Ngɔjue Fɛfɛ Kpa'n 1 - NYANMIƐN NDƐ'N 1998

¹ Ngɔjue'm be nun fɛfɛ kpa'n yɛ. Salomɔn yɛ ɔ klɛli ɔ.

Bla nin yasua bɔ be klo be wun'n be yalɛ kokolɛ (Talua'n waan)

² E tra ndalie, e tra ndalie kee! Klolɛ bɔ a klo min'n, sɛ ɔ ti nzan'n, wuun n ´se kɛ i fɛ liɛ'n tra like ngba.

³ Sɛ ɔ ti nyanngo bɔ be kpakpa'n, wuun n ´se kɛ ɔ bɔn fannin dan. Ɔ bɔbɔ wunmuan'n a ti kɛ nyanngo fannin sa. Sɛ talua'm be klo wɔ'n, kannzu nán ngbɛn-ɔn!

⁴ Tra n sa man e wanndi. A ti famiɛn , wɔ yɛ a sie min-ɔn, fa min wlu ɔ sua ba nun lɔ, yɛ yo man e nnyɔn'n e klun jɔ tratra su. Ɔ klolɛ nga a fa klo min'n bɔ i fɛ'n tra nzan'n, e ´yi i nglo. Sɛ be klo wɔ'n, kannzu nán ngbɛn-ɔn.

⁵ Zerizalɛm talua mun, min wunnɛn'n ɔ dun, sanngɛ nanwlɛ n ti klanman kɛ Kedarfuɛ'm bé tannin sua'm be sa, n ti kɛ famiɛn i sua'n i rido nglanman'm be sa.

⁶ Nán amun nian min wunnɛn b'ɔ dun'n, wia'n yɛ ɔ dunnin i sɔ-ɔ. Min niaan bian'm be fali ya min wun, be man n niannin be vinyi fie'm be su. M'an kwla nian-man min vinyi fie liɛ'n su .

⁷ N wan yoo, wɔ bɔ a ti min anwlɛn su sran'n, n waan n usa kɛ: «?Ninfan li yɛ a kankan ɔ bua mun kɔ didilɛ-ɔ? ?Kɛ wia'n sie be ti afiɛn'n, ninfan yɛ a nin be ko de wunmiɛn-ɔn?» Kan kle min, ɔ'a yo-man sɔ-ɔ, kan ɔ janvuɛ'm be bua liɛ'm be o lɛ'n, lɛ yɛ n ´wlan daan sa ngbɛn-ɔn.

(Nnɛn kankanfuɛ'm be waan)

⁸ Mmo klanman, sɛ a si-man lika'n, fa bua'm be ja osu'n su nan fa ɔ́ boli ba kanngan mun kɔ kan bua kankanfuɛ'm be tran lɔ'n.

(Yasua'n waan)

⁹ Ee! Min janvuɛ kpa, a ti kɛ min nnɛn kpanngɔ klanman nga ɔ cuɛn Ezipt famiɛn'n i kakaklolo'n sa.

¹⁰ Wɔ asunmanndi man ɔ fuka'm be ti klanman lele tra su. Ɔ kɔmin nyanman man ɔ kɔmin'n ti klanman lele tra su.

(Nnɛn kankanfuɛ'm be waan)

¹¹ E wa yo sika ɔkwlɛ asunmanndi e ´man wɔ, e ´fa sika e ´wlawla nun.

(Talua'n waan)

¹² Kɛ famiɛn'n ti i sran'm be afiɛn'n, kpɛkuun min nar parfɛn'n i fannin'n bɔn to i lɔ.

¹³ Min anwlɛn su sran'n, ɔ ti kɛ mir fanninfannin sa, ɔ la min nyɔnflɛn'm be afiɛn nun.

¹⁴ Ɔ ti kɛ An-Gedi lɔ vinyi fie'n nun ene nyrɛ'n i sɔsɔwa wie sa.

(Yasua'n)

¹⁵ A ti klanman o, min janvuɛ kpa! A ti klanman dan o! Ɔ nyinma'm be klanman'n ti kɛ auble'm be klanman'n sa.

(Talua'n waan)

¹⁶ A ti klanman o, min janvuɛ kpa! A ti klanman dan o! E bɛ'n ti ijre mɔnnɛn nin waka nnya.

¹⁷ E sua'n i kuatrɛn'm be ti sɛdri waka. Siprɛs waka yɛ be fa tuli su-ɔ.