Rɔmfuɛ Mun 11 - NYANMIƐN NDƐ'N 1998

Nyanmiɛn a yi-man Izraɛlfuɛ'm be blo sekeseke

¹ Ɔ man n se kɛ yoo: ?Nyanmiɛn yili i sran'm be blo? Cɛcɛ! Afin n kusu n ti Izraɛlfuɛ, yɛ n fin Abraam osu'n nun Bɛnzamɛn akpasua'n su .

² Nyanmiɛn sran'm b'ɔ dun mmua fali be'n, ɔ'a yi-man be blo. ?Nyanmiɛn ndɛ nga be klɛli i kɛ Eli sanmannin Izraɛlfuɛ mun Nyanmiɛn ja su'n, an si-man ndɛ sɔ'n ? Be klɛli ndɛ sɔ'n kɛ:

³ «E Min Nyanmiɛn, be kunnin ɔ́ nuan ijɔfuɛ mun, yɛ be bubuli ɔ sɔwlɛ mun, n kunngba b'ɔ m'an ka'n be kunndɛ kɛ be kun min wie.»

⁴ ?Sanngɛ Nyanmiɛn seli i sɛ? Ɔ seli i kɛ: «N lɛ sran akpi nso (7.000) bɔ b'a koto-man Baal bo .»

⁵ I kunngba'n, kɛ e o yɛ'n kusu, be onga kaan kali lɛ bɔ Nyanmiɛn fali be i klun-ufue'n ti.

⁶ Nán sa nga be yoli'n ti yɛ ɔ fali be sɔ-ɔ, sanngɛ i klun-ufue'n ti yɛ ɔ yoli sɔ-ɔ. Afin sɛ like nga be yo'n ti yɛ ɔ fali be'n, wuun nán i klun-ufue'n ti-ɔ.

^7-8 Sɛ ɔ ti sɔ'n, e ´se kɛ like nga Izraɛlfuɛ'm be kunndɛ'n, b'a nyɛn-mɛn i, san be kaan nga Nyanmiɛn fali be'n, be ngunmin yɛ be nyɛnnin i-ɔ. Sanngɛ ndɛ nga be klɛli i kɛ be nga'm be wa yo sran bɔ be wun-man sa wlɛ'n, yɛ ɔ'a kpɛn su yɛ'n. Be klɛli i kɛ: «Nyanmiɛn man be kacili kɛ sran bɔ be akunndan nun-man lɛ sa, yɛ ɔ man be wun-man ase. Be ti-man sa lele fa ju ndɛ .»

⁹ Yɛ David seli kɛ: «Man bé cɛn dilɛ'n yo kɛ aya sa, man ɔ yo kɛ zɔ sa, be tɔ nun nan be `nyan bé sa tɛ'n i akatua !

¹⁰ Man bé nyin su dun be, nán man be wun ase kun. Man be kɔminsin klu tititi .»

Be bɔ be ti-man Zuif'n bé ti nyanlɛ

¹¹ Ɔ man n se kɛ yoo: ?Kɛ be tɔli sɔ'n, be kali lɛ mlɔnmlɔn? Ɔ ti-man sɔ mlɔnmlɔn! Sanngɛ kɛ be yoli sa tɛ'n, ɔ man be bɔ be ti-man Zuif'n b'a nyan bé ti yɛ Zuif'm bé nyin a ci be.

¹² Sɛ Zuif'm bé sa tɛ yolɛ'n ɔ yoli mɛn nunfuɛ'm be ye dan'n, yɛ sɛ be nvle'n i bolɛ'n ɔ yoli be bɔ be ti-man Zuif'n be ye'n, wuun kɛ be ko nyan bé ti mlɔnmlɔn'n, ɔ ´yo wie'm be ye kpɛ blu!

¹³ Amun bɔ amun osu'n ti-man Zuif'n, amun yɛ n kan ndɛ nga kle amun-ɔn. Nyanmiɛn sunmannin min be bɔ be ti-man Zuif'n bé sin, yɛ n fa junman sɔ'n di min nuan.

¹⁴ N yo i sɔ nan min nvlefuɛ'm be fa bé nyin ci amun nan be nun wie'm be nyan bé ti.

¹⁵ ?Afin sɛ be ase sielɛ kan bɔ Nyanmiɛn sieli be'n ɔ man mɛn nunfuɛ'm be nin Nyanmiɛn be afiɛn a sɛ'n, kɛ ɔ ko fa be ekun'n, ɔ ´yo sɛ? Sɛ ɔ yo i sɔ'n, be nga be wuli'n be ´nyan nguan!

¹⁶ Kpaun bɔ be ´tɔn'n, sɛ be dun mmua kpɛ Nyanmiɛn liɛ'n, wuun i wunmuan'n kwlaa ti i liɛ, yɛ sɛ waka'n i bo'n ti Nyanmiɛn liɛ'n, wuun i sama'n ti i liɛ .

¹⁷ Izraɛlfuɛ'm be ti kɛ olivie bɔ be tali'n bɔ be kpɛkpɛ i sama'm be wie'n sa. Amun bɔ an ti-man Zuif'n, an ti kɛ blo olivie sama mun sa, yɛ be fa amun takali olivie nga be tali'n i sama nga be kpɛkpɛli be'n be osu nun. Ɔ man nzue ng'ɔ fin olivie nga be tali'n i bo nun'n, ɔ wlu amun nun wie, yɛ man an yo kpa-a.

¹⁸ Ɔ man sɛ ɔ ti sɔ'n, nán an bu kɛ an ti kpa tra be nga be kpɛ be guali'n. ?Nguɛ ti yɛ an tu amun wun-ɔn? Afin nán amun yɛ an ti waka'n i bo nin-ɔn.

¹⁹ Wienun-ɔn, sran wie wa se kɛ: «Be kpɛkpɛli waka'n i sama sɔ mun nan be ´fa min taka be osu nun.»

²⁰ Ɔ ti sɔ. Nyanmiɛn bɔ be lafi-mɛn i su kpa'n ti yɛ be kpɛkpɛli be-ɔ, ɔ kusu, i su bɔ a lafi'n ti yɛ man a o lɛ-ɔ. Nán tu ɔ wun, sanngɛ nian ɔ wun kpa,

²¹ afin sɛ Nyanmiɛn a yaci-man Zuif'm bɔ be ti kɛ olivie nga be tali'n sa i sama'm be lɛ'n, ɔ su yaci-man ɔ lɛ kusu.

²² I sɔ'n ti, nian, Nyanmiɛn ti kpa, yɛ kusu ndɛ ng'ɔ kan'n ɔ lɛ-man kaciwlɛ. Kɛ a niɛn i bue kun'n, a wun kɛ ndɛ ng'ɔ kan kle be nga be lafi-mɛn i su kun'n ɔ lɛ-man kaciwlɛ, yɛ kɛ a niɛn i bue kun ekun'n, a wun kɛ sɛ a yo kɛ ɔ ´yo ɔ kpa'n, ɔ ´yo ɔ kpa. Sɛ ɔ'a yo-man sɔ'n, ɔ ´kpɛ wɔ yi.

²³ Yɛ Zuif'm be kusu'n, sɛ be kaci nan be lafi Nyanmiɛn su'n, ɔ ´fa be taka be osu nun, afin Nyanmiɛn kwlɛ i sɔ yo.

²⁴ Ɔ bɔ a ti-man Zuif'n, a ti kɛ blo olivie sama sa, be kpɛ wɔ takali olivie nga be tali'n su, ɔ ti sa bɔ be yo-man. ?Sɛ be yo ɔ sɔ'n, wuun Zuif'm bɔ be ti olivie nga be tali'n, nán be liɛ sin-ɔn?

Izraɛlfuɛ'm be Nyanmiɛn sin salɛ

²⁵ Aniaan mun, kɛ ɔ ko yo nan amu'an bu-man amun wun ngwlɛlɛfuɛ'n, n klo kɛ n ´kan sa ng'ɔ o yɛ'n bɔ Nyanmiɛn yi-mɛn i nglo'n n ´kle amun. Sa sɔ'n yɛlɛ kɛ Izraɛlfuɛ mun be bue b'a yo sran bɔ be wun-man sa wlɛ, be ´ka lɛ sɔ lele san be nga be ti-man Zuif bɔ be ´nyan bé ti'n bé nuan'n ɔ'a ju.

²⁶ Kɛ ɔ ko yo sɔ'n, ndɛ nga be klɛli i kɛ Izraɛlfuɛ'm be kwlaa be ´nyan bé ti'n, ɔ ´kpɛn su. Afin be klɛli i kɛ: «Bé Defuɛ'n ´fin Siɔn, ɔ ´yo man Zakɔb anunman'm bɔ be sro-man Nyanmiɛn'n be ´sro i .

²⁷ Amun nian aenguɛ nga e nin be e wa tra cɛn nga n ´yaci sa nga be yoli min'n n ´cɛ be'n yɛ .»

²⁸ Kɛ e niɛn i bue kun'n, e wun kɛ jasin fɛ'n bɔ Zuif'm b'a fa-man su'n ti Nyanmiɛn nin be buli. I sɔ'n yoli amun muae sa. Sanngɛ kɛ e niɛn i bue kun ekun bɔ e wun wafa nga Nyanmiɛn fa sran'n, e wun kɛ be nannan'm be ti'n, be ti Nyanmiɛn i anwlɛn su sran.

²⁹ Afin kɛ Nyanmiɛn fa like man sran'n, yɛ kɛ ɔ flɛ sran'n, ɔ koko-mɛn i sin.

³⁰ Laa'n, amún nyin yi-man Nyanmiɛn, sanngɛ Zuif'm bé nyin kekle'n bɔ be yoli'n ti Nyanmiɛn a wun amun aunnvuɛ.

³¹ I kunngba'n, aunnvuɛ nga Nyanmiɛn wunnin amun'n ti'n, Zuif'm be yo nyin kekle siɛn'n nan Nyanmiɛn ´wun be kusu be aunnvuɛ wie.

³² Kɛ ɔ ko yo nan Nyanmiɛn a wun sran'm be kwlaa be aunnvuɛ'n, ɔ buli be kwlaa nyin keklefuɛ.

³³ Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa'n kwlakwla kpan! ?Wan yɛ ɔ si i klun lɔ akunndan nin-ɔn? ?Wan yɛ ɔ wun sa ng'ɔ yo be'n be wlɛ-ɔ?

³⁴ Afin be kɛn i Nyanmiɛn ndɛ nga be klɛli'n nun kɛ: «?Wan yɛ ɔ si akunndan nga e Min Nyanmiɛn'n buli nin-ɔn? ?Wan yɛ ɔ kleli i ngwlɛlɛ-ɔ ?

³⁵ ?Wan yɛ ɔ dun mmua mannin Nyanmiɛn like ti yɛ ɔ mɛnnin i wie-ɔ?»

³⁶ Ninnge nga be o lɛ'n, be kwlaa be fin i, i yɛ man be o lɛ-ɔ, yɛ i dunman nun yɛ be o lɛ-ɔ. Man e yi i ayɛ tititi. Man ɔ yo sɔ!