Nyanndra Mun 9 - NYANMIƐN NDƐ'N 1998

Akunndan'n i sran yialɛ

¹ Akunndan'n ɔ kplɛnnin i sua, ɔ siesieli sua sɔ'n i ja nso.

² Ɔ kunnin i nnɛn mun, ɔ siesieli i nzan'n. Ɔ siesieli i like diwlɛ'n.

³ Kpɛkuun ɔ sunmɛnnin i afanniɛn mmla mun. Ɔ sunmannin be kɛ be wɔ klɔ'n i kpɔlɛkpɔlɛ lika'm be su be `bo ndolo be se kɛ:

⁴ «Sran nga b'ɔ wun-man sa wlɛ'n, ɔ `wlu wa!» Be nga be si-man ngwlɛlɛ'n, ɔ se be kɛ yoo:

⁵ «Amun `bla, amun `bla be wa di like nan an `nɔn min nzan nga m'an yi i yɛ'n wie.

⁶ An `yaci sinnzin atin'n i falɛ wie, nan an `nyan nguan. An `yaci i falɛ nan an `nanti ngwlɛlɛ atin liɛ'n su!»

Akunndanfuɛ nin wun tufuɛ'n

⁷ Sran b'ɔ tu tutrefuɛ fɔ'n, i sɔ sran liɛ'n ɔ'a mɛn i bɔbɔ wun kpɔɛ. Nga kusu b'ɔ tu klunwifuɛ fɔ'n, sɛ ɔ ti nzowa-a, i bɔbɔ yɛ man be kpɛli i-ɔ.

⁸ Sɛ ɔ waan nán tutrefuɛ'n kpɔ wɔ'n, nán tu i fɔ. Tu akunndanfuɛ'n fɔ. Sɛ a tu i fɔ-ɔ, ɔ ´klo ɔ́ sa.

⁹ Man ngwlɛlɛfuɛ'n i akunndan, mɛn i akunndan man ɔ si wie ekun tra su. Kle sran kpa'n i ngwlɛlɛ. Kle i ngwlɛlɛ man ɔ si sa uka laa liɛ'n su.

¹⁰ Akunndan'n i bo bowlɛ'n, ɔ fin bé nyin b'ɔ yi Anannganman'n. Be nga be nin Nyanmiɛn nanti klanman'n, be si ngwlɛlɛ.

¹¹ Sɛ a ´cɛ asiɛ su-ɔ, ɔ fin min. Sɛ ɔ nguan nyanman'n ´yo tɛnndɛn-ɔn, ɔ fin min.

¹² Sɛ a si akunndan-an, ɔ ti ɔ bɔbɔ ɔ liɛ. Sɛ kusu a ti tutrefuɛ-ɔ, i su ndɛ ng'ɔ ba'n, ɔ ti ɔ kunngba cɛ ɔ ndɛ.

Sinnzin'n i sran'm be yialɛ

¹³ Sinnzin'n i like b'ɔ fɛli i'n, yɛlɛ bla sinnglinfuɛ b'ɔ si-man sa, bɔ kpankpan finfin'n.

¹⁴ Ɔ fa bia trɛn i sua'n i anuan'n nun. Wie kusu-ɔ ɔ tran klɔ'n i kpɔlɛkpɔlɛ lika'm bé su.

¹⁵ Yɛ ɔ kpan flɛ be nga bɔ b'a fa be atin'n trele be su kɔ nin-ɔn.

¹⁶ Ɔ flɛ be se be kɛ yoo: «Sran ng'ɔ si-man ngwlɛlɛ'n, ɔ `wlu wa.» Sran nga b'ɔ wun-man sa wlɛ'n kusu ɔ se i kɛ yoo:

¹⁷ «Like nga be wua be nɔn'n i fɛ liɛ'n, be kan-man. Aliɛ nga be ´di-ɔ be fia'n, be nyɛn-mɛn i wunsu.»

¹⁸ Sran nga bla sinnglinfuɛ sɔ'n flɛ i'n, ɔ si-man kɛ kɛ ɔ o lɛ'n, ɔ o wie'n i nuan'n nun. Ɔ si-man kɛ be nga bla sɔ'n flɛli be bɔ b'a bɛ i wun'n, b'a ju blɔlɔ lɔ ɔ'a wie.