Nyanndra Mun 4 - NYANMIƐN NDƐ'N 1998

Akunndan'n i nyanlɛ nin i kpa sielɛ

¹ Min mma mun, amun `tie. An `sie amún su ndɛ nga amún si'n n kan'n i bo nan amu'an si akunndan.

² Afin ndɛ kpa yɛ n su kan kle amun lɛ-ɔ. Ngwlɛlɛ nga n kle amun'n, nán ɔ sin amún sa sin.

³ Min bakan nun'n, n kunngba yɛ n wo mín si nin mín nin bé sa nun-ɔn. Mín si kleli min ngwlɛlɛ, mín nin dili min ba.

⁴ Mín si'n kleli min ngwlɛlɛ, ɔ seli min kɛ yoo: «Min ndɛ nga n kan kle wɔ'n, man be tran ɔ klun. Mín nuan su ndɛ nga n kan be'n, sɛ a di su'n a lɛ nguan.

⁵ Bu akunndan, suan ngwlɛlɛ. Mín nuan su ndɛ'n, nán ɔ́ wla fi be yɛ nán kpa be su.

⁶ Nán yi akunndan'n i ase, ɔ ´uka wɔ. Klo i sa, i kusu ɔ ´fa wɔ sie.

⁷ Akunndan'n i bo bowlɛ'n yɛ. Tu ɔ́ nyin wɔ akunndan'n. Like kwlaa ng'ɔ o ɔ́ sa nun'n, fa kpɛ ngwlɛlɛ'n i wun atin.

⁸ Mɛnmɛn i. Sɛ a mɛnmɛn i'n, i kusu ɔ ´man wɔ su. Sɛ a fɛ i ta ɔ wue nun'n, i kusu man ɔ nyrun ´ba nyan.

⁹ Ɔ ´man ɔ kɔmin su. Ɔ ´yo kɛ sika kle yɛ b'a fa wla ɔ́ ti sa.»

Nán fa Klunwifuɛ'm be nzuɛn'n

¹⁰ Mín wa, sie ɔ́ su, sie ɔ́ su nan tie min aniɛn'n. Sɛ a tie min aniɛn'n, ɔ ti ɔ nguan nyanman su salɛ.

¹¹ Akunndan atin'n yɛ n ´kle wɔ lɛ-ɔ. Atin kpa'n yɛ m'an fa wɔ m'an sie su lɛ-ɔ.

¹² Sɛ a nanti su-ɔ, ɔ́ ja su kpla-man. Yɛ kusu, sɛ ɔ ti wanndilɛ-ɔ, a su tɔ-man.

¹³ Like nga be kle wɔ'n, tra nun kpa, nán yaci nun. Fa sie, afin i yɛ ɔ ti ɔ nguan nyanman nin-ɔn.

¹⁴ Klunwifuɛ'm be sinwlɛ liɛ'n nán fa su wie, sran nga i klun ti tɛ'n, i atin liɛ'n, nán ɔ́ ja kpɛn nun.

¹⁵ Nán wunnge i wun, nán sin nun mlɔnmlɔn. Sɛn i wun, bli sin lika uflɛ.

¹⁶ Afin sɛ be nian yo-man sa tɛ'n, be nian lafi-man. Sɛ be nian yo-man sran sa'n, lafilɛ sa ɔ kun-man be.

¹⁷ Klunwi yolɛ'n ti kɛ be aliɛ sa yɛ be di-ɔ. Sa kekleekle yolɛ'n ti kɛ be nzan sa yɛ be nɔn-ɔn.

¹⁸ Kɛ wia'n tu i bo b'ɔ ´kɔ'n, wuun i kpajalɛ'n ´uka su lele wia fa jran, sran kpa'n kusu kɛ i nzuɛn'n ti weiin sɔ-ɔ .

¹⁹ Klunwifuɛ'm be atin liɛ'n, aosin'n dun su tritritri. Like ng'ɔ ko yi be ase'n be wun-mɛn i.

Bé nyin lika kun sielɛ

²⁰ Mín wa, sie ɔ́ su kpa, tie min ndɛ nga n kan'n, sie ɔ́ su tie afɔtuɛ bɔ m man wɔ'n.

²¹ Nán man be fi ɔ́ nyin. Fa be sie ɔ klun kpa.

²² Afɔtuɛ sɔ'm be man be nga be si fa sie'n be nguan, be yɛ man bé kplo'n nun yo be juejue-ɔ.

²³ Ɔ ti'n bɔ a fa bu akunndan'n, sie i kpa tra ninnge'm be kwlaa, afin i nun yɛ nguan'n i bo'n fin-ɔn.

²⁴ Nán man ato'n ɔ tran ɔ́ nuan. Nán fa gblɛ tolɛ'n tra nun.

²⁵ Sɛ sran su kan ndɛ kle wɔ'n, man ɔ́ nyin tɛ i nyrun. Nán nian wa nian wa.

²⁶ Bu atin nga a fa su'n i akunndan. Atin nga a nian siin ɔ ti kpa'n, yɛ fa-a .

²⁷ Nán kɔ bɛ su, nán kɔ fama su, nán fa atin tɛ su.