Nyanndra Mun 7 - NYANMIƐN NDƐ'N 1998

Bian safuɛ kun i gbanflɛn kun lakalɛ

¹ Mín wa, ndɛ nga n kan kle wɔ'n, nán be mlin ɔ klun. Min ngwlɛlɛ ndɛ nga n kan kle wɔ'n, man be tran ɔ klun.

² Sɛ a fa min ngwlɛlɛ ndɛ'm be su-ɔ a lɛ nguan. Min ndɛ nga n kan kle wɔ'n, fa be sie kpa. Sasa be kpa kɛ a fa sasa ɔ nyinma'n sa.

³ Nán fa be tratra ɔ́ sa bɛ'n nun. Fa be sie ɔ klun kpa!

⁴ Fa akunndan'n yo kɛ ɔ niaan bla wie sa. Fa ngwlɛlɛ'n kusu yo wɔ aenguɛ.

⁵ Akunndan nin ngwlɛlɛ sɔ'n be ´sasa wɔ bla nga be ti bian kunndɛfuɛ'n be lika. Be ´sasa wɔ bla nga be lɛ bian bɔ bé nuan nun ndɛ ti nɛnkɛn-nɛnkɛn'n be lika.

⁶ Le kun n jin min fenɛtri'n nun lɛ mín nyin ta gua su lɔ.

⁷ Ɔ liɛ gbanflɛn nga be si-man sa'n, be nun yasua kaan kun i sinnzin liɛ tra ngba, i sɔ'n ti nan m'an sie i nzɔliɛ.

⁸ Mmuɛ wie sin bla tɛtɛ sɔ'n kun i awlo'n nyrun lɛ. N ´wun i-ɔ ɔ'a fa mmuɛ sɔ'n, ɔ su to i ti bla sɔ'n i awlo'n i wun lɔ.

⁹ Kɛ ɔ ´yo sɔ'n, wuun nnɔsua nun-ɔn, wuun lika'n su yo mantan-mantan aosin'n su kunndɛ wla.

¹⁰ Yɛ bla'n ´fa ijɔlɛ'n wɔ i-ɔ. Bla sɔ'n i tralɛ wlawlɛ su'n, ɔ fa tekle bla. Yɛ kusu ɔ si gblɛ'n kpɛ kpa.

¹¹ I wun kpɛ kpa. Like nga be flɛ i kɛ nyannzuɛn sa'n, ɔ si-mɛn i. I bo sa'n, ɔ di-man ase awlo.

¹² Sɛ a wun-mɛn i akpɔ'n su'n, wuun ɔ o gua'n su, ɔ sa longolongo'm be nun cɛiin!

¹³ Kɛ e ´se yɛ'n, bla'n ɔ'a trɛ i ɔ'a tɔ i nun. Kɛ ɔ tɔli i nun sɔ'n, kpɛkuun ɔ tili i nyin'n bɔ cuan, ɔ seli i kɛ yoo:

¹⁴ «Min bo kun yolɛ i su tɛ wie yilɛ o mín wun, m'an yi i ndɛ. Like nga n fua kleli Nyanmiɛn'n, m'an fa mɛn i ndɛ.

¹⁵ I ti yɛ man m'an ba ɔ je tralɛ yɛ. N lɛ wɔ awuliɛ kpa, n si-man kɛ n kɔ wun wɔ yɛ w'a ba yɛ.

¹⁶ Min bɛ nga m'an sɛ'n, ɔ ti-man kan ngowa bɛ.

¹⁷ M'an fa lɛngɛ fiɛ, nin lawlɛ fiɛ nin suɛ bo m'an yo lɔ fanninfannin saa.

¹⁸ Bla, bla man e `ko kunndɛ é wun lele nan aliɛ'n cɛn ye. Bla man e di mɛn.

¹⁹ Mín wun nun-man awlo lɛ, ɔ tuli ajalɛ ɔli mmua kpa.

²⁰ Ɔ ´kɔ'n, ɔ fɛli i sika'n. Sika sɔ'n ɔ yi kotokun. San anglo'n ´fi b'ɔ ´ta'n, yɛ ɔ ´ba-a.»

²¹ Yɛ bla'n ɔ ´fɛ i gblɛ'n nin i nuan nun nɛnkɛn-nɛnkɛn'n ɔ ´fa nyan yasua kan sɔ nin-ɔn.

²² Kɛ e ijɔwa yɛ'n, ɔ su i su gunmɔngunmɔn kɛ nannin wie bɔ b'a fɛ i be su kɔ i kunlɛ'n sa, i sinnzin'n ti be nyɛnnin i nan b'a bo i bolɛ kpa.

²³ Ɔ suli i su sɔ lele san be ko wɔli i cua yɛ ɔ wunnin kɛ kannzu like ɔ'a yo i-ɔ. Ɔ ti kɛ anunman bɔ ɔ'a ko tɔ aya nun'n sa, afin kɔlɛ ng'ɔ ´kɔ lɛ'n, ɔ si-man kɛ wie atin yɛ ɔ'a fa-a.

²⁴ Nan i ti'n, min mma mun, an `sie amún su mín nuan'n bo, mín nuan nun ndɛ ng'ɔ fite'n, an `ti i kpa.

²⁵ Mín wa, nán wɔ anwlɛn'n kaci i sɔ bla liɛ'n i su. Nán fɛ i atin liɛ'n su, nan ko kun wɔ wun.

²⁶ Sran nga ɔ'a kun be'n b'a sɔn-man ngowa. Sran anyintiɛfuɛ'm, be o be nun.

²⁷ I awlo'n ti blɔlɔ atin. Atin sɔ'n ɔ jra kɔ lele ju blɔlɔ lɔ.