Rɔmfuɛ Mun 6 - NYANMIƐN NDƐ'N 1998

Sa tɛ'n ti e wuli, Krist ti y'a nyan nguan

¹ ?Ɔ man e ´se sɛ? ?E ka sa tɛtɛ yolɛ'n su nan Nyanmiɛn i aklunye'n i nyin fite dan?

² E su yo-mɛn i sɔ mlɔnmlɔn! ?Sa tɛ'n, kɛ e wuli bɔ e nin i a bu'n, ɔ ´yo sɛ yɛ e ´yo i ekun-ɔn?

³ ?An si-man kɛ e kwlaa nga be yoli e batɛm nan e nin Krist-Jésus e kaci sran wunmuan'n, kɛ ɔ wuli'n e o nun wie?

⁴ I sɔ'n ti'n, kɛ e nin Krist e wuli e batɛm yolɛ sɔ'n nun bɔ be sieli ye nin i'n, ɔ man kɛ e Si Nyanmiɛn cɛnnin i'n, e kusu e ´cɛn e ´nanti ajalɛ uflɛ su .

⁵ Afin sɛ e nin i kaci sran wunmuan e wie'n b'ɔ ti kɛ i liɛ'n sa'n ti'n, i kunngba'n, e nin i e ´kaci sran wunmuan e cɛnlɛ'n b'ɔ ti kɛ i liɛ'n sa'n ti.

⁶ E si kpa kɛ be boboli e wafa nga e ti laa'n nin i waka'n su kɛ ɔ yo sɔ nan e nzuɛn tɛtɛ'n ɔ wie nan nán man sa tɛtɛ'n yo e nzuɛn kun.

⁷ Afin kɛ sran'n ko wu'n, i ndɛ nun-man sa tɛ yolɛ nun kun.

⁸ Sɛ e nin Krist yɛ e wuli'n, e lafi su kpa kɛ e nin i yɛ e ´tran kusu-ɔ.

⁹ E si kɛ kɛ Krist cɛnnin'n, ɔ su wu-man kun, yɛ e si kɛ wie'n kwlɛ-mɛn i kun.

¹⁰ Afin kɛ ɔ wuli'n, ɔ nin sa tɛ'n be buli mlɔnmlɔn, yɛ olɛ ng'ɔ o lɛ siɛn'n, ɔ o Nyanmiɛn dunman nun.

¹¹ I sɔ'n ti'n, amun nin Krist-Jésus amun sran wunmuan bɔ amu'an kaci'n ti, amun kusu an `bu amun wun kɛ an wuli, ɔ man amun nin sa tɛ'n amu'an bu, yɛ an wo Nyanmiɛn dunman nun.

¹² I sɔ'n ti'n, amun bɔ amun wu'n nán an fa sa tɛ'n cici amun ti kun, yɛ nán an yo sa tɛtɛ nga amun konvi sɔ be'n.

¹³ Nán an fa amun wunnɛn'n i bue kaan sa man ɔ yo sa tɛ'n i junman like, sanngɛ amun bɔ an ti kɛ sran bɔ b'a wu b'a cɛn sa'n, an `fa amún wun man Nyanmiɛn, man amun wunmuan'n yo i junman like b'ɔ fa yo sa kpa.

¹⁴ An su fa-man amún wun man-man sa tɛ yolɛ'n, afin Nyanmiɛn jran-man mmla'n su yɛ ɔ sie amun kun-ɔn, sanngɛ ɔ yo amun ye titi.

Sa kpa'n yɛ ɔ'a kaci e nzuɛn-ɔn

¹⁵ ?Sɛ ɔ ti sɔ'n, e ´yo i sɛ? ?Kɛ Nyanmiɛn jran-man mmla'n su yɛ ɔ sie ye'n, b'ɔ yo e ye titi'n, i sɔ'n ti e ´yo sa tɛ? E su yo-mɛn i sɔ mlɔnmlɔn!

¹⁶ ?An si-man kɛ sɛ an fa amún wun man sran kun bɔ an kaci i sran'n bɔ amún nyin yi i'n, wuun an ti i kanga? Ɔ man an kwla fa amún wun man sa tɛ yolɛ bɔ i agualiɛ yɛlɛ wie'n annzɛ anyinyiɛ bɔ amun fa man Nyanmiɛn bɔ i agualiɛ yɛlɛ sran i sran kpa kacilɛ'n.

¹⁷ N ´yo Nyanmiɛn i kwla o, afin laa'n, sa tɛ'n ti amun nzuɛn, sanngɛ siɛn'n, amu'an fa ndɛ nanwlɛ nga be kleli amun'n su kpa.

¹⁸ Nyanmiɛn deli amún nzuɛn tɛtɛ'n nun, sa kpa'n yɛ ɔ'a kaci amun nzuɛn-ɔn.

¹⁹ Klɔ sran bɔ amun ti bɔ amun anwlɛn sɔ-man'n ti yɛ n fa sran akunndan n kɛn i sɔ-ɔ. Laa'n, an fa amun wun mannin sa tɛtɛ yolɛ'n nin mmla tɔnlɛ'n nan amun ´yo sa sukusuku mun, ɔ man siɛn'n, an `fa amun wun man sa kpa yolɛ'n nan an `fa Nyanmiɛn i nzuɛn'n.

²⁰ Afin i nun'n bɔ sa tɛ'n ti amun nzuɛn'n, amun ndɛ nun-man sa kpa yolɛ'n nun.

²¹ ?Sa nga an yoli be laa bɔ siɛn'n be yo amun nyannzuɛn'n, nguɛ like yɛ an nyɛnnin i nun-ɔn? Sa sɔ'm be agualiɛ'n yɛlɛ wie.

²² Sanngɛ siɛn'n bɔ Nyanmiɛn a de amún nzuɛn tɛtɛ'n nun bɔ amu'an kaci i kanga'n, like nga an nyɛn i nun'n yɛlɛ Nyanmiɛn nzuɛn bɔ an fa'n, bɔ i agualiɛ yɛlɛ anannganman nguan'n.

²³ Afin sa tɛ'n i akatua'n yɛlɛ wie, sanngɛ like nga Nyanmiɛn fa cɛ ye'n yɛlɛ anannganman nguan'n bɔ e nyɛn i e Min Krist-Jésus bɔ e nin i y'a kaci sran wunmuan'n ti'n.