Rɔmfuɛ Mun 14 - NYANMIƐN NDƐ'N 1998

Nán kan ɔ wiengu wun ndɛ

¹ Sran nga kɛ ɔ lafili Krist su'n ɔ nian wun-man sa ng'ɔ yo-ɔ ɔ ti su'n i wlɛ'n, an `bu i amun niaan, nán amun nin i si akplowa.

² An `nian, sran wie o lɛ'n, ɔ lafi su kɛ ɔ kwla di like'n kwlaa, sanngɛ sran ng'ɔ nian wun-man sa ng'ɔ yo-ɔ ɔ ti su'n i wlɛ'n, aliɛ ngunmin yɛ ɔ di-ɔ, ɔ di-man nnɛn.

³ Nán man sran ng'ɔ di like'n kwlaa'n, ɔ yo sran ng'ɔ di-man'n i finfin, yɛ nga kusu b'ɔ di-man'n, nán man ɔ kan sran ng'ɔ di'n i ndɛ, afin Nyanmiɛn bɔbɔ a sɔ i nun.

⁴ ?A ti ɔ liɛ sɛ bɔ a kan ɔ niaan wie i junman difuɛ'n i wun ndɛ-ɔ? Sɛ i nzuɛn ti kpa o, sɛ ɔ ti-man kpa o, nán ɔ ndɛ-ɔ, i min'n i ndɛ-ɔ. Ɔ ´yo kpa, afin e Min'n kwla suɛn i bo man ɔ yo kpa.

⁵ Sran wie bu kɛ cɛn'n wie ti kpa tra wie, sanngɛ wie nyrun'n, i kwlaa ti kun. I sɔ'n ti'n, man sran kun wun like ng'ɔ yo'n i wlɛ nan ɔ'a yo.

⁶ Sran ng'ɔ sie cɛn kun man e Min'n, e Min'n i akunndan b'ɔ bu'n ti yɛ ɔ sie i sɔ-ɔ. Yɛ sran ng'ɔ di like'n kwlaa'n, e Min'n i akunndan b'ɔ bu'n ti yɛ ɔ di-ɔ, afin ɔ la Nyanmiɛn ase. Sran ng'ɔ di-man like ngba'n, e Min'n i akunndan b'ɔ bu'n ti yɛ ɔ yo i sɔ-ɔ, i kusu la Nyanmiɛn ase .

⁷ Olɛ nga e o yɛ'n, e di-man e tiaun, ɔ man sɛ e ´wu o, ɔ ti-man e ndɛ.

⁸ Sɛ e wu o, sɛ e wu-man o, e ti e Min'n liɛ.

⁹ Kɛ ɔ ko yo nan Krist ɔ'a yo be nga be wuli'n nin be nga bé nyin o su'm be Min'n, ɔ wuli, yɛ ɔ cɛnnin.

¹⁰ ?Ɔ kpa'n, a fin ɔ liɛ nin bɔ a kan ɔ niaan i wun ndɛ annzɛ a yo i finfin nin-ɔn? Afin be wa fa e kwlaa kɔ Nyanmiɛn ja su.

¹¹ Afin be klɛli i kɛ: «E Min Nyanmiɛn seli kɛ: ‹Kɛ min nyin o su'n ti'n, ɔ man sran'm be kwlaa be wa koto min bo, yɛ ɔ wa fite sran'm be kwlaa bé nuan kɛ n ti Nyanmiɛn .› »

¹² Ɔ man e kwlaa e wa kan sa nga e yoli be'n kle Nyanmiɛn.

Nán an yo sa ng'ɔ saci amun niaan'n

¹³ I sɔ'n ti'n, nán man e kan e wiengu wun ndɛ kun, sanngɛ an `bu akunndan, nán an yo sa ng'ɔ saci amun niaan b'ɔ man ɔ ´yo sa tɛ'n.

¹⁴ Sran wunmuan bɔ min nin e Min Jésus e ti'n ti, n si weiin kpa kɛ ninnge nga be o lɛ'n be kwlaa'n, be wie fi ti-man like tɛ, sanngɛ sɛ sran kun bu like kun kɛ ɔ ti-man kpa'n, wuun ɔ ti-man kpa i nyrun.

¹⁵ Like nga a si kɛ sɛ a di-ɔ ɔ sanngan ɔ niaan i akunndan'n, sɛ a di'n, wuun ɔ'a yo-man kɛ sran ng'ɔ klo sran'n ɔ yo'n sa. Nán man like nga a di'n saci sran nga ti yɛ Krist wuli'n.

¹⁶ Like nga amun nyrun ɔ ti kpa'n, nán man amun dunman saci su.

¹⁷ Nán kɛ like bɔ sran di'n nin nzan bɔ be nɔn'n yɛ ɔ kle kɛ Nyanmiɛn sie be-ɔ, sanngɛ i Wawɛ'n b'ɔ man sran kaci sran kpa'n, b'ɔ man be di alaje'n, b'ɔ man be klun jɔ'n, yɛ ɔ kle kɛ ɔ sie be-ɔ.

¹⁸ Sran ng'ɔ di Krist i junman'n kɛ nga sa'n, Nyanmiɛn klun jɔ i wun, yɛ sran'm be bo i dunman.

¹⁹ I sɔ'n ti'n, man e yo sa ng'ɔ jɔ e wiengu klun b'ɔ man e kwlaa e ´yo kpa'n.

²⁰ Nán man e saci like nga Nyanmiɛn yoli'n like bɔ e di'n ti. Nanwlɛ, like nga be di'n i kwlaa'n ti kpa, sanngɛ sɛ sran kun di like nan ɔ saci i niaan'n, wuun ɔ'a yo-man sa kpa.

²¹ Like nga sɛ an yo-ɔ ɔ ti kpa'n yɛ: nnɛn dilɛ o, nzan nɔnlɛ o, nán an yo like fi bɔ sɛ amun yo-ɔ ɔ saci amun niaan-an.

²² Ɔ sa wlɛ'n bɔ a wun i sɔ'n, man ɔ tran a nin Nyanmiɛn amun afiɛn. Sran ng'ɔ wun like ng'ɔ yo'n i wlɛ b'ɔ wun kɛ sɛ ɔ yo-ɔ i klun su ti-mɛn i'n, i liɛ su ti ye!

²³ Sanngɛ sran ng'ɔ wun-man like ng'ɔ di'n i wlɛ kpa sɛ ɔ ti kpa o, annzɛ sɛ ɔ ti-man kpa o, nan ɔ di'n, Nyanmiɛn wa se kɛ ɔ'a di fɔ, yɛlɛ kɛ like ng'ɔ yo'n, ɔ wun-mɛn i wlɛ. Afin like kwlaa nga be yo bɔ be wun-mɛn i wlɛ kɛ ɔ ti kpa nan b'a yo'n, ɔ ti sa tɛ.