Rɔmfuɛ Mun 1 - NYANMIƐN NDƐ'N 1998

Pɔl klɛ fluwa nga ko mannin Rɔm lɔ Kristfuɛ mun

¹ M Pɔl, n ti Krist-Jésus i sran. Nyanmiɛn flɛli min kɛ ɔ ´sunman min. Ɔ yili min kɛ m bo i jasin fɛ'n

² b'ɔ yoli man i nuan ijɔfuɛ'm be kɛnnin i ndɛ laa i Ndɛ nga be klɛli'n nun'n.

³ Jasin fɛ sɔ'n ti i Wa'n i ndɛ. Kɛ ɔ kacili sran'n, be wuli i David osu'n nun,

⁴ yɛ i cɛnlɛ bɔ Nyanmiɛn Wawɛ'n cɛnnin i'n ɔ ti sa kekle b'ɔ yoli, ɔ man be si kɛ ɔ ti i Wa sakpa. Ɔ ti e Min Jésus-Krist.

⁵ I ti yɛ Nyanmiɛn bu n sran-an, ɔ sunmannin min kɛ n kɛn i ndɛ'n kle nvle-nvle'n kwlaa i bɔbɔ dunman nun nan be lafi i su yɛ bé nyin yi i.

⁶ Amun bɔ Nyanmiɛn flɛli amun kɛ an yo Jésus-Krist liɛ'n, an wo sran sɔ'm be nun wie.

⁷ N ´fa fluwa nga blɛ amun bɔ an wo Rɔm lɔ bɔ Nyanmiɛn klo amun b'ɔ flɛli amun kɛ an kaci i liɛ mlɔnmlɔn'n. Man e Si Nyanmiɛn nin e Min Jésus-Krist be yo man an nyan ye, yɛ man amún wun jɔ amun fɔuun!

Pɔl wla b'ɔ lo Rɔm lɔ Kristfuɛ mun'n

⁸ Jésus-Krist ti n la min Nyanmiɛn'n i ase amun ndɛ bɔ n tili'n ti, afin be kan amun Nyanmiɛn sulafilɛ ndɛ'n mɛn wunmuan'n nun.

⁹ Nyanmiɛn bɔ min akunndan'n kwlaa wo i sulɛ'n su'n, bɔ m bo i Wa'n i jasin fɛ'n, ɔ si kɛ n kan amun ndɛ kle i titi.

¹⁰ N srɛ i cɛn kwlaa kɛ ɔ man min atin klanman man n wɔ amun wun lɔ.

¹¹ N klo kɛ n ´wun amun wun nan Nyanmiɛn Wawɛ'n i like nga n nyɛnnin i'n, an nyan wie nan an jran kekle.

¹² Sɛ n ju amun wun lɔ bɔ e wla e wun fanngan Nyanmiɛn su bɔ e lafi'n ti'n, ɔ ´yo n fɛ dan.

¹³ Aniaan mun, m bu amun wun lɔ kɔlɛ'n i akunndan tititi, min waan m ´ba nan n ´nyan n junman'n i nuan like amun wun lɔ kɛ nyɛn i nvle kun'm be nun'n sa, sanngɛ lele ndɛ n nian nyan-man ń ti .

¹⁴ Sran nga bé nyin a ti o, be nga bé nyin nian ti-man o, be nga be si fluwa o, be nga be si-man fluwa o, be kwlaa be jasin fɛ'n i bo klelɛ kalɛ o n su.

¹⁵ I sɔ'n ti, n waan m ma kan jasin fɛ'n kle amun Rɔmfuɛ mun amun kusu wie.

Jasin fɛ'n bɔ Nyanmiɛn fa de sran mun'n

¹⁶ Nyannzuɛn kun-man min Jasin fɛ'n bolɛ nun. Afin i yɛ ɔ ti fanngan nga Nyanmiɛn fa de sran nga be lafi i su'm be kwlaa-a, Zuif'm be yɛ be ti klikli-ɔ, i sin be nga mun.

¹⁷ Jasin fɛ sɔ'n yɛ ɔ kle ye wafa nga Nyanmiɛn fa bu sran i sran kpa nin-ɔn, i sɔ'n fin sran i Nyanmiɛn su b'ɔ lafi'n, yɛ kusu ɔ man sran lafi Nyanmiɛn su kpa, afin be klɛli i kɛ: «Sran ng'ɔ lafi Nyanmiɛn su b'ɔ man ɔ kaci sran kpa'n, ɔ ´nyan nguan .»

Sran'm be kwlaa be yo sa tɛ

¹⁸ Sran'm be nyin b'ɔ yi-man Nyanmiɛn'n nin sa tɛtɛ'n kwlaa bɔ be yo'n ti, Nyanmiɛn kle be kɛ i ya'n wa jaso. Bé sa tɛtɛ yolɛ sɔ'n ti, ɔ man sran'm be wun-man Nyanmiɛn ndɛ'n i nanwlɛ.

¹⁹ Afin be wun like nga b'ɔ man sran si Nyanmiɛn'n i wlɛ. Nyanmiɛn bɔbɔ yili i nglo weiin kleli be.

²⁰ Sran nyinma wun-man Nyanmiɛn'n, sanngɛ kɛ ɔ fin cɛn ng'ɔ yili mɛn'n, ninnge kwlaa ng'ɔ yo be bɔ be wun be'n, ɔ man be wun i wlɛ weiin kɛ Nyanmiɛn o lɛ yɛ ɔ kwla sa'n kwlaa yo. I sɔ'n ti be lɛ-man ndɛ fi .

²¹ Afin be si kɛ ɔ ti Nyanmiɛn, sanngɛ ɔ nin i sɔ'n ngba be yi-mɛn i ayɛ'n yɛ be lɛ-mɛn i ase. Be akunndan nga be bu'n i kwlaa'n yoli ngbɛn, yɛ ngwlɛlɛ bɔ be si-mɛn i'n ti b'a wun-man sa fi wlɛ kun .

²² Be bu bé wun ngwlɛlɛfuɛ, ɔ man be kacili sinnglinfuɛ.

²³ Be yaci Nyanmiɛn b'ɔ ti anannganman b'ɔ lɛ nyrun lɛ be yo ninnge mun, kɛ sran sa, wie'm be ti kɛ nnɛn sa, wie'm be kusu be ti kɛ anunman sa, yɛ wie'm be ti kɛ wuo sa, be taka be, yɛ be sɔ be .

²⁴ I sɔ'n ti Nyanmiɛn yili i sa be su, ɔ man be yo sa tɛtɛ'n kwlaa nga be klo kɛ be ´yo'n lele ɔ man be yo be bɔbɔ bé wun finfin.

²⁵ Be fa ato'n kaci Nyanmiɛn ndɛ b'ɔ ti nanwlɛ'n, yɛ be fa bé wun man ninnge bɔ Nyanmiɛn yili be'n, be sɔ be, be yaci Nyanmiɛn bɔbɔ b'ɔ yili ninnge sɔ mun i lɛ. I yɛ ɔ fata kɛ be `bo i dunman tititi nin-ɔn. Man ɔ yo sɔ !

²⁶ I sɔ'n ti Nyanmiɛn yili i sa be su, ɔ man be konvi sɔ nyannzuɛn sa'm be yolɛ lele ɔ man be mmla'm be yaci bian nna nga Nyanmiɛn sieli'n, siɛn be nin be wiengu mmla mun yɛ be kunndɛ be wun-ɔn. I sɔ yolɛ liɛ'n, ɔ ti-mɛn i su mlɔnmlɔn'n.

²⁷ Yasua'm be kusu be yaci bla nna nga Nyanmiɛn sieli'n yɛ be wun yrayra be be wiengu yasua'm be kunndɛlɛ'n nun, be yo nyannzuɛn sa mun, ɔ man be nyan bé sa tɛtɛ sɔ'm bɔ be yo'n i nuan akatua.

²⁸ Kɛ bé nyin kpali Nyanmiɛn su'n, i kusu yili i sa be su ɔ man akunndan tɛtɛ bali bé ti nun yɛ be yo sa b'ɔ ti-mɛn i su'n.

²⁹ Sa tɛtɛ yolɛ'n kwlaa ɔ'a kun be kpo, be ti sran tɛ, be konvi ti kpli, be klun yo wi, bé nyin ci sran nin like, be kun sran, be klo utre, be ti gblɛ, be bu sran akunndan tɛ, be bla,

³⁰ be kan sran wun ndɛ, be kpɔ Nyanmiɛn, be kpɛ nzowa, be tu bé wun, be di bé nuan, be kpɛ sa tɛtɛ uflɛ'm be ba, bé nyin yi-man bé si nin be nin mun,

³¹ be wun-man sa wlɛ, sa nga be se kɛ be `yo'n, be yo-man, be klo-man be osufuɛ mun bɔbɔ, yɛ sran yo-man be annvɔ.

³² Be si kɛ be klɛli i Nyanmiɛn mmla'n nun kɛ sran ng'ɔ yo i sɔ sa'n, ɔ nin kunlɛ fata, sanngɛ be yo, yɛ kɛ sran wie'm be yo sa kunngba sɔ'n, ɔ yo be fɛ.