Rɔmfuɛ Mun 9 - NYANMIƐN NDƐ'N 1998

Izraɛlfuɛ'm bɔ Nyanmiɛn fali be'n

^1-2 Kɛ n se kɛ awlaboɛ'n wo n su dan yɛ min anwlɛn'n kpɛ n klun'n, Kristfuɛ bɔ n ti'n ti n di nanwlɛ, Nyanmiɛn Wawɛ'n kusu man n si n klun lɔ weiin kɛ m bua-man ato.

³ Afin sɛ Nyanmiɛn bo n sannzan bɔ min nin Krist e bu nan n niaan'm bɔ min nin be e ti nvle kun'n be nyan bé ti'n, n ´se Nyanmiɛn kɛ ɔ yo n sɔ .

⁴ Be ti Izraɛlfuɛ, Nyanmiɛn man be kacili i wa, ɔ nin be trannin, ɔ kleli be like ng'ɔ se kɛ ɔ ´yo man be'n, ɔ fɛ i mmla'n mannin be, yɛ ɔ kleli be i sɔlɛ wafa'n nin like nga ɔ wa yo'n .

⁵ Be ti e nannan'm be anunman, Krist kusu kɛ ɔ kacili sran'n, osu sɔ'n nun yɛ ɔ bali-ɔ. I yɛ ɔ ti Nyanmiɛn b'ɔ sie like'n kwlaa-a, man manmanlɛ'n ɔ yo i liɛ tititi. Man ɔ yo sɔ!

⁶ Nanwlɛ, nán kɛ ndɛ nga Nyanmiɛn kannin'n ɔ'a kwlɛ-mɛn i yo ti-ɔ. Afin be kwlaa nga be fin Izraɛl osu nun'n, nán be ngba yɛ be ti Izraɛlfuɛ kpa-a.

⁷ I kunngba'n, ba nga be fin Abraam osu nun'n, nán be ngba yɛ be ti i osufuɛ kpa-a, afin Nyanmiɛn seli i kɛ: «Osu nga n kɛnnin i kɛ m ´man wɔ'n, ɔ fin Izaak .»

⁸ Ɔ man, nán be nga be ti Abraam osufuɛ be awuliɛ nun'n be yɛ be ti Nyanmiɛn wa kpa-a, sanngɛ be nga Nyanmiɛn dun mmua seli kɛ be ´wu be'n, be yɛ be bu kɛ be ti i wa kpa-a.

⁹ Like nga Nyanmiɛn seli kɛ ɔ wa yo'n yɛ: «Afuɛ ekun biki sa m ´ba, yɛ Sara wa wu ba yasua kun .»

¹⁰ Yɛ kusu Rebeka nin e nannan Izaak be wuli nda.

^11-12 Kɛ be nian wu-man ba sɔ mun bɔ be nian si-man like nga be flɛ i kpa nin tɛ'n, Nyanmiɛn seli Rebeka kɛ: « Ba kpɛnngbɛnfuɛ'n ɔ ´su i sinma'n.» Ɔ yoli i sɔ nan be si kɛ ɔ fa sran nga i bɔbɔ klo'n, ɔ nian-man like nga sran'm be yo'n su yɛ ɔ fa fa be-ɔ, sanngɛ be nga ɔ flɛli be'n be yɛ ɔ fa be-ɔ .

¹³ Afin be klɛli kɛ: «N klo Zakɔb, sanngɛ n kpɔ Ezau .»

¹⁴ ?Ɔ man e ´se sɛ? ?E ´se kɛ Nyanmiɛn yo-man sa i nuan su? Ɔ ti-man sɔ mlɔnmlɔn!

¹⁵ Afin ɔ seli Moiz kɛ: «Sran nga n waan n ´yo i ye, n ´yo i ye, yɛ sran nga n waan n ´si i aunnvuɛ'n, n ´si i aunnvuɛ .»

¹⁶ I sɔ'n fin-man like nga sran klo'n nin like ng'ɔ miɛn i nyin yo'n, sanngɛ ɔ fin Nyanmiɛn b'ɔ si aunnvuɛ'n.

¹⁷ Afin e kɛnngɛn i Nyanmiɛn ndɛ nga be klɛli'n nun kɛ Nyanmiɛn seli Ezipt famiɛn kɛ: «N sieli wɔ famiɛn kɛ n ´fa wɔ n yi mín wun nglo kɛ n kwla sa'n kwlaa yo nan n dunman'n fu mɛn wunmuan'n nun.»

¹⁸ Ɔ man e si kɛ sran nga i waan ɔ ´yo i ye, ɔ yo i ye, yɛ sran nga i waan ɔ ´kete i'n, ɔ kete i.

¹⁹ Wienun-ɔn, sran wie wa usa n kɛ: «?Sɛ ɔ ti sɔ'n, ɔ yo sɛ ti yɛ Nyanmiɛn fa sa nga e yo'n gua e su-ɔ? Afin sran fi kwla kpalo-man Nyanmiɛn nuan.»

²⁰ ?Ɔ bɔ a usa sɔ'n, a ti ɔ liɛ sɛ bɔ a yiyi Nyanmiɛn nuan nun-ɔn? ?Like nga be fa ufa wu'n, ɔ kwla usɛ i ufuɛ'n kɛ: «Ɔ yo sɛ ti yɛ a wuli n sɔ-ɔ ?»

²¹ ?Sɛ ufuɛ'n ɔ kwla fa-man ufa tɔlɛ kunngba'n wu-man sɛ wafa ng'ɔ klo'n, sɛ ɔ wu i klanman o, sɛ ɔ wu-mɛn i klanman kpa o, ɔ kwla yo-mɛn i sɔ?

²² ?Yɛ Nyanmiɛn kusu yo-man sran'm be kɛ sɛ ufuɛ'n yo i sɛ mun'n sa? ?Sɛ ɔ klo kɛ sran'm be si kɛ ɔ'a fa be wun ya, sɛ ɔ klo kɛ be si kɛ ɔ kwla sa kwlaa yo'n, yɛ sɛ be nga be kun i ya bɔ be nin kunlɛ fata'n b'ɔ blu su'n, ɔ kwla yo-mɛn i sɔ ?

²³ ?Sɛ ɔ yo i sɔ kɛ ɔ fɛ i ye dan b'ɔ yo e i klun-ufue su'n kle ye'n, ɔ kwla yo-mɛn i sɔ? Afin e b'ɔ wunnin e aunnvuɛ'n e ti kɛ sɛ klanman sa. Ɔ dun mmua sieli ye kɛ e nyan nyrun.

²⁴ E b'ɔ flɛli ye'n, nán e Zuif mun e ngunmin yɛ ɔ flɛli ye-ɔ, sanngɛ be nga be ti-man Zuif'n be o nun wie.

²⁵ E kɛnngɛn Oze fluwa'n nun kɛ Nyanmiɛn seli kɛ: «Be bɔ be ti-man n sran'n, n ´flɛ be n sran. Yɛ nvle nga n klo-mɛn i'n, n ´flɛ nvle sɔ'n nunfuɛ mun n sran kpa .»

²⁶ Lika nga n seli lɔfuɛ'm be kɛ: «Nán min sran yɛlɛ amun kun'n, be ´flɛ lɔfuɛ mun Nyanmiɛn b'ɔ lafi-man i mma mun .»

²⁷ Ezai kusu kannin Izraɛl i ndɛ, ɔ kpan seli kɛ: «Kannzɛ man Izraɛlfuɛ'm be trɛ kɛ jenvie nuan aunnyan sa'n, be nun kaan sa yɛ be ´ka lɛ, be sɔfuɛ yɛ be ´nyan bé ti-ɔ.

²⁸ Afin sa nga e Min'n se kɛ ɔ ´yo i mɛn nun'n, ɔ ´yo i trɛlɛlɛ ɔ ´wie .»

²⁹ Ezai kunngba'n kɛnnin i laa kɛ: «Sɛ e Min Anannganman Nyanmiɛn ɔ'a yaci-man e osu kaan sa'n, wuun e ´yo kɛ Sodɔm sa yɛ e ´kaci kɛ Gomɔr sa .»

Izraɛlfuɛ'm be nin jasin fɛ'n

³⁰ ?Ɔ man e ´se sɛ? Be bɔ be ti-man Zuif bɔ b'a kunndɛ-man kɛ Nyanmiɛn bu be sran kpa'n, Nyanmiɛn buli be sran kpa i su bɔ be lafili'n ti.

³¹ Sanngɛ Izraɛlfuɛ'm bɔ be kunndɛ kɛ be ´nyan mmla kun be ´fa su nan Nyanmiɛn bu be sran kpa'n, b'a nyɛn-mɛn i .

³² ?Nguɛ ti-ɔ? Afin be kunndɛ-man kɛ be lafi Nyanmiɛn su nan be yo sran kpa, sanngɛ be bu kɛ be yo sran kpa, bé sa kpakpa bɔ be yo be'n bé ti. Bé ja kplali yɛbuɛ bɔ sran'm be fin ase su'n,

³³ bɔ be klɛli i wun ndɛ kɛ: «An `nian, n ´fa yɛbuɛ kun sie Siɔn lɔ, ɔ ´kpla sran'm bé ja. Yɛbuɛ sɔ'n ti dan, sran'm be ´fin ase su. Sanngɛ sran ng'ɔ lafi i su'n, i nyin su gua-man ase .»