Rɔmfuɛ Mun 16 - NYANMIƐN NDƐ'N 1998

Be like yolɛ

¹ N klo kɛ an si e niaan bla Febe, ɔ ti Sankre lɔ asɔnunfuɛ'm be lika nianfuɛ.

² Ɔ man e Min'n ti an `sɔ i nun kpa, kɛ Nyanmiɛn i sran'm be sɔ be wiengu nun'n sa. Like kwlaa ng'ɔ miɛn i sa'n, an `yo mɛn i, afin nanwlɛ, ɔ tili sran kpanngban bé wun nyanman nun, yɛ ɔ nian n kusu n lika kpa.

³ N ´yo Priska nin Akilas bɔ be ti n wiengu bɔ e nin be di Krist-Jésus i junman'n, be like.

⁴ N ti be fa bé wun mannin wie'n, i sɔ'n ti'n, n ´la be ase, yɛ be nga be ti-man Zuif bɔ be ti asɔnunfuɛ'n be kwlaa be ´la be ase wie.

⁵ N ´yo asɔnunfuɛ nga be yia be awlo lɛ'n, be like. N ´yo Epainɛt b'ɔ ti sran kpa'n, bɔ Azi mɛn'n nun lɛ i yɛ ɔ fɛli i wun mannin Krist kliklikli'n, i like.

⁶ N ´yo Mari b'ɔ dili junman dan mannin amun'n, i like.

⁷ N ´yo Andrɔnikis nin Zinias bɔ be ti n osufuɛ'n, be like. Be ti n wiengu bisuafuɛ, be nga Jésus sunmannin be'n, be bo be dunman kpa. Be dun mmua fa be wun mannin Krist nan man fa min wun a mɛn i.

⁸ N ´yo Anplias b'ɔ ti n sran kpa e Min'n ti'n, i like.

⁹ N ´yo Irbɛn bɔ ti e wiengu'n bɔ e nin e di Krist i junman ɔ nin Stasis b'ɔ ti n sran kpa'n, be like.

¹⁰ N ´yo Apɛlɛs b'ɔ ti Kristfuɛ kpa'n, i like. N ´yo Aristɔbil i awlofuɛ mun be like.

¹¹ N ´yo Erɔdiɔn b'ɔ ti n osufuɛ'n, i like. N ´yo Narsis i awlofuɛ'm bɔ be lafi e Min'n su'n, be like.

¹² N ´yo Mmo Trifɛni nin Mmo Trifɔz bɔ be di junman man e Min'n, be like. N ´yo Mmo Pɛrsid b'ɔ ti e sran kpa'n, b'ɔ di junman kpa man e min'n, i like.

¹³ N ´yo Rifis e min'n i sran b'ɔ ti kpa'n, ɔ nin i nin b'ɔ kacili min nin'n, be like.

¹⁴ N ´yo Asɛnkrit, nin Flegɔn, nin Ɛrmɛs, nin Patrɔbas, yɛ Ɛrmas, ɔ nin e niaan nga be nin be o lɛ'n, be like.

¹⁵ N ´yo Filɔlɔgɛ, nin Zili, nin Nere, nin i niaan bla, nin Olimp, ɔ nin Nyanmiɛn i sran bɔ be nin be o lɛ'n, n ´yo be kwlaa be like.

¹⁶ Amun `yo amun wiengu like be man min. Amun `tɔ be nun gbuduu. Krist i asɔnunfuɛ'm be kwlaa be ´yo amun like.

¹⁷ Aniaan mun, n ´srɛ amun kpa, be nga be fa-man ndɛ nga an fali su su'n, bɔ be fa afiɛn sacilɛ'n wla amun afiɛn'n, bɔ be saci sran ti nun'n, an `nian amun wun be lika. Nán an fa amun wun mantan be.

¹⁸ Afin sran wafa sɔ mun'n, nán Krist b'ɔ ti e Min'n i junman yɛ be di-ɔ. Be bɔbɔ be klun sa liɛ'n yɛ be yo-ɔ. Be fa bé nuan laka be nga be nian wun-man sa wlɛ'n.

¹⁹ Sran'm be kwlaa be se kɛ an ti anyinyiɛfuɛ. Kɛ an yo sɔ'n, ɔ jɔ n klun, sanngɛ n klo kɛ an yo ngwlɛlɛfuɛ bɔ be yo sa sa kpa, n klo-man kɛ sa tɛ bɔ kaan sa tran amun wun.

²⁰ Ɔ cɛ kaan Nyanmiɛn b'ɔ man sran di alaje'n, ɔ man amun ´tia Satan su yɛ amun ´nunkun i. Man e Min Jésus yo amun ye tititi!

²¹ Timote b'ɔ ti n wiengu bɔ min nin i e junman'n, nin Lisiis, nin Zazɔn, nin Sozipatɛr be ´yo amun like, yɛ n osufuɛ'm be ´yo amun like kusu.

²² Min Tɛrtiis bɔ Pɔl man n klɛli fluwa yɛ'n, e nin e Min'n e ti sran wunmuan, n kusu n ´yo amun like.

²³ N sikefuɛ Gaiis bɔ asɔnunfuɛ'm be kwlaa be yiɛ i awlo lɔ'n, ɔ ´yo amun like. Erast b'ɔ ti klɔ'n su sika sunianfuɛ'n, ɔ nin e niaan Kartis be ´yo amun like. [

²⁴ Man e min Jésus yo amun kwlaa amun ye tititi! Man ɔ yo sɔ!]

Nyanmiɛn manmanlɛ

²⁵ Nyanmiɛn kwla o! Afin min jasin fɛ'n nin Jésus-Krist i ndɛ bɔ n kan'n, ɔ nin sa nga Nyanmiɛn yi-mɛn i nglo kle-man e laa bɔ siɛn'n y'a wun i wlɛ'n i ti-ɔ. Nyanmiɛn man an kwla jran kekle. Kɛ ɔ fin mɛn'n i bo bolɛ nun'n, Nyanmiɛn fiali sa sɔ'n su.

²⁶ Sanngɛ siɛn'n, fluwa nga i nuan ijɔfuɛ'm be klɛli'n man y'a wun i wlɛ weiin. Anannganman Nyanmiɛn'n sieli i sɔ nan be kwlaa nga be ti-man Zuif'n be lafi i su yɛ bé nyin yi i.

²⁷ Jésus-Krist ti man e yi Nyanmiɛn bɔ ngwlɛlɛfuɛ fi nun-mɛn i sin'n i ayɛ tititi! Man ɔ yo sɔ!