Rɔmfuɛ Mun 5 - NYANMIƐN NDƐ'N 1998

Sa nga kɛ Nyanmiɛn bu sran sran kpa'n ɔ yo mɛn i'n

¹ I sɔ'n ti, Nyanmiɛn a bu ye sran kpa i su bɔ e lafi'n ti, ɔ man siɛn'n e Min Jésus-Krist ti e nin i e afiɛn a sɛ.

² I yɛ man e sili kɛ Nyanmiɛn yo e ye-ɔ, i su bɔ e lafi'n ti siɛn'n e su di ye sɔ'n. Anyrunnyan bɔ Nyanmiɛn waan ɔ ´man e bɔ é nyin wo i sin'n ti, é wun blibli ye.

³ Nɛ́n i sɔ ngunmin ti yɛ é wun blibli ye-ɔ, sanngɛ sa ng'ɔ tɔ e su'n kusu ɔ man e klun jɔ ekun, afin e si kɛ nyrɛnnɛn wunlɛ'n man e kaci sran bɔ e tra e anwlɛn,

⁴ yɛ e anwlɛn tralɛ sɔ'n nun e yo yakpa, yɛ e yakpa sɔ'n ti yɛ e fa é wla'n gua Nyanmiɛn su-ɔ.

⁵ Yɛ é wla bɔ e fa gua Nyanmiɛn su'n ti é nyin su gua-man ase, afin Nyanmiɛn man i Wawɛ b'ɔ fa mannin ye'n kle ye klolɛ dan nga Nyanmiɛn bɔbɔ fa klo ye'n ye anwlɛn'n nun weiin.

⁶ Afin kɛ e bɔbɔ e nian kwla yo-man sa fi'n, kɛ blɛ nga Nyanmiɛn sieli juli'n, be nga be sro-mɛn i'n be ti Krist wuli.

⁷ Kɛ sran kun wu sran kpa kun ti'n, i sɔfuɛ'n i nyanlɛ ti kekle, sanngɛ wienun-ɔn sran wie ´trɛ i anwlɛn wu sran klun-ufuefuɛ kun ti.

⁸ Sanngɛ Nyanmiɛn kle ye kɛ ɔ klo e, afin kɛ e ti sa tɛ yofuɛ'n, e ti ɔ man Krist wuli.

⁹ I sɔ'n ti'n, sɛ ndɛ i mmoja'n ti Nyanmiɛn a bu ye sran kpa'n, cɛn nga Nyanmiɛn i ya'n jao'n, i ti e ´nyan é ti kpɛ blu.

¹⁰ Afin sɛ laa bɔ e ti Nyanmiɛn i kpɔfuɛ'n b'ɔ fɛ i Wa'n siesieli ye afiɛn'n, siɛn'n bɔ e nin i ye afiɛn a sɛ'n, i Wa'n i nyin b'ɔ o su'n ti ɔ ´de é kpɛ blu.

¹¹ Nán é delɛ sɔ'n ngunmin ti-ɔ, sanngɛ Nyanmiɛn man e klun jɔ e Min Jésus-Krist bɔ i fanngan nun yɛ e nin Nyanmiɛn ye afiɛn a sɛ siɛn'n ti .

Adam nin Krist

¹² I sɔ'n ti, an `nian: Sran kun ti yɛ sa tɛ yolɛ'n bali mɛn nun-ɔn, yɛ sa tɛ sɔ'n ti yɛ man wie'n bali-ɔ. Yɛ i ti yɛ man wie'n wo sran'm be kwlaa be su-ɔ, afin be kwlaa be yo sa tɛ.

¹³ Kɛ Nyanmiɛn ´fɛ i mmla'n man'n, wuun sa tɛ'n wo mɛn'n nun wa, sanngɛ i nun bɔ mmla nun-man lɛ'n, be bu-man sa nga sran yo'n kɛ ɔ ti tɛ.

¹⁴ Sanngɛ kɛ ɔ fin Adam blɛ su lele fa ju Moiz blɛ su'n, kannzɛ sa nga sran wie'm be yoli'n ɔ ti-man kɛ Adam b'ɔ tɔnnin mmla'n i liɛ'n sa'n, sanngɛ wie'n kwla be kwlaa. Kɛ be nian Adam sɔ'n, be wunnin ng'ɔ wa ba'n i wafa .

¹⁵ Sanngɛ sa nga Adam yoli'n nin like dan nga Nyanmiɛn fa cɛ ye'n, be dan sɛ-man. Nanwlɛ, sran kpanngban b'a wu sran kun i sa liɛ'n b'ɔ yoli'n ti. Sanngɛ ye nga Nyanmiɛn yo ye'n i dan trɛ fatifati, yɛ like ng'ɔ fa cɛ sran kpanngban i aklunye'n ti'n i kusu i kpa trɛ i. Like sɔ'n yɛlɛ Jésus-Krist.

¹⁶ Like nga Nyanmiɛn fa cɛ'n, ɔ nin sa nga sran kunngba yoli'n, be agualiɛ ti-man kun. Afin sa nga sran kun sɔ'n yoli'n ɔ man Nyanmiɛn bu sran'm be fɔ, sanngɛ kusu like nga Nyanmiɛn fa cɛ ye'n ti, ɔ man ɔ bu be bɔ be yoli sa tɛ kpanngban kpa'n be sran kpa.

¹⁷ Nanwlɛ, sran kunngba i sa ng'ɔ yoli'n ti, wie'n kwla sran'm be kwlaa sran kunngba sɔ'n ti. Sanngɛ sa kpa nga Jésus-Krist kusu yoli'n ɔ ti dan kpa trɛ i, afin be kwlaa nga Nyanmiɛn yoli be ye b'ɔ kacili be sran kpa'n, be ´nyan nguan yɛ be ´di famiɛn Krist fanngan nun.

¹⁸ I sɔ'n ti'n, kɛ Nyanmiɛn fa sran kunngba i sa ng'ɔ yoli'n i lɔnglɛ cili sran'm be kwlaa'n, i kunngba'n, sran kunngba kusu i sa kpa ng'ɔ yoli'n ɔ man Nyanmiɛn bu sran'm be kwlaa be sran kpa, ɔ man be ´nyan nguan.

¹⁹ Kɛ sran kunngba i nyin kekle'n ti ɔ man sran kpanngban be kacili sa tɛ yofuɛ'n, sran kun kusu i anyinyiɛ ti, ɔ man sran kpanngban be ´kaci sran kpa.

²⁰ Kɛ ɔ ´yo nan sa tɛtɛ'n ɔ'a sɔn'n, i ti yɛ mmla'n ɔ'a kpɛn afiɛn lɛ-ɔ, sanngɛ lika nga be yo sa tɛtɛ kpanngban lɛ'n, lɛ yɛ Nyanmiɛn i aklunye'n i nyin fite dan-an.

²¹ Ɔ man kɛ sa tɛtɛ'n yo sran'm be nzuɛn lele ɔ man be wu'n, i kunngba'n, Nyanmiɛn i aklunye'n ɔ man sa kpa'n kaci be nzuɛn lele be ´nyan anannganman nguan e Min Jésus-Krist fanngan nun.