Nyanndra Mun 6 - NYANMIƐN NDƐ'N 1998

Sran ajalɛ nun jranlɛ

¹ Mín wa, sɛ sran kun ´ko usa sran wie afɛ'n nan sɛ wɔ yɛ a dun mmua i nyrun'n, b'ɔ ti kɛ sɛ ɔ'a kwlɛ-mɛn i tannin-ɔn wɔ yɛ be si wɔ'n,

² sɛ i sɔ ndɛ liɛ bɔ a kannin'n ɔ'a blabla ɔ́ ti wun'n, sɛ ɔ́ nuan su ndɛ'n ɔ'a tanndan ɔ́ ti wun'n,

³ like nga a ´ko yo'n, yɛlɛ ɔ́ ja yilɛ. Afin bɔ sran nga be usɛli i afɛ'n, wɔ yɛ ɔ si wɔ'n, kɔ ko koto i bo, srɛ i man ɔ yaci nan nán man ɔ bo ɔ dunman ndɛ sɔ'n nun kun.

⁴ Nán de ndɛ sɔ'n i wun wunmiɛn, yɛ sɛ ɔ nian wie-man'n, nán bu ɔ nyinma le. De wɔ wun.

⁵ Flo ndɛ sɔ'n nun kɛ wannzannin wie yɛ ɔ'a flo koniɛnfuɛ wie sa nun sa. Flo nun kɛ anunman wie yɛ ɔ'a flo koniɛnfuɛ wie sa bo sa.

Yaci fuɛn yolɛ'n

⁶ Fuɛnfuɛ, ko nian ijrewa mun. Nian be like bɔ be yo'n su siin. Sɛ a nian su'n, a wa nyan akunndan i nun!

⁷ Be lɛ-man kpɛn, be lɛ-man sunianfuɛ, be lɛ-man sran kle-man be like.

⁸ Sanngɛ wawa nun'n, be kunndɛ bé nuan nun aliɛ sie. Like nga bɔ be ko di'n, aliɛ fitelɛ blɛ nun'n, be tiɛntiɛn i nuan be sie.

⁹ Ɔo! ?Fuɛnfuɛ tɛ, nan lafilɛ'n bɔ sa yɛ a ´lafi sa mlɔnmlɔnmlɔn-ɔn? ?Nan dɔ onin su ko yɛ a ´tinnge-ɔ?

¹⁰ Sran ng'ɔ se kɛ: «Man n lafi kan ke. ?Ngwlɛ kaan sa bɔ n ´tɔn'n, ɔ yo i liɛ sɛ?» Sran b'ɔ bubu i sa nin i ja tran su, b'ɔ lafi'n,

¹¹ yalɛ'n yɛ ɔ ´fu i nun kɛ awiefuɛ sa-a. Nyrɛnnɛn'n yɛ ɔ ´fu ɔ nun kɛ kodiawiefuɛ fu sran nun sa-a.

Sran gblɛfuɛ klunwifuɛ

¹² Sran gblɛfuɛ klunwifuɛ'n, kɛ ɔ ´nanti sin'n, gblɛ'n yɛ ɔ o i nuan nun-ɔn.

¹³ Ɔ bubu i nyinma'n kplɛkplɛ yɛ ɔ fa laka sran mun-ɔn. Ɔ fɛ i ja nin i sama mun yɛ ɔ fa kan ndɛ-ɔ.

¹⁴ Gblɛ'n yɛ ɔ o i klun-ɔn. Sran wun akunndan tɛ'n yɛ ɔ sunnzun i liɛ titi-ɔ. Utre'n yɛ ɔ kpɛ i ba-a.

¹⁵ Cɛn nga sa ´tɔ i su'n, ɔ ti le kunngba. Be kunndɛ i ayre kusu-ɔ be su nyɛn-mɛn i. Awieliɛ tɛ'n yɛ ɔ ´wie i wia ba kunngba bo-ɔ.

Like nga Anannganman i nyin ci be'n

^16-19 Anannganman i nyin ci like nsiɛn: tutre kun, gblɛ kun, sran kunlɛ kun, sran wun akunndan tɛ bulɛ kun, sa tɛ yolɛ bɔ be fa cici bé ti'n kun, yɛ lalofuɛ ng'ɔ di-man ndɛ nanwlɛ'n. Sanngɛ kun ekun o lɛ bɔ i nyin ci i tra su, yɛlɛ sran ng'ɔ kpɛ lare yi i niaan nnyɔn be afiɛn'n.

Bé wun sasalɛ bla b'ɔ ti-man bé yi'n i lika

²⁰ Mín wa, ngwlɛlɛ nga ɔ́ si kle wɔ'n, man ɔ ka ɔ klun. Afɔtuɛ nga kusu bɔ ɔ́ nin man wɔ'n, nán man ɔ gua ɔ́ su sin.

²¹ Fa be sie ɔ klun cɛ! Fa be yo kɛ ɔ kɔmin nyanman sa, wla.

²² Kɛ a ´nanti sin'n, be yɛ be ´sasa wɔ-ɔ, kɛ a ´lafi'n, be yɛ be ´nian wɔ su-ɔ, kɛ a ´lafi tinnge'n, be ´kle wɔ ngwlɛlɛ.

²³ Afin afɔtuɛ'n ti kɛ kannin sa, ɔ kpaja bé bo. Afɔtuɛ'n ti kɛ tɛ sa, be fa wun bé bo. Fɔ tulɛ nga ngwlɛlɛfuɛ'n tu sran'n, ɔ ti nguan atin yɛ ɔ bo mɛn i-ɔ.

²⁴ Ninnge sɔ mun'n, be ti man bla tɛfuɛ'n ɔ su nyan-man wɔ. Ɔ man sɛ bla ng'ɔ ti-man ɔ́ yi'n lakalaka wɔ-ɔ ɔ su nyan-man wɔ.

²⁵ Nán niɛn i klanman'n ti klo i nan `wu i ti. Nán tran lɛ nan ɔ fɛ i nyinma'n laka wɔ.

²⁶ Sɛ a wu tekle bla wie ti'n, sɛ a nyan ɔ kpanndɔ kan-an, san a ´bu wie mɛn i. Bla ng'ɔ lɛ bian'n kusu, sɛ a wu i ti'n, ɔ ´lakalaka wɔ fa ɔ́ ti'n bo i mankun nzue nun.

²⁷ ?Wan cɛ yɛ ɔ tu sin wlɛ i i kondro'n bo bɔ i kondro sɔ'n yra-man-an?

²⁸ ?Wan cɛ yɛ ɔ tia sɛnmlɛn su b'ɔ yrɛ-mɛn i ja bo-ɔ?

²⁹ I kunngba'n yɛlɛ sran i yi bɔ sran uflɛ ko kunndɛ i'n. Sran ng'ɔ kunndɛ i wiengu yi'n, ɔ lɛ-man kɛ be ko tu-mɛn i fɔ.

³⁰ Sɛ awe kun sran nan sɛ ɔ ko fa sran wie like di'n, be se-man kɛ ɔ'a wua ti be `yo i finfin.

³¹ Sanngɛ sɛ be trɛ i-ɔ, like ng'ɔ fali'n san ɔ ´yi i wunsu sɔ kpɛ nso ɔ ´mɛn i fuɛ'n. Sɛ ɔ wie kɛ ɔ `yi i sua'n nun ninnge'n kwlaa man-an, san ɔ ´yi be man.

³² Sanngɛ sran ng'ɔ kunndɛ i wiengu yi'n, ngwlɛlɛ sa'n, ɔ nun-mɛn i ti liɛ'n nun. Sran ng'ɔ kunndɛ kɛ awieliɛ wie i'n, yɛ ɔ yo i sɔ sa liɛ nin-ɔn.

³³ Be ´bo i bolɛ kpa nan b'a sokpɛ i b'a nannan su. I liɛ'n kɛ be ´cici'n yɛ ɔ tɔli-ɔ. I nyrun nyannzuɛn sa'n, ɔ su wie-man le.

³⁴ Afin kwla silɛ'n ɔ wla sran yasua'n i nyannyrin. Sɛ i klunngbɔ yɛ i waan ɔ ´tu'n, ɔ si-mɛn i nin akɔ, ɔ si-mɛn i si akɔ.

³⁵ Man be mɛn i like lele man ɔ sɔn sɛ, ɔ ti-mɛn i ndɛ.