Rɔmfuɛ Mun 7 - NYANMIƐN NDƐ'N 1998

Bla nin bian aja'n ti nzɔliɛ kun

¹ Aniaan mun, an si ndɛ nga m ma kan kle amun yɛ'n, afin an si mmla'n, an si kɛ kɛ sran i nyin tɛ o su'n yɛ ɔ di mmla'n su-ɔ.

² I kunngba'n, bla nga ɔ'a ja bian'n, kɛ i wun'n i nyin tɛ o su'n, ɔ di aja'n i nun mmla'n su, sanngɛ sɛ yasua'n wu'n, ɔ di-man mmla'n b'ɔ o ɔ nin i wun be afiɛn'n su kun.

³ I sɔ'n ti, kɛ i wun'n i nyin tɛ o su'n, sɛ ɔ kaci yasua uflɛ i yi'n, be ´flɛ i bla b'ɔ kunndɛ bian i wun bo, sanngɛ sɛ i wun'n ko wu'n, ɔ di-man mmla sɔ'n su kun, ɔ man sɛ ɔ ja bian uflɛ'n, ɔ ti-man kɛ ɔ'a kunndɛ bian i wun bo.

⁴ Min niaan mun, amun kusu, sran wunmuan bɔ amun nin Krist amu'an kaci'n ti, amu'an wu, ɔ man amun nin mmla'n amu'an bu, yɛ amu'an yo sran uflɛ bɔ Nyanmiɛn cɛnnin i'n i liɛ. Sa sɔ'n yo sɔ nan e `yo sakpa man Nyanmiɛn.

⁵ Afin kɛ e nzuɛn'n tɛ yo klɔ sran liɛ'n, mmla'n bɔ e di su'n ti'n, akunndan tɛtɛ b'ɔ o ye anwlɛn nun'n ɔ man e yo sa nga i agualiɛ yɛlɛ wie'n.

⁶ Sanngɛ siɛn'n, e di-man mmla'n su kun yɛlɛ kɛ y'a wu, ɔ man like ng'ɔ tra e nun laa'n, e nin i y'a bu. I sɔ'n ti'n, ɔ man e su Nyanmiɛn i sulɛ wafa uflɛ nga i Wawɛ'n kle ye'n su, e su-mɛn i sulɛ wafa laa liɛ nga be klɛli mmla nun'n su kun.

Mmla'n nin sa tɛ'n

⁷ ?Ɔ man e ´se sɛ? ?E ´se kɛ mmla'n ti sa tɛ? Ɔ ti-man sɔ mlɔnmlɔn! Afin sɛ ɔ ti-man mmla'n ti'n, wuun n si-man kɛ sa tɛ'n ti tɛ, yɛlɛ kɛ sɛ ɔ ti-man kɛ be klɛli i mmla'n nun kɛ: «Nán ɔ́ nyin blo ɔ wiengu like su'n,» wuun n si-man like nga be flɛ i kɛ bé nyin blo like su'n .

⁸ Kɛ mmla kun sɔ'n wo lɛ'n, sa tɛ b'ɔ ti min nzuɛn'n yɛ man min nyin blo like fanunfanun'n kwlaa su nin-ɔn, afin sɛ mmla'n nun-man lɛ'n, be bu-man sa tɛ'n like fi.

⁹ Laa bɔ n di-man mmla'n su'n, n wo lɛ, sanngɛ kɛ mmla kun sɔ'n bali'n, yɛ man be bu sa tɛ'n like

¹⁰ yɛ n wuli-ɔ. Yɛ mmla kun sɔ'n b'ɔ o lɛ kɛ sran `nyan nguan'n, n wunnin kɛ ɔ ti n wie like .

¹¹ Sɛ n kwla se kɛ sa tɛ b'ɔ ti min nzuɛn'n ti sran'n, wuun n ´se kɛ mmla kun sɔ'n ti like bɔ sa tɛ ɔ'a fa laka min a kun min.

¹² I sɔ'n ti'n, mmla wunmuan'n ti Nyanmiɛn liɛ, yɛ mmla kun sɔ'n kusu ti Nyanmiɛn liɛ. Mmla kun sɔ'n i sielɛ'n ti su, ɔ ti kpa.

¹³ ?Ɔ man like ng'ɔ ti kpa'n yɛ man n nyannin wie nin-ɔn? Ɔ ti-man sɔ mlɔnmlɔn! Sɛ sa tɛ'n ti sran'n, wuun n ´se kɛ i yɛ ɔ fa like kpa sɔ'n yo like b'ɔ man n nyannin wie nin-ɔn, ɔ man ɔ kle kɛ sa tɛ'n ti tɛ. Kɛ ɔ ´yo sɔ'n, ɔ fa mmla kun sɔ'n kle weiin kɛ sa tɛ'n ti tɛ sakpa.

¹⁴ E si kɛ mmla'n ti Nyanmiɛn Wawɛ'n i like, sanngɛ n liɛ'n, n ti klɔ sran, sɛ sa tɛ b'ɔ ti min nzuɛn'n ti sran'n, wuun n ´se kɛ b'a yo min atɛ i sa nun.

¹⁵ Nanwlɛ, sa nga n yo be'n, n wun-mɛn i wlɛ, like nga n klo kɛ n ´yo be'n, nán be yɛ n yo be-ɔ, sanngɛ like nga n klo-man be'n yɛ n yo be-ɔ.

¹⁶ Sɛ n yo like nga n klo-man kɛ n yo be'n, n wun kɛ mmla'n ti kpa.

¹⁷ I sɔ'n nun'n, like nga n yo be'n, nán min nyinfu-ɔ, sanngɛ sa tɛ b'ɔ ti min nzuɛn'n yɛ man n yo be-ɔ.

¹⁸ Afin n si kɛ, klɔ sran bɔ n ti'n ti, min nzuɛn fi ti-man kpa, yɛlɛ kɛ sa kpa yolɛ'n wo min anwlɛn'n nun, sanngɛ n kwlɛ-mɛn i yo.

¹⁹ Sa kpa nga n klo kɛ n ´yo'n, n yo-man, sanngɛ sa nga n klo-man kɛ n ´yo'n, yɛ n yo-ɔ.

²⁰ I sɔ'n ti'n, sɛ n yo like nga n klo-man kɛ n yo'n, nán min nyinfu-ɔ, sanngɛ sa tɛ b'ɔ ti min nzuɛn'n yɛ man n yo-ɔ.

²¹ Ɔ man m'an sie i nzɔliɛ kɛ cɛn kwlaa kɛ n klo kɛ n ´yo sa kpa'n, kpɛkuun sa tɛ'n jin m bue.

²² Nyanmiɛn mmla'n i sufalɛ'n yo n fɛ min anwlɛn'n nun,

²³ sanngɛ n wun kɛ sa uflɛ o lɛ. Min nzuɛn b'ɔ man n yo sa tɛ'n, ɔ nin akunndan nga b'ɔ man n klo kɛ n ´yo sa kpa'n, be ti kɛ sran nnyɔn bɔ be si akplowa sa, lele n fa tɛfuɛ'n su, ɔ man n kaci sa tɛ yofuɛ mlɔnmlɔn.

²⁴ Eee, n ti nyrɛnnɛnfuɛ dan! ?Wan yɛ ɔ ´tu min nzuɛn nga b'ɔ man n ´wu'n, i su-ɔ?

²⁵ Nyanmiɛn kwla o! Afin i yɛ man e Min Jésus-Krist deli ye-ɔ. Kɛ n nian'n, n wun i bue kun kɛ min akunndan'n nun n fa Nyanmiɛn mmla'n su, sanngɛ i bue kun kusu n wun kɛ klɔ sran bɔ n ti'n ti, n yo sa tɛ.