ju. Sɛ wannzannin nin flete mun bɔ be o blo lɔ'n be ti sran'n, wuun n ´kan kle amun kɛ be dunman nun yɛ n kan ndɛ nga n kle amun-ɔn.

(Talua'n waan)

⁶ ?Nguɛ yɛ ɔ fin aawlɛ flɛnnɛn'n nun ba kɛ sin wɛnsrɛn sa nin-ɔn. ?Nguɛ yɛ ɔ ´ba wuun mir nin ansans fanninfannin, ɔ nin parfɛn kpakpa'n kwlakwla be ´bɔn su i su sɔ nin-ɔn?

⁷ Famiɛn Salomɔn i bɛ'n yɛ ɔ ba-a. Izraɛl sonja kpakpa ablesiɛn be bo sin yia famiɛn Salomɔn. Sonja sɔ'm be ti waka-waka kpa.

⁸ Tokofi o be sa nun sɛsɛsɛ. Be si alɛ kun kpa. Be tokofi'n san bé bo kɛ ɔ ´yo nan kɔnguɛ sɛ sa wie ´ba-a, ɔ'a fu-man be nun'n ti.

⁹ Famiɛn Salomɔn boboli bia kɛ be fa suɛ i. Liban lɔ waka yɛ ɔ fa boboli-ɔ.

¹⁰ Bia sɔ'n i ja'm be ti jɛtɛ ufue, kan ɔ kisa lɛ'n ɔ ti sika ɔkwlɛ. Tannin kpakpa ng'ɔ lɛ gua'n yɛ be fa yoli i kan be tran lɛ nin-ɔn. Zerizalɛm talua'm be yoli nun nzɔliɛ nglanman-nglanman mun. Klolɛ ti yɛ be yoli-ɔ.

¹¹ Zerizalɛm talua mun, amun `bla be wa nian famiɛn Salomɔn. Kle nga i nin mɛnnin i'n, kɛ be ´trɛ i soman'n i atɔnvlɛ'n, ɔ wo i ti. Afin cɛn sɔ'n ti i aklunjuɛ cɛn.