Rɔmfuɛ Mun 8 - NYANMIƐN NDƐ'N 1998

Be nga Nyanmiɛn Wawɛ'n sie be'n

¹ I sɔ'n ti siɛn'n be nga be nin Krist-Jésus b'a kaci sran wunmuan'n, Nyanmiɛn su bu-man be fɔ kun .

² Afin Nyanmiɛn Wawɛ'n kle sa uflɛ b'ɔ man be bɔ be nin Krist-Jésus b'a kaci sran wunmuan'n be ´nyan nguan. Ɔ man m'an nyan n ti sa tɛ'n nin wie'n bé sa nun.

³ Like nga Moiz mmla'n kwlɛ-mɛn i yo'n klɔ sran i nzuɛn'n ti'n, Nyanmiɛn bɔbɔ yoli. Kɛ ɔ yoli man i bɔbɔ i Wa'n kacili kɛ klɔ sran b'ɔ yo sa tɛ sa'n, b'ɔ sunmɛnnin i kɛ ɔ `yo tɛ nnɛn'n, ɔ kle kɛ sa tɛ b'ɔ ti klɔ sran nzuɛn'n ti tɛ, ɔ man sɛ ɔ wie'n, ɔ ti i su .

⁴ Nyanmiɛn yoli i sɔ nan e bɔ e fa-man sran'm be nzuɛn'n su kun'n, bɔ e yo sa nga Nyanmiɛn Wawɛ'n kle ye kɛ e yo'n, e yo sa kpa nga be klɛli i mmla'n nun kɛ e yo'n.

⁵ Afin be nga klɔ sran nzuɛn'n tɛ yo be fɛ'n, klɔ sran ninnge'n yɛ ɔ lo be-ɔ, sanngɛ be nga be ti Nyanmiɛn Wawɛ'n liɛ'n, i ninnge'n yɛ ɔ lo be-ɔ.

⁶ Be nga klɔ sran ninnge'n lo be'n, be ´wu, sanngɛ be nga Nyanmiɛn Wawɛ'n i ninnge'n lo be'n, be ´nyan nguan nin alaje.

⁷ Afin be nga klɔ sran ninnge'n lo be'n, be kpɔ Nyanmiɛn, be klo-man kɛ be fa Nyanmiɛn mmla'n su, yɛ kusu be kwla fa-man su bɔbɔ.

⁸ Yɛ be nga be nzuɛn'n ti klɔ sran liɛ'n, Nyanmiɛn klun jɔ-man bé wun.

⁹ Sanngɛ amun liɛ'n, sɛ Nyanmiɛn Wawɛ'n tran amun nun kɛ i awlo sa'n, amun nzuɛn'n ti-man klɔ sran liɛ kun, like ng'ɔ kle amun kɛ an yo'n yɛ an yo-ɔ. Sran ng'ɔ lɛ-man Krist i Wawɛ'n, ɔ ti-mɛn i liɛ.

¹⁰ Sɛ an ti Krist i awlo'n, wuun e wun i bue kun kɛ sa tɛ'n ti amu'an wu, i bue kun kusu e wun kɛ amun sran kpa b'ɔ kacili amun'n ti'n, i Wawɛ'n ɔ man amu'an nyan nguan.

¹¹ Nyanmiɛn b'ɔ cɛnnin Jésus'n i Wawɛ'n tran amun nun kɛ i awlo sa, i b'ɔ cɛnnin Krist-Jésus sɔ'n, ɔ man amun kusu bɔ amun wu'n, amun ´yo juejue i Wawɛ b'ɔ tran amun nun sɔ'n ti .

¹² I sɔ'n ti'n, aniaan mun, e ti mianfuɛ, sanngɛ e ti-man mianfuɛ kɛ e `yo klɔ sran nzuɛn ngba'n kun.

¹³ Afin sɛ an yo sa ng'ɔ ti klɔ sran nzuɛn'n, amun ´wu. Sanngɛ sɛ Nyanmiɛn Wawɛ'n i fanngan nun an wla amun nyoliɛ tɛtɛ'm be ase'n, amun ´nyan nguan.

¹⁴ Be kwlaa nga be fa atin nga Nyanmiɛn Wawɛ'n kle be su'n, be ti Nyanmiɛn wa.

¹⁵ Afin Nyanmiɛn i Wawɛ'n b'ɔ fa mannin amun'n, i liɛ'n, ɔ fa-man amun kaci-man kanga, yɛ ɔ wla-man amun srɛ, sanngɛ ɔ fa amun kaci kɛ Nyanmiɛn klun ba sa. I sɔ'n ti'n, e kwla kpan flɛ Nyanmiɛn kɛ: «Baba!»

¹⁶ Nyanmiɛn Wawɛ'n kle ye weiin kpa e anwlɛn'n nun kɛ e ti Nyanmiɛn i wa sakpa.

¹⁷ E ti i wa, ɔ man like ng'ɔ se kɛ ɔ ´fa mɛn i sran mun'n, e ´nyan wie, yɛ kusu like ng'ɔ se kɛ ɔ ´fa man Krist'n, be ´bo e dunman nun wie, sanngɛ san nyrɛnnɛn kunngba ng'ɔ wunnin i'n, e ´wun wie nan e nin i y'a nyan nyrun.

¹⁸ Kɛ m bu anyrunnyan like nga Nyanmiɛn wa yi i nglo kle ye'n i akunndan'n, m bu-man nyrɛnnɛn nga e wun i ndɛ'n i like fi.

¹⁹ Like nga Nyanmiɛn yili be'n, be kwlaa bé wun blibli be, yɛ be minndɛ cɛn nga Nyanmiɛn wa yi i mma'm be nglo'n.

²⁰ Afin like ng'ɔ yili be'n, ɔ sieli be kwlaa be kɛ be saci. Be sacilɛ sɔ'n fin-man be bɔbɔ, ɔ fin i b'ɔ sieli be sɔ'n . Sanngɛ bé wla tɛ wo i su,

²¹ yɛlɛ kɛ cɛn kun like sɔ'm be kwlaa be ´nyan be ti, be su saci-man kun, yɛ nyrun nga Nyanmiɛn mma'm be ´nyɛn i cɛn nga be ´nyan alaje'n, be dunman'n ´tɛ nun wie.

²² E si kɛ, kɛ ɔ fin lalaa lele b'ɔ ɔ'a fa ju ndɛ'n, like nga Nyanmiɛn yili be'n, be kwlaa be oto, yɛ be wun nyrɛnnɛn kɛ bla bɔ ɔ'a tran awuliɛ'n sa .

²³ Nán be ngunmin-ɔn, sanngɛ e bɔ Nyanmiɛn fɛ i Wawɛ'n b'ɔ ti like b'ɔ ´fa man ye'n i nun klikli'n, e kusu e oto, yɛ e minndɛ cɛn nga be ´wun kɛ e ti Nyanmiɛn wa sakpa'n, b'ɔ ´de ye b'ɔ ´kaci e wunnɛn nga'n .

²⁴ Nyanmiɛn su bɔ e lafi'n ti yɛ e si kɛ ɔ'a de ye-ɔ. Sanngɛ sɛ sran i nyin o like bɔ be waan be fa mɛn i'n i sin'n, sɛ ɔ nyɛn i'n, i nyin trɛn-mɛn i sin kun. ?Wan yɛ sɛ ɔ nyan like ng'ɔ kunndɛ'n, i nyin tɛ o like sɔ'n i sin ekun-ɔn?

²⁵ Sɛ é nyin o like bɔ be waan be ´fa man ye bɔ e nian wun-mɛn i'n i sin'n, e tra e anwlɛn e tran minndɛ.

²⁶ E lɛ-man fanngan, ɔ man Nyanmiɛn Wawɛ'n jran e sin ɔ uka ye, afin e si-man like nga e srɛ Nyanmiɛn kɛ ɔ fa man e b'ɔ ti i su'n. I Wawɛ'n bɔbɔ oto, ɔ jran é nuan ɔ srɛ i man ye.

²⁷ Nyanmiɛn b'ɔ si sran'm be anwlɛn nun'n, ɔ si akunndan ng'ɔ o i Wawɛ'n i klun'n, afin like nga Nyanmiɛn klo'n yɛ i Wawɛ'n srɛ man be nga be ti i liɛ mun-ɔn .

E tra safunyrɛn

²⁸ E si kɛ sa kwlaa nga b'ɔ ju'n, e bɔ e klo Nyanmiɛn b'ɔ flɛli e yɛlɛ kɛ ɔ bu ye akunndan sieli laa'n, e kpa yolɛ ti yɛ ɔ man sa sɔ'm be yo-ɔ.

²⁹ Afin e bɔ Nyanmiɛn dun mmua fali ye'n, ɔ sieli e kɛ e kaci kɛ i Wa'n ti'n sa, nan i Wa'n nyan niaan kpanngban, nan ɔ yo be nyrun kpɛn.

³⁰ Be ng'ɔ sieli be sɔ'n, ɔ flɛli be, yɛ be ng'ɔ flɛli be'n, ɔ buli be sran kpa, yɛ be nga ɔ buli be sran kpa'n, ɔ man be nyannin nyrun kɛ i liɛ'n sa.

³¹ ?Sɛ ɔ ti sɔ'n, nguɛ ndɛ yɛ e ´kɛn ekun-ɔn ? ?Sɛ Nyanmiɛn jin e sin'n, wan yɛ ɔ kwla yo e sa-a?

³² Nyanmiɛn bɔ ɔ'a sie-mɛn i sa i Wa'n su'n, b'ɔ fɛ i mannin e kwlaa e ti'n, ɔ ´fa like'n kwlaa uka su man e i klun-ufue su.

³³ ?Wan yɛ ɔ kwla saci be bɔ Nyanmiɛn fali be'n be dunman-an? Nyanmiɛn yɛ ɔ bu be sran kpa-a.

³⁴ ?Wan yɛ ɔ kwla se kɛ b'a di fɔ-ɔ? Krist-Jésus yɛ ɔ wuli-ɔ, kusu ɔ cɛnnin, ɔ o Nyanmiɛn i fama su, ɔ kpɛtɛ i man ye.

³⁵ ?Klolɛ nga Krist fa klo ye'n, nguɛ like yɛ man i nyin kwla tu e su-ɔ? ?Nyrɛnnɛn nin-ɔn? ?Mianlɛ nin-ɔn? ?Yalɛ klelɛ nin-ɔn? ?Awe nin-ɔn? ?E wun kplɛn nin-ɔn? ?Wie nuan jranlɛ nin-ɔn? ?Kunlɛ nin-ɔn?

³⁶ Afin be klɛli i kɛ: «Ɔ ti, be fa e jran wie'n nuan nglɛmun lele nnɔsua. Ɔ ti, be bu e kɛ bua bɔ be su ko kun i sa .»

³⁷ Kannzɛ sa sɔ'n kwlaa tɔ e su'n, Jésus b'ɔ kloli ye'n ti, e tra safunyrɛn.

^38-39 Afin n si kpa kɛ klolɛ nga Nyanmiɛn fa klo e b'ɔ man Jésus-Krist yi i nglo kle ye'n, like fi man i nyin kwla tu-man e su. Sɛ wie o, sɛ nguan o, sɛ anz mun o, sɛ mmusu mun o, sɛ bae o, sɛ blɛ nga nun ninnge mun o, sɛ cɛn wie ninnge mun o, sɛ nglo lɔ nin asiɛ'n su wa ninnge mun o, like fi nun-man lɛ b'ɔ man i nyin kwla tu e su-ɔ.