Rɔmfuɛ Mun 3 - NYANMIƐN NDƐ'N 1998

¹ ?Sɛ ɔ ti sɔ'n, kɛ be se kɛ be ti Zuif'n, nguɛ like yɛ be nyɛn i b'ɔ tra sran wie'm be liɛ nin-ɔn? ?Yɛ nguɛ like yɛ be nyɛn i klɛn wlalɛ nun-ɔn?

² Like'n kwlaa nun, nga be nyɛn i'n tra sran wie'm be liɛ'n. Afin be yɛ Nyanmiɛn fɛ i ndɛ'n mannin be-ɔ.

³ ?Ɔ man e ´se sɛ? ?Sɛ sran wie'm be lafi-man Nyanmiɛn su'n, i su bɔ be lafi-man'n ti'n, ɔ man i nanwlɛfuɛ b'ɔ ti'n ɔ ´kaci?

⁴ Ɔ su yo-man sɔ mlɔnmlɔn! Kannzɛ sran'm be kwlaa be yo atofuɛ'n, sanngɛ Nyanmiɛn liɛ'n, san nanwlɛ yɛ ɔ di-ɔ! Afin be klɛli i kɛ: «Kɛ a kan ndɛ'n, san be ´wun kɛ ɔ ndɛ'n yo fɛ, yɛ kɛ be ´di ɔ jɔlɛ'n, san ɔ ndɛ'n ´kwla be nga a nin be kan ndɛ'n .»

⁵ ?Sɛ sa tɛ nga e yo'n man be wun kɛ Nyanmiɛn ti kpa'n, e ´se sɛ? ?Yɛ sɛ i ya'n jao'n, e ´se kɛ ɔ ti-man kpa? Klɔ sran akunndan yɛ n fa kɛn i sɔ-ɔ.

⁶ Ɔ ti-man sɔ mlɔnmlɔn! ?Afin sɛ Nyanmiɛn di-man nanwlɛ'n, ɔ yo sɛ yɛ ɔ kwla di mɛnfuɛ'm be jɔlɛ-ɔ?

⁷ ?Sanngɛ sɛ min ato'n man be wun i weiin kpa kɛ Nyanmiɛn di nanwlɛ b'ɔ i nun ɔ nyan dunman'n, ɔ yo sɛ ti yɛ be tɛ bu min sa tɛ yofuɛ-ɔ?

⁸ ?Yɛ nguɛ ti yɛ e se-man kɛ: «Man e yo sa tɛtɛ nan i agualiɛ'n ɔ gua e kpa-a?» Sran wie'm be saci n dunman kɛ kɛ n se sɔ-ɔ. Sɛ be se kɛ sran sɔ'm b'a di fɔ'n, ɔ ti su.

Sran fi ti-man kpa

⁹ ?Sɛ ɔ ti sɔ'n, e ´yo i sɛ? ?E Zuif mun e ti kpa tra sran nga mun? Ɔ ti-man sɔ mlɔnmlɔn! Afin y'a dun mmua se kɛ sa tɛ'n ɔ'a ka sran'm be kwlaa be nun, Zuif mun o, sran wie mun o.

¹⁰ Afin be klɛli kɛ: «Sran kpa bɔ kun sa nun-man lɛ, ɔ lɛ-man be nun bɔ kun.

¹¹ Be nun kun sa fɛ-mɛn i wun mantan-man Nyanmiɛn.

¹² Be kwlaa b'a yaci Nyanmiɛn atin'n, be kwlaa b'a saci. Be nun wie fi yo-man sa kpa bɔ kun. Ɔ lɛ-man be nun bɔ kun .

¹³ Be klun lɔ'n ti kɛ ndia bɔ b'a tike su'n sa. Be fa bé nuan'n yɛ be laka sran mun-ɔn. Bé nuan nun ndɛ'n ti kɛ wuo bɔyre sa .

¹⁴ Amuɛnnwua'n nin ndɛ tɛtɛ'n wo bé nuan nun .

¹⁵ Kɛ be ti sran kunlɛ ngan'n, be jran-an ɔ jran-man.

¹⁶ Lika kwlaa nga be sin lɛ'n, be wun bé sa osu.

¹⁷ Be si-man atin nga be sin su-ɔ be nyan alaje'n .

¹⁸ Nyanmiɛn ti-man like fi be nyrun, ɔ man be nyin yi-mɛn i.»

¹⁹ E si kɛ ndɛ ng'ɔ o mmla nun'n i kwlaa ɔ ti be nga be di su'm be liɛ, ɔ man sran fi su kwla uke-mɛn i nuan, sanngɛ be ´fa sran'm be kwlaa kɔ Nyanmiɛn ja su.

²⁰ Nyanmiɛn su bu-man sran fi sran kpa i mmla'n su falɛ'n ti, afin mmla'n ti yɛ man be si like nga be flɛ i kɛ sa tɛ nin-ɔn .

Jésus-Krist i su lafilɛ b'ɔ man Nyanmiɛn bu sran sran kpa'n

²¹ Sanngɛ siɛn'n, Nyanmiɛn kle ye wafa ng'ɔ fa bu sran sran kpa'n, b'ɔ fin-man mmla'n nun'n, afin be klɛli i mmla'n nun yɛ Nyanmiɛn nuan ijɔfuɛ'm be kɛn i ndɛ kɛ,

²² Nyanmiɛn bu be kwlaa nga be lafi Jésus-Krist su'n be sran kpa, afin i nyrun'n, sran fi kpa tra-man wie.

²³ Afin sran'm be kwlaa be yoli sa tɛ, ɔ man anyrunnyan nga Nyanmiɛn waan ɔ ´man be'n, ɔ to fuannin be.

²⁴ Sanngɛ Nyanmiɛn bu be sran kpa ɔ de-man be like fi i klun-ufue dan'n ti. Ɔ buli be sran kpa Krist-Jésus i delɛ b'ɔ deli be'n ti.

²⁵ Kɛ ɔ ´yo nan y'a si kɛ ɔ ti kpa'n ti'n, ɔ fa Jésus mannin kɛ ɔ ´fa yi e ti tɛ nan kɛ be ko kun i'n, be bɔ be lafi i su'n, sa tɛ nga be yoli'n, ɔ `yaci cɛ be Jésus mmoja'n ti. Afin laa sa nga be yoli i'n, ɔ blu su.

²⁶ Sanngɛ olɛ nga e o yɛ'n, ɔ kle ye wafa ng'ɔ fa bu sran sran kpa'n, afin ɔ kle i wun kɛ ɔ ti kpa yɛ ɔ bu be nga be lafi Jésus su'n be sran kpa.

²⁷ ?Sɛ ɔ ti sɔ'n, nguɛ su yɛ e jran fa di é nuan-an? E lɛ-mɛn i sɔ like mlɔnmlɔn! ?Nguɛ ti yɛ e lɛ-mɛn i sɔ like nin-ɔn? ?Mmla'n b'ɔ man e si like nga e yo'n ti-ɔ? Cɛcɛ, Nyanmiɛn bɔ e lafi i su'n ti-ɔ.

²⁸ Afin e bu i kɛ nán mmla'n bɔ sran fa su'n ti yɛ Nyanmiɛn bu i sran kpa-a.

²⁹ ?Nyanmiɛn'n ti Zuif'm be ngunmin be liɛ? ?Ɔ ti-man be nga be ti-man Zuif'm be liɛ wie? Ɔ ti be liɛ wie,

³⁰ afin be nga be lafi i su'n sɛ be wlali be klɛn o, sɛ b'a wla-man be klɛn o, Nyanmiɛn kunngba'n yɛ ɔ bu be sran kpa-a .

³¹ ?Nyanmiɛn su bɔ be lafi sɔ'n ti, ɔ man e bu-man mmla'n i like fi kun? E bu-mɛn i sɔ mlɔnmlɔn! Siɛn'n e bu i like dan tra laa'n.