Rɔmfuɛ Mun 2 - NYANMIƐN NDƐ'N 1998

Jɔlɛ nga Nyanmiɛn di'n

¹ I sɔ'n ti'n, amun kwlaa bɔ an bu sran fɔ'n, an lɛ-man ndɛ fi. Afin kɛ an bu sran fɔ bɔ an yo sa kunngba nga sran sɔ'n yo'n, an bu amun bɔbɔ amun wun fɔ.

² E si kɛ Nyanmiɛn di be nga be yo i sɔ sa'n be jɔlɛ nanwlɛ su.

³ ?Amun bɔ an bu sran fɔ i sɔ sa'n ti'n bɔ sanngɛ an yo sa kunngba'n, an bu kɛ Nyanmiɛn su bu-man amun fɔ wie?

⁴ Nyanmiɛn ti aklunyefuɛ dan kpa, ɔ kpli-man sa wun, ɔ blu sa su. ?Ɔ nin i sɔ'n ngba'n, an bu-man i sɔ b'ɔ ti'n i like fi? ?An si-man kɛ Nyanmiɛn yo sa kpa nan an kaci amun nzuɛn'n?

⁵ Amún nyin kekle'n nin sa nga an yoli bɔ an yaci-mɛn i yolɛ'n, Nyanmiɛn bu sie. Ɔ man cɛn nga i ya'n jao bɔ e ´wun kɛ ɔ di jɔlɛ nanwlɛ su, ɔ ´fa amun wun ya kpa,

⁶ yɛ like nga sran kun yoli'n, ɔ ´mɛn i nuan like .

⁷ Be nga be tra be anwlɛn be yo sa kpa'n, bɔ be kunndɛ kɛ be nyan nyrun nan be bu be sran'n, bɔ be kunndɛ nguan'n, ɔ ´man be anannganman nguan.

⁸ Be nga kusu bɔ be bu be bɔbɔ be wun akunndan'n, bɔ be bu-man sran uflɛ akunndan'n, bɔ be fa-man nanwlɛ ndɛ'n su'n, bɔ sa tɛ'n yɛ be klo i'n, ɔ ´fa be wun ya dan i anwlɛn su bɔ be fita'n ti.

⁹ Be kwlaa nga be yo sa tɛtɛ'n, yalɛ klelɛ'n ´tɔ be su, yɛ be ´wun nyrɛnnɛn dan, Zuif'm be yɛ be ti i klikli-ɔ, i sin be nga mun.

¹⁰ Sanngɛ be kwlaa nga be yo sa kpa'n, Nyanmiɛn man be ´nyan nyrun, be ´bu be sran, yɛ be ´di alaje, Zuif mun yɛ be ti klikli-ɔ, i sin be nga mun.

¹¹ Afin Nyanmiɛn liɛ'n, ɔ kpa-man sran nun .

¹² Be kwlaa nga be si-man Moiz mmla'n bɔ be yo sa tɛ'n, be ´mlin, sanngɛ be su jran-man mmla'n su yɛ be ´di be jɔlɛ nin-ɔn. Sanngɛ be kwlaa nga be si mmla'n bɔ be yo sa tɛ'n, be ´jran mmla'n su yɛ be ´di be jɔlɛ nin-ɔn.

¹³ Nán be nga be si mmla'n yɛ be ti sran kpa Nyanmiɛn nyrun-ɔn, sanngɛ be nga be fa su'n be yɛ Nyanmiɛn ´bu be sran kpa-a.

¹⁴ Afin kɛ be bɔ be ti-man Zuif'n bɔ be si-man mmla'n be yo sa nga be klɛli mmla'n nun kɛ sran `yo'n, kannzɛ be lɛ-mɛn i sɔ mmla'n, sanngɛ sa nga be yo'n ɔ kle kɛ be lɛ be bɔbɔ be mmla.

¹⁵ Kɛ be yo sɔ'n, ɔ kle kɛ be si sa nga be klɛli i mmla'n nun kɛ sran `yo'n be anwlɛn'n nun lɔ. Sa wlɛ bɔ be wun i'n nin be akunndan bɔ be bu'n man be wun sa nga sran yo'n i wlɛ, sɛ ɔ ti kpa o, sɛ ɔ ti tɛ o, be wun i wlɛ.

¹⁶ Jasin fɛ'n bɔ n kan'n, ɔ kle kɛ be wa wun i wlɛ sɔ cɛn nga Nyanmiɛn man Krist-Jésus wa nian sa kpa annzɛ sa tɛ nga sran'm be yo fia'n .

Zuif'm be nin mmla'n

¹⁷ Sanngɛ amun'n, an flɛ amun wun Zuif, an di mmla'n su, an fa Nyanmiɛn di amún nuan,

¹⁸ an si sa ng'ɔ yo Nyanmiɛn fɛ'n, mmla'n nun an wun sa ng'ɔ ti kpa'n,

¹⁹ an bu amun wun anyansifuɛ'm be kpɔnman trafuɛ, an yo amun wun kɛ kannin sa an kpaja be bɔ be o aosin'n nun'n be nyrun,

²⁰ an si ngwlɛlɛ nin sa b'ɔ ti nanwlɛ'n i kwlaa amun mmla'n ti. I sɔ'n ti an bu amun wun sinnglinfuɛ'm be fɔ tufuɛ, nin be bɔ be ti kɛ ba kanngan mun sa'n be ngwlɛlɛ klefuɛ.

²¹ ?Amun bɔ an kle sran wie'm be like'n, amun bɔbɔ an kle-man amun wun wie? ?Yɛ amun bɔ an se kɛ nán man be wua'n, an wua-man?

²² ?Amun bɔ an se kɛ nán be kunndɛ bla bé yi bo annzɛ bian bé wun bo'n, an bɔbɔ an yo-man? ?Amun bɔ an kpɔ amuɛn'n, an wua-man like amuɛn sua'n nun?

²³ ?Amun bɔ an fa mmla'n di amún nuan'n, kɛ an tɔn mmla sɔ'n, an gua-man Nyanmiɛn nyin ase?

²⁴ Afin be klɛli i kɛ: «Amun Zuif mun amun ti, be bɔ be ti-man Zuif'n be saci Nyanmiɛn dunman .»

²⁵ Nanwlɛ, sɛ an fa mmla'n su'n, klɛn wlalɛ'n ti kpa, sanngɛ sɛ an fa-man su'n, klɛn wlalɛ'n yo-man sa fi ye.

²⁶ ?Ɔ mɛn i sɔ'n ti'n, sɛ sran nga b'a wlɛ-mɛn i klɛn'n nan ɔ fa mmla'n su'n, Nyanmiɛn bu-mɛn i klɛn wlafuɛ?

²⁷ An si mmla'n kwlaa, yɛ be wlali amun klɛn, sanngɛ an tɔn mmla sɔ'n. ?Sɛ ɔ ti sɔ'n, sran nga b'a wlɛ-mɛn i klɛn sanngɛ ɔ fa mmla'n su'n, ɔ se-man kɛ amu'an di fɔ?

²⁸ Nán bé kplo'n su Zuif'n yɛ ɔ ti Zuif kpa nin-ɔn, yɛ nán be kplo'n su klɛn wlalɛ'n yɛ ɔ ti klɛn wlalɛ kpa nin-ɔn,

²⁹ sanngɛ Zuif kpa'n yɛlɛ sran ng'ɔ ti sɔ i anwlɛn nun'n, yɛ klɛn wlalɛ kpa'n yɛlɛ nga Nyanmiɛn Wawɛ'n wlɛ i sran i anwlɛn'n nun b'ɔ fin-man mmla nga be klɛli nun'n. Nán sran mun yɛ be yi Zuif kpa sɔ'n i ayɛ-ɔ, Nyanmiɛn bɔbɔ yɛ ɔ yi i ayɛ-ɔ.