Rɔmfuɛ Mun 4 - NYANMIƐN NDƐ'N 1998

Sa nga Abraam yoli bɔ e nian su'n

¹ ?Sɛ ɔ ti sɔ'n, e ´kan e nannan Abraam i liɛ'n sɛ? ?Nzu yɛ ɔ nyɛnnin i-ɔ?

² Afin sɛ Nyanmiɛn buli Abraam sran kpa i sa kpa b'ɔ yoli'n ti'n, wuun ɔ lɛ like b'ɔ fa di i nuan-an. Sanngɛ ɔ kwla di-mɛn i nuan Nyanmiɛn nyrun,

³ afin e kɛnngɛn i Nyanmiɛn Ndɛ nga be klɛli'n nun kɛ: « Abraam lafili Nyanmiɛn su, ɔ man i su b'ɔ lafi'n ti, ɔ buli i sran kpa .»

⁴ Sɛ sran kun di junman'n, i kalɛ nga be fa tuɛ i'n be bu-mɛn i kɛ like bɔ b'a fa cɛ i-ɔ, sanngɛ i akatua-a.

⁵ Sanngɛ sran ng'ɔ yo-man like fi nan ɔ lafi Nyanmiɛn b'ɔ bu sran b'ɔ sro-mɛn i'n i sran kpa'n i su'n, ɔ kaci sran sɔ'n i sran kpa i su b'ɔ lafi'n ti.

⁶ I kunngba'n David kɛnnin i kɛ sran nga Nyanmiɛn niɛn-mɛn i nyoliɛ'n su yɛ ɔ bu i sran kpa'n, i liɛ su ti ye. Ɔ se kɛ:

⁷ «Be nga be tɔn mmla'n bɔ Nyanmiɛn yaci cɛ be'n, b'ɔ kata bé sa nga be yoli i'n su'n, be liɛ su ti ye!

⁸ Sran nga e Min Nyanmiɛn'n bu-mɛn i sa b'ɔ yo i'n i akunndan kun'n, i liɛ su ti ye !»

⁹ ?Ye sɔ'n, ɔ ti be nga be wlali be klɛn'n be ngunmin be liɛ annzɛ ɔ ti be nga b'a wla-man be klɛn'n be kusu be liɛ wie? Afin e se kɛ: «Nyanmiɛn su bɔ Abraam lafi'n ti ɔ man ɔ bu i sran kpa.»

¹⁰ ?Kɛ ɔ ´bu i sɔ'n, wuun ɔ ti sɛ? ?B'a wlɛ i klɛn annzɛ be nian wlɛ-mɛn i klɛn? Wuun be nian wlɛ-mɛn i klɛn.

¹¹ Nyanmiɛn dun mmua buli i sran kpa i su b'ɔ lafi'n ti, i sin yɛ be wlɛli i klɛn-ɔn. Ɔ fa klɛn wlalɛ sɔ'n sieli Abraam nzɔliɛ b'ɔ ti like nga ɔ'a dun mmua yo i'n i lalofuɛ. Be kwlaa nga kannzɛ b'a wla-man be klɛn'n, ɔ bu be kusu be sran kpa wie'n, i su bɔ be lafi'n ti'n, ɔ yoli sɔ nan Abraam yo bé si.

¹² Yɛ be nga be wlali klɛn bɔ be lafi-man be klɛn wlalɛ'n ngunmin su'n, bɔ sanngɛ be nanti ajalɛ kunngba nga Abraam nantili su'n kɛ ɔ nian wla-man klɛn'n ɔ lafi Nyanmiɛn su'n i su wie'n, ɔ ti bé si wie kusu.

Sa nga Nyanmiɛn waan ɔ ´yo man ye i su bɔ e lafi'n ti'n

¹³ Nyanmiɛn seli Abraam kɛ mɛn'n ɔ ´yo i nin osu nunfuɛ'm be liɛ. Nán mmla'n b'ɔ fa su'n ti yɛ ɔ seli i sɔ-ɔ, sanngɛ i bɔbɔ Nyanmiɛn i su b'ɔ lafi b'ɔ i kusu bu i sran kpa'n ti yɛ ɔ seli i sɔ-ɔ .

¹⁴ Sɛ be nga be di mmla su'n be yɛ be ´nyan like nga Nyanmiɛn seli kɛ ɔ ´fa man'n, wuun Nyanmiɛn sulafilɛ'n ɔ ti ngbɛn, yɛ kusu wuun like ng'ɔ seli kɛ ɔ ´yo'n, ɔ kɛnnin i ngbɛn.

¹⁵ Mmla'n yɛ man sran kun Nyanmiɛn ya-a, afin sɛ mmla'n nun-man lɛ'n, wuun be tɔn-man.

¹⁶ I sɔ'n ti'n, like nga Nyanmiɛn waan ɔ ´fa man be'n, ɔ fa man be i su bɔ be lafi'n nin ye dan b'ɔ yo be'n ti, ɔ man sa nga Nyanmiɛn seli kɛ ɔ ´yo'n, san ɔ ´yo man Abraam i osu nunfuɛ'm be kwlaa. Ɔ ti-mɛn i osu nunfuɛ nga be di mmla'n su'n be ngunmin be liɛ, sanngɛ i mma mun nin i anunman nga be lafi Nyanmiɛn su kɛ i b'ɔ ti e kwlaa e nannan'n i liɛ'n sa'n, ɔ ti be liɛ wie.

¹⁷ Afin be klɛli i kɛ: « M man a ´yo nvle kpanngban kpa bé si.» Nyanmiɛn b'ɔ lafi i su'n b'ɔ cɛn sran nga ɔ'a wu'n, b'ɔ bo like nga be nun-man lɛ'n be dunman kɛ like bɔ be o lɛ sa'n, i nyrun'n, ɔ ti é si .

¹⁸ Abraam lɛ-man like fi b'ɔ kwla fɛ i wla'n gua su-ɔ, kannzɛ ɔ ti sɔ'n, ɔ fɛ i wla'n guali Nyanmiɛn su, ɔ lafi ndɛ nga Nyanmiɛn kannin'n su, ɔ seli kɛ: «Kɛ ɔ osu nunfuɛ'm be wa sɔn kpanngban sɔ-ɔ.» Ɔ man ɔ yoli nvle kpanngban kpa bé si.

¹⁹ Kɛ be wuli i'n, i blɛ sɔ nun wuun ɔ su wa di afuɛ ya. Kɛ ɔ buli oke bɔ ɔ'a yo'n ɔ nin Sara i ba wulɛ bɔ ɔ'a sin'n i akunndan'n, ɔ nin i sɔ'n ngba, ɔ'a yi-mɛn i wla'n Nyanmiɛn su .

²⁰ Kɛ ɔ buli like nga Nyanmiɛn seli i kɛ ɔ ´yo'n i akunndan'n, i akunndan'n ɔ'a yo-man nnyɔn-nnyɔn, sanngɛ ɔ jrannin kekle Nyanmiɛn su b'ɔ lafi'n ti, yɛ ɔ mɛnmɛnnin i.

²¹ I wla trannin su kpa kɛ like nga Nyanmiɛn seli i kɛ ɔ ´yo'n, ɔ kwla yo.

²² I sɔ'n ti yɛ i su b'ɔ lafi'n ti, ɔ buli i sran kpa nin-ɔn.

²³ Nɛ́n i ngunmin ti yɛ be klɛli i kɛ ɔ buli i sran kpa nin-ɔn,

²⁴ sanngɛ e bɔ e lafi Nyanmiɛn b'ɔ cɛnnin e Min Jésus'n b'ɔ su wa bu e sran kpa wie'n i su'n, e liɛ o nun wie.

²⁵ Nyanmiɛn yili i kɛ ɔ wa wu sa nga e yoli'n ti, yɛ e sran kpa bulɛ ti yɛ ɔ cɛnnin i-ɔ .