Rɔmfuɛ Mun 15 - NYANMIƐN NDƐ'N 1998

Man e yo like ng'ɔ jɔ e wiengu klun'n

¹ E bɔ e wun sa sɔ'n i wlɛ kpa'n, man e uka be nga be wun-mɛn i wlɛ kpa'n, nán man e `yo like ng'ɔ jɔ e bɔbɔ e klun'n.

² Man e kwlaa e yo like ng'ɔ jɔ e wiengu klun'n, i sɔ'n nun e ukɛ i man ɔ yo kpa.

³ Afin Krist ɔ'a yo-man like ng'ɔ jɔ i bɔbɔ i klun'n, yɛlɛ kɛ be klɛli i kɛ: «Nzowa nga be ko kpɛ wɔ'n, min yɛ be fa kpɛli min-ɔn .»

⁴ Ndɛ nga be klɛli be laa'n, be klɛli i kwlaa sɔ'n kɛ be ´fa kle e ngwlɛlɛ nan Nyanmiɛn fɛ i ndɛ sɔ'n wla e fanngan, nan e tra ye anwlɛn e fa é wla'n guɛ i su.

⁵ Man Nyanmiɛn b'ɔ wla sran fanngan b'ɔ man be tra be anwlɛn'n, ɔ man amun akunndan'n yo kun kɛ Krist-Jésus bɔbɔ kle ye kɛ e yo'n sa.

⁶ Man amún bo ´yo kun sɔ nan amun kwlaa an yi e Min Jésus-Krist i Si Nyanmiɛn'n i ayɛ.

Jasin fɛ'n ti sran'm be kwlaa be liɛ

⁷ An `fa amun wiengu bu amun niaan kɛ Krist kusu fa amun buli i niaan'n sa, i sɔ'n ba Nyanmiɛn nyrunnyan.

⁸ Yoo: Jésus-Krist bali be nga be wla klɛn'n be lika nianlɛ nan be wun kɛ Nyanmiɛn ti nanwlɛfuɛ. Ɔ bali kɛ ɔ ´yo like nga Nyanmiɛn seli e nannan'm be kɛ ɔ ´yo man be'n.

⁹ Yɛ ɔ bali nan be bɔ be ti-man Zuif'n be kusu be `la Nyanmiɛn ase i aunnvuɛ b'ɔ wunnin be'n ti. Afin be klɛli i kɛ: «I sɔ'n ti'n, m ´bo ɔ dunman be nga be ti-man Zuif'n be nyrun, yɛ n ´to jue m ´bo flɛ wɔ.»

¹⁰ Be klɛli i ekun kɛ: «Amun bɔ an ti-man Zuif'n, an `uka Nyanmiɛn sran mun `to jue .»

¹¹ Yɛ be klɛli i ekun kɛ: «Amun kwlaa bɔ an ti-man Zuif'n, an `manman e Min Nyanmiɛn'n, yɛ man sran'm be kwlaa be yi i ayɛ .»

¹² Ezai kusu seli kɛ: «Izai i anunman'n ɔ ´ba, ɔ wa jao sie be nga be ti-man Zuif'n. I su yɛ be ´fa bé wla'n gua-a .»

¹³ Man Nyanmiɛn bɔ é nyin o i sin'n ɔ man amun klun jɔ, yɛ an di alaje i su bɔ an lafi'n ti nan Nyanmiɛn Wawɛ'n i fanngan nun amún nyin trɛn i sin tititi.

Pɔl i junman nin i lika kɔlɛ'n bé wun akunndan bulɛ

¹⁴ N niaan mun, m bɔbɔ n lafi amun su kpa kɛ an ti klun-ufuefuɛ kpa, n lafi amun su kɛ amun wun sa'n kwlaa wlɛ yɛ an kwla tu amun wiengu fɔ.

¹⁵ Kannzɛ ɔ ti sɔ'n, kɛ n klɛli fluwa yɛ'n, n kan sa wie'm be ndɛ weiin kleli amun nan amun wla `kpɛn sa nga amu'an dun mmua ti'n su. Ye dan bɔ Nyanmiɛn yoli min

¹⁶ b'ɔ sieli min kɛ n di Krist-Jésus i junman be nga be ti-man Zuif'n be afiɛn'n ti yɛ n klɛli i sɔ-ɔ. Kɛ m ´bo Nyanmiɛn i jasin fɛ'n, n yo i nyrun jranfuɛ nan n ´fa be nga be ti-man Zuif'n mɛn i nan i Wawɛ'n man be kaci i liɛ yɛ i klun `jɔ bé wun.

¹⁷ Sran wunmuan bɔ min nin Krist-Jésus y'a kaci'n ti, n kwla fa junman nga n di man Nyanmiɛn'n n di min nuan.

¹⁸ N lɛ-man ndɛ fi n kan-man san ndɛ nga Krist man n kan kle be b'ɔ man bé nyin yi Nyanmiɛn'n,

¹⁹ yɛ sa kekleekle mun, nin atrɛ mun, nin abonuan sa mun bɔ Nyanmiɛn Wawɛ'n i fanngan nun n yoli be'n, be cɛ yɛ n kan-an. Kɛ m boli Krist i jasin fɛ'n kwlakwlakwla sa. M boli i Zerizalɛm bue liɛ'n su lele fa juli Iliri.

²⁰ Kɛ ɔ ko yo nan m'an sa-man sran wie junman liɛ ng'ɔ boli i bo su'n, i ti n waan lika nga be nian ti-man Krist ndɛ lɛ le'n, lɛ yɛ m ´bo i jasin fɛ nin-ɔn.

²¹ Afin be klɛli i kɛ: «Be nga b'a kɛn-mɛn i ndɛ a kle-man be'n, be ´wun i, yɛ be nga be nian ti-mɛn i ndɛ le'n, be ´ti be ´wun i wlɛ .»

Pɔl i Rɔm kɔlɛ i wun akunndan b'ɔ buli'n

²² Sa sɔ'n yɛ ɔ bo n kokowa titi yɛ man n nyan-man n ti m ba-man amun wun lɔ nin-ɔn.

²³ Siɛn'n, m'an wie n junman ng'ɔ o akpasua nga'm be su'n di. Kɛ m bu amún wun lɔ kɔlɛ'n i akunndan'n, ɔ'a di afuɛ nnyɔn kun.

²⁴ I sɔ'n ti'n kɛ n ´kɔ Ɛspanyi'n, n klo kɛ m ´bo nun amun wun lɔ nan e yi awlaloɛ kan le nnyɔn kun nan an gua min atin klanman.

²⁵ Sanngɛ le nnyɔn nga liɛ'n, n su kɔ Zerizalɛm. N ´kɔ Nyanmiɛn sran'm bɔ be o lɔ'n be ukalɛ.

²⁶ Afin Maseduanifuɛ'm be nin Akaifuɛ'm b'a bu akunndan kɛ be ´yiyi sika nan be fa ko man Nyanmiɛn i sran'm bɔ be o Zerizalɛm lɔ'n be nun nga be ti yalɛfuɛ'n.

²⁷ Be bɔbɔ yɛ be buli i akunndan kɛ be ´yo-ɔ, yɛ sɛ be yo i sɔ'n, ɔ ti su, afin Zuif'm be yɛ man be nga be ti-man Zuif'n be tili Nyanmiɛn ndɛ'n yɛ be fali su-ɔ. Ɔ man sɛ be kusu be man Zuif'm be like'n, b'a bo-man aosuan.

²⁸ Like nga ti yɛ be sunmannin min'n, sɛ n wie i yo bɔ n wun kɛ b'a fa sika sɔ'n b'a wla bé sa nun'n, n ´ko Ɛspanyi. Kɛ n ´kɔ'n, m ´bo nun amun wun lɔ.

²⁹ N si kɛ sɛ n ju amun wun lɔ'n, amun ´wun kɛ Krist jin ń sin dan.

³⁰ Aniaan mun, n ´srɛ amun, an `nian e Min Jésus-Krist nin klolɛ nga Nyanmiɛn Wawɛ'n man e klo e wun'n ti'n,

³¹ amun nin min e `jran kekle e srɛ Nyanmiɛn kɛ ɔ de min be nga be lafi-man i su Zide lɔ'n bé sa nun, yɛ e srɛ i kɛ like nga n su fa ko man i sran mun Zerizalɛm lɔ'n, ɔ `yo man be sɔ nun klanman.

³² Yɛ an `srɛ Nyanmiɛn ekun man sɛ ɔ di su'n, kɛ n ju amun wun lɔ'n, n klun `jɔ yɛ n `de wunmiɛn kan amun wun lɛ.

³³ Man Nyanmiɛn b'ɔ man sran di alaje'n, ɔ nian amun kwlaa amun su. Man ɔ yo sɔ!