Nyanndra Mun 8 - NYANMIƐN NDƐ'N 1998

Akunndan'n i nyanlɛ

¹ Sɛ Akunndan'n ti sran'n, wuun n ´se kɛ ɔ kpan, ngwlɛlɛ'n kan ndɛ. ?Amun ti-man?

² Kpɔlɛ'm bé ti su nglo yɛ ɔ wo-ɔ. Anngɔnda'm bé su yɛ ɔ tran-an.

³ Klɔ'm be anuan'm be nun yɛ ɔ tran-an, awlo'm be nun nin akpɔ dandan'm bé nuan yɛ ɔ jran yɛ ɔ kpan-an.

⁴ Sran mun, amun yɛ n kpan flɛ amun-ɔn. Klɔ sran mun, ndɛ nga n kan'n, amun yɛ n kan man amun-ɔn.

⁵ Ambɛfuɛ mun, amun `sɔnnzɔn ase wunlɛ, sinnglinfuɛ mun, amun `suan ngwlɛlɛ.

⁶ An `sie amun su, afin ndɛ ng'ɔ o mín nuan'n ti cinnjin, ndɛ nga b'ɔ ti kpa'n, yɛ n kan kle amun-ɔn.

⁷ Nanwlɛ ndɛ yɛ n kan-an. Gblɛ ndɛ sa fin-man mín nuan nun fite-man, ɔ ti min ciliɛ.

⁸ Ndɛ kwlaa ng'ɔ fin mín nuan fite'n ɔ ti nanwlɛ. Fiɛn fi nun-mɛn i wun, i wie cia-man.

⁹ Sran ng'ɔ ti ngwlɛlɛfuɛ'n, i kwlaa'n ti weiin i nyrun. Be nga be si sa'n, ɔ ti like kpa bé sa nun.

¹⁰ Mín nuan su ndɛ nga n fa mannin amun'n an `fa amún wla gua su, an `fa gua su tra sika. Akunndan nga m mannin amun'n, man ɔ yo amun nanndoliɛ tra sika ɔkwlɛ'n, ɔ tra sika ɔkwlɛ ng'ɔ ti jrɛiin kpa'n.

¹¹ Afin akunndan'n ti kpa tra nɛnnglɛnman, ɔ lɛ nyrun tra nanndoliɛ like'n kwlaa.

Akunndan'n i wun fa klelɛ

¹² M bɔbɔ min akunndan, like nga m'an wun be'n be sɔnnin. N si kan n ´ko sin nan m'an si akunndan bu'n.

¹³ Ɔ min kun ng'ɔ nyin yi Anannganman'n, san kpɔlɛ yɛ a ´kpɔ tɛ nin-ɔn. N liɛ'n, min like nga n klo-mɛn i'n yɛlɛ ijɔlɛ kpakpa'n nin tutre'n, nin sa tɛtɛ'm be yolɛ'n, ɔ nin gblɛgblɛ'm be kpɛlɛ'n.

¹⁴ Ndɛkɛn akunndan liɛ'n ɔ nin cɛn wie liɛ'n, min yɛ m man-an. Ngwlɛlɛ'n yɛlɛ min, wunmiɛn sa'n ɔ ti min liɛ.

¹⁵ Famiɛn'm be mɛn sielɛ'n, ɔ fin min. Nanwlɛ nga wlengbi'm be di'n, ɔ fin min.

¹⁶ Ngbɛn'm be klɔ sielɛ'n, ɔ fin min.

¹⁷ Be nga be klo min'n, n kusu n klo be. Be nga be kunndɛ min'n, be wun min .

¹⁸ Anyanbeun nin anyrunnyan'n, min yɛ m man-an. Ninnge kpakpa nga be cɛ'n, ɔ nin muae'n, min yɛ m man-an .

¹⁹ Like nga n fa man sran'n, i kpa tra sika ɔkwlɛ jrɛiin kpafuɛ'n. Be nyan su tra jɛtɛ ufue nga fiɛn nun-man nun'n.

²⁰ Nanwlɛ atin'n nun yɛ n nanti-ɔ, sɛsɛ atin'n i afiɛn yɛ n nanti-ɔ.

²¹ Kɛ n ´nanti sɔ'n, n yo be nga be klo min'n be ye. N yo be ye, be nyan bé wun kpa.

²² Anannganman i sa nuan ninnge ng'ɔ boli be'n, min yɛ n ti be klikli-ɔ. Min yɛ ɔ dun mmua yili min nan ɔ'a yi ninnge'n kwlaa-a.

²³ Ɔ fali min sieli i lɛ lalaa kpa, ɔ fali min sieli ka nan mɛn'n ɔ'a bo i bo .

²⁴ Kɛ min nyinma'n ´wun nyanmiɛn wun'n, wuun be si-man like ng'ɔ suan jenvie'n, wuun nzue nyinma kaan sa nun-man lɛ mlɔnmlɔn.

²⁵ Kɛ oka'm be ´fa fite bɔ be ´si kɛ kpɔlɛkpɔlɛ o lika'n nun'n, wuun b'a wu min,

²⁶ wuun i asiɛ o, i bo o, be nian yi-man wie fi. Kɛ ɔ ´yo sɔ'n, wuun fa nga be flɛ kɛ fa sa'n, be si-man like nga be flɛ i sɔ'n.

²⁷ Kɛ ɔ ´sie nyanmiɛn b'ɔ la nglo lɔ plaii'n, bɔ ɔ ´ja nzue bunman nin nyanmiɛn'n be afiɛn awɛ tɛɛn'n, n wunnin nun.

²⁸ Kɛ ɔ ´siesie nyanmiɛn ble'n nglo lɔ'n, bɔ asiɛ'n ´kɛ i bo mmua kpa fuun wa'n, bɔ nzue nyinma'm be ´tu kpuyɔ-kpuyɔ be ´gua'n,

²⁹ i nun bɔ ɔ ´kle jenvie'n i yi juwlɛ'n, nan nzue'n ɔ'a di-man asiɛ wunmuan'n, kɛ bɔ ɔ ´taka asiɛ'n ,

³⁰ wuun n wo i wun lɛ ń sa o junman'n su. Cɛn kwlaa n yo i klun sa man i klun jɔ klanman, wuun n ´kan ngowa i nyrun, ngowa'n yɛ n kɛn i sa mlɔnmlɔn-ɔn.

³¹ N kan ngowa sɔ'n mɛn ng'ɔ yili'n i asiɛ'n su. Kɛ ɔ fin lɛ'n, kɛ n wo sran'm be afiɛn'n, ɔ yo min fɛ.

Akunndan nun ndɛ

³² Min mma mun, an `sie amún su mín nuan'n bo. Be nga bɔ be fa min atin'n su'n, be liɛ su ti ye!

³³ Afɔtuɛ nga m man'n, amun `sie amún su be tie nan amu'an yo akunndanfuɛ. Nán an se kɛ amun fa-man su.

³⁴ Sran ng'ɔ sie i su mín nuan'n bo'n, bɔ aliɛ ba blu-nin-nso'n nun ɔ jin anuan'n nun, b'ɔ sasa min kofiaja mun'n, i liɛ su ti ye!

³⁵ Afin sran nga b'ɔ nyan min'n, wuun ɔ'a to nguan'n. Sɛ ɔ yo sa tɛ-ɔ, Anannganman kwla yaci cɛ i.

³⁶ Sran ng'ɔ yo min tɛ kusu-ɔ wuun ɔ ti kɛ ɔ'a yo i bɔbɔ wun tɛ. Be kwlaa nga be kpɔ min'n, ɔ ti kɛ wuun be klo wie'n ti-ɔ.