Filemɔn 1 - NYANMIƐN NDƐ'N 1998

Pɔl klɛ fluwa nga ko mannin Filemɔn

¹ M Pɔl bɔ Krist-Jésus ti n wo bisua nun'n, min nin e niaan Timote,

² e ´klɛ fluwa nga blɛ wɔ Filemɔn bɔ a ti e sran kpa nin e wiengu junman difuɛ'n, nin e niaan bla Afia, ɔ nin Arsip bɔ e nin i e fɛ'n nin asɔnunfuɛ nga be yia wɔ awlo lɔ'n.

³ Man e Si Nyanmiɛn nin e Min Jésus-Krist be man an nyan ye, yɛ man amún wun jɔ amun fɔuun!

Filemɔn klo sran nin Jésus

⁴ Ɔ ti, n la min Nyanmiɛn'n i ase titi, yɛ n srɛ i titi kɛ ɔ nian wɔ su,

⁵ afin n ti klolɛ bɔ a fa klo e Min Jésus nin Nyanmiɛn sran'n kwlaa'n nin sulafilɛ nga a fa lafi be kwlaa be su'n i ndɛ.

⁶ N ´srɛ Nyanmiɛn kɛ anuansɛ bɔ Krist bɔ e lafili i su'n ti e di'n, ɔ man a wun like kpakpa kwlaa ng'ɔ ti e liɛ sran wunmuan bɔ e nin Krist y'a kaci'n ti'n i wlɛ kpa weiin.

⁷ N niaan bian, klolɛ nga a fa klo be'n ti'n, ɔ man ń wla gua ase yɛ n klun jɔ dan, afin wɔ man Nyanmiɛn i sran'm be anwlɛn tɔ nzue nun.

Pɔl kpatali Onezim ti

⁸ I sɔ'n ti'n, Krist b'ɔ jin min sin'n ti'n, n si kɛ n kwla se wɔ kɛ a yo sa ng'ɔ ti i su'n,

⁹ sanngɛ sa ng'ɔ o yɛ liɛ'n, ɔ fata kɛ n srɛ wɔ klolɛ bɔ a klo sran'n ti: M Pɔl bɔ m'an yo kpɛnngbɛn bɔ Krist-Jésus ti siɛn'n n wo bisua nun'n,

¹⁰ min wa Onezim bɔ n kacili i si bisua'n nun wa'n, i ti kpatalɛ yɛ m ba-a .

¹¹ Laa ɔ'a yo-man sa kpa a man-man wɔ, sanngɛ siɛn'n ɔ wa yo sa kpa man min nin wɔ.

¹² Siɛn'n i b'ɔ ti ń sa nin ń ja'n, n ´fɛ i blɛ wɔ .

¹³ Kɛ n wo bisua'n nun wa jasin fɛ'n ti'n, min waan ɔ ka min wun wa nan ɔ `jran ɔ́ ja nun nian n lika.

¹⁴ Sanngɛ like nga a kplin-man su kɛ n yo'n, n klo-man kɛ n yo nan ye nga a yo'n w'a yo-mɛn i mianlɛ su sanngɛ w'a yo i ɔ klun-ufue su'n ti.

¹⁵ Wienun-ɔn kɛ ɔ ´yo nan ɔ'a ka ɔ́ sa nun mlɔnmlɔn'n ti yɛ man ɔ wanndili wɔ le nnyɔn kun nin-ɔn.

¹⁶ Afin siɛn'n, nán kɛ ɔ kanga kunngba yɛ ɔ ti-ɔ, sanngɛ i kpa tra kanga, ɔ ti e niaan bɔ e klo i kpa. Ɔ ti n sran kpa, yɛ ɔ liɛ'n, ɔ wa yo ɔ sran kpa tra min, afin ɔ ti ɔ sran, yɛ kusu amun Min'n ɔ'a yo kun.

¹⁷ I sɔ'n ti'n, sɛ a bu n kɛ n ti ɔ wiengu'n, sɔ i nun kɛ a fa sɔli min nun'n sa.

¹⁸ Sɛ ɔ yoli wɔ sa wie annzɛ sɛ ɔ kalɛ wie o i su'n, n ko yi n ko man wɔ.

¹⁹ Nian, ń sa nuan yɛ: M bɔbɔ m Pɔl m ma tannin kalɛ sɔ'n man wɔ. Ɔ nin i sɔ'n ngba n su se-man wɔ kɛ n ti yɛ man w'a nyan nguan-an.

²⁰ N niaan bian, sran wunmuan bɔ a nin e Min'n ti'n ti, n ´srɛ wɔ kɛ a yo n ye, man ń wla gua ase Krist liɛ bɔ e ti'n ti.

²¹ Fluwa nga n ´klɛ m blɛ wɔ yɛ'n, n si kɛ sran bɔ a bu min'n ti like nga n se wɔ kɛ a yo'n, a ´yo tra su.

²² Kɛ a ´yo sɔ'n, siesie sua ba kun nun kpa fa sie min, afin Nyanmiɛn bɔ an srɛ i kɛ ɔ jran ń sin man an wun min ekun'n ti, n lafi su kɛ m ´ba.

I like yolɛ

²³ Epafras b'ɔ ti n wiengu bisuafuɛ Krist ti'n, ɔ ´yo wɔ like .

²⁴ Mark, nin Aristark, nin Demas, ɔ nin Lik bɔ be ti n wiengu junman difuɛ'n, be kusu be ´yo wɔ like .

²⁵ Man e Min Jésus-Krist aklunyefuɛ'n nin amun tran!