Rɔmfuɛ Mun 10 - NYANMIƐN NDƐ'N 1998

¹ Aniaan mun, min nuan bɔ n yra'n nin sa nga n fa srɛ Nyanmiɛn kɛ ɔ yo man Izraɛlfuɛ mun'n, yɛlɛ kɛ be `fite nun.

² N si be kpa kɛ be klo Nyanmiɛn dan, sanngɛ klolɛ sɔ'n bɔ be fa klo i'n, be si-man su ngwlɛlɛ.

³ Afin kɛ be si-man like wafa nga Nyanmiɛn yo b'ɔ bu sran sran kpa'n, bɔ be bɔbɔ be kunndɛ like wafa nga be yo nan b'a yo sran kpa'n, ɔ man b'a fa-man Nyanmiɛn liɛ'n su.

⁴ Afin be kwlaa nga be lafi Krist su'n, ɔ'a nunnun mmla i su falɛ wafa nga be bu i kɛ sɛ be yo sɔ'n yɛ be ´yo sran kpa'n.

⁵ Afin Moiz kannin mmla'n bɔ be fa su yɛ be yo sran kpa'n i ndɛ kɛ: «Sran ng'ɔ fa mmla'n su'n, ɔ ´nyan nguan .»

⁶ Sanngɛ sɛ sran kpa yolɛ b'ɔ fin Nyanmiɛn i su bɔ be lafi'n ti sran'n, wuun ɔ ´se kɛ: «Nán bu ɔ klun lɔ se kɛ: ‹?Wan yɛ ɔ ´kɔ nyanmiɛn su lɔ-ɔ?› i bo kle kɛ be ko fa Krist ba,

⁷ annzɛ: ‹?Wan yɛ ɔ ´jra kunman bɔ be si-mɛn i bo'n nun lɔ-ɔ?› i bo kle kɛ be ko fa Krist blɔlɔ lɔ ba.»

⁸ ?Ndɛ nga be klɛli'n ɔ se sɛ? Ɔ se kɛ: «Nyanmiɛn ndɛ'n wo ɔ wun koko lɛ, ɔ o ɔ klun yɛ a kan-an.» Ndɛ sɔ'n yɛlɛ Nyanmiɛn sulafilɛ ndɛ bɔ e kan'n .

⁹ Sɛ ɔ fite ɔ́ nuan kɛ Jésus ti ɔ Min'n, yɛ sɛ a lafi su kpa kɛ Nyanmiɛn cɛnnin i'n, a ´fite nun.

¹⁰ Afin kɛ be lafi su kpa'n, Nyanmiɛn bu be sran kpa, yɛ kɛ ɔ fite be nuan'n, be fite nun.

¹¹ Afin e kɛnngɛn i Nyanmiɛn Ndɛ nga be klɛli'n nun kɛ: «Sran kwlaa ng'ɔ lafi i su'n, i nyin su gua-man ase .»

¹² Yɛlɛ kɛ ɔ lɛ-man Zuif, yɛ ɔ lɛ-man Grɛk, be kwlaa be Min'n ti kun, ɔ fɛ i ninnge kpakpa'n man be kwlaa nga be bo flɛ i'n,

¹³ afin «Sran kwlaa ng'ɔ flɛ e Min Nyanmiɛn'n, ɔ ´fite nun .»

¹⁴ ?Sɛ b'a dun-man mmua lafi-mɛn i su'n, ɔ ´yo sɛ yɛ be ´flɛ i-ɔ? ?Yɛ sɛ b'a ti-mɛn i dunman'n, ɔ ´yo sɛ yɛ be ´lafi i su-ɔ? ?Yɛ sɛ sran fi kɛn-mɛn i ndɛ kle-man sran mun'n, ɔ ´yo sɛ yɛ be ´ti-ɔ?

¹⁵ ?Sɛ b'a sunman-man sran'n, ɔ ´yo sɛ yɛ ɔ ´kɛn i ndɛ nin-ɔn? Afin be klɛli i kɛ: «Be bɔ be ba jasin fɛ bolɛ'n, be balɛ'n yo sran'm be fɛ .»

¹⁶ Sanngɛ be ngba b'a fa-man jasin fɛ sɔ'n su. Ezai kɛnnin i ekun kɛ: «?Nannan, wan yɛ ɔ lafili ndɛ nga e kannin'n su-ɔ ?»

¹⁷ I sɔ'n ti'n, ndɛ nga sran ti'n yɛ man ɔ lafi Nyanmiɛn su-ɔ, yɛ ndɛ nga be ti'n yɛlɛ Krist ndɛ bɔ be kan'n.

¹⁸ N se kɛ yoo: ?B'a ti-man? Be tili i kpa, afin be klɛli i kɛ: «Be kannin ndɛ lika'n kwlaa, yɛ be tili be ndɛ'n mɛn wunmuan'n nun .»

¹⁹ Sanngɛ n se kɛ yoo: ?Izraɛlfuɛ'm be kusu b'a ti-man? Be tili, Moiz dun mmua seli kɛ: «N `yo man amún nyin ´ci nvle kun wie bɔ i nunfuɛ'm be ti-man sran kpa'n. N `yo man nvle bɔ i nunfuɛ'm be si-man ngwlɛlɛ'n, be ´fita amun anwlɛn .»

²⁰ Ezai kusu trɛ i anwlɛn seli kɛ: «Be nga b'a fa-man bé wun a mantan-man min'n, be wunnin min. Be nga b'a usa-man n osu'n, n yi mín wun kleli be .»

²¹ Sanngɛ ɔ kannin Izraɛlfuɛ'm be ndɛ kɛ: «N trɛ min sa nun nglɛmun lele nnɔsua kɛ n ´tɔ sran nyin keklefuɛ bɔ be kpalo min ndɛ'n be nun .»