Nyanndra Mun 5 - NYANMIƐN NDƐ'N 1998

Bé wun su nianlɛ

¹ Mín wa, akunndan nga m man wɔ'n, sie ɔ́ su tie i kpa. Ngwlɛlɛ nga n kle wɔ'n, sie ɔ́ su tie.

² I liɛ'n akunndan nga m man wɔ'n ɔ ´ka ɔ́ ti'n nun, yɛ a ´si ijɔ.

³ Bian kunndɛfuɛ'm bé nuan nun ndɛ'n yo fɛ kpa. Ɔ ti nɛnkɛn-nɛnkɛn, awɛma nzue bɔbɔ fɛ i wun wɔ. Ɔ ti mlɛn-mlɛn kɛ ngo b'ɔ yo fɛ'n sa .

⁴ Sanngɛ kusu i sin wiwi'n tra kondu, ɔ wɔ tɛ kpa kɛ kanga kue b'ɔ lɛ i nyrun lɛ i sin'n sa.

⁵ Sɛ e kwla e se'n, wie'n i ndɛnman trelele yɛ ɔ kɔ-ɔ. Kan ɔ ´tu ajalɛ kɔ lɛ'n, blɔlɔ atin'n su yɛ ɔ ´kɔ lɛ-ɔ.

⁶ Atin nga be fa su-ɔ be ko nyan nguan'n, ɔ buɛ-mɛn i ndɛ nun.

⁷ I sɔ'n ti min mma mun, an `sie amún su mín nuan'n bo. Mín nuan su ndɛ nga n kan'n, nán an kpalo i.

⁸ Nán wɔ atin'n sin tekle bla'n i wun lɛ mlɔnmlɔn . Nán mɛntɛn i awlo'n i anuan'n bɔbɔ,

⁹ ɔ yo sɔ-ɔ, sran wie ko gua ɔ́ nyin ase ngbɛn, yɛ sran tɛ wie ko kun wɔ ngbɛn.

¹⁰ Ɔ yo sɔ-ɔ, sran wie ko di ɔ́ bo ninnge'n ngbɛn. Ɔ yo sɔ-ɔ, ɔ́ sa ti ninnge nga a nyɛnnin i'n, ɔ wiengu uflɛ wie ko fa.

¹¹ Ɔ yo sɔ-ɔ, ɔ gbanflɛn nzue'n ko wie wɔ nun, nan a ko koko

¹² ko se kɛ: «Ee! ?Ɔ yo sɛ bɔ m'an klo-man fɔ tulɛ nin-ɔn? ?Ɔ yo sɛ bɔ m'an klo-man kɛ be kan min nyrun ndɛ-ɔ?

¹³ ?Ɔ yo sɛ bɔ m'an sie-man mín su min like klefuɛ'm bé nuan bo m'an ti-man be aniɛn-ɔn? ?Ɔ yo sɛ bɔ m'an sie-man mín su ngwlɛlɛ klefuɛ'm bé nuan bo-ɔ?

¹⁴ Awieliɛ'n yɛ ɔ'a wie min yɛ, n lɛ-man nyrun klɔ'n nun kun.»

Be gbanflɛn nun bla'n i klolɛ'n ti kpa

¹⁵ Ɔ yi'n ti kɛ bla nun nzue jrɛiin'n sa. Nɔn ɔ bɔbɔ ɔ bla'n nun nzue'n. Nzue ng'ɔ fin ɔ gbo'n nun'n, yɛ nɔn-ɔn.

¹⁶ ?Kɛ ɔ nzue ti'n ɔ sonji ondua'n, i klanman lika'n yɛlɛ onin? ?Kɛ ɔ sonji gua'n su'n, i klanman lika'n yɛlɛ onin?

¹⁷ Nán man ɔ yo sɔ! Man ɔ yo ɔ kunngba liɛ. Nán ɔ yo wɔ nin sran uflɛ wie'm be liɛ.

¹⁸ Man ɔ nzue ti'n i wun yo wɔ fɛ titi. Ɔ gbanflɛn nun bla'n yɛ klo i titi-ɔ.

¹⁹ Ɔ yi ti klanman ngboko, a wun i sa-a, ɔ waan flete talua wie-ɔ . Man i wunnɛn ba sa'n ɔ jɔ ɔ klun titi. Man i klolɛ'n ti ɔ klun jɔ titi.

²⁰ ?Ɔo, mín wa, sran wie yi i klolɛ liɛ tre? ?A nin bla wie amun nun blalɛ liɛ'n tre?

²¹ Atin nga sran kun fɛ i sa'n, ɔ lɛ-man kun nga Anannganman nyin ta-man su-ɔ . Ɔ wun i ngba'n kwlakwla kpan!

²² Sran nga sa tɛ'n yɛ ɔ yo'n, sa tɛ sɔ'n ɔ ci i. Ɔ ti kɛ aya sa, ɔ trɛ i bɔbɔ.

²³ Ngwlɛlɛ b'ɔ si-mɛn'n ti ɔ wu. I sinnzin b'ɔ cɛnnin ngboko'n ti, awieliɛ'n wie i.