Nyanndra Mun 31 - NYANMIƐN NDƐ'N 1998

Afɔtuɛ nga be fa man famiɛn'n

¹ Famiɛn Lɛmuɛl yɛ ɔ kannin ndɛ yɛ nin-ɔn. Afɔtuɛ nga i nin fa mɛnnin i nin-ɔn. I nin seli i kɛ:

² «Mín wa, min klun ba, min anwlɛn su ba, ndɛ yɛ n ´kan kle wɔ yɛ, sie ɔ́ su tie.

³ Nán saci ɔ wunmiɛn'n bla'm bé su. Wɔ atin nga a fa be'n, nán kle be bɔ be lakalaka famiɛn mun bɔ be mlin be'n.

⁴ Lɛmuɛl, famiɛn kun sa'n, ɔ nin i fata-man kɛ ɔ nɔn nzan. Nzan kekle'n, ɔ fata-man kɛ kpɛnngbɛn'm be fa cici bé ti .

⁵ Afin sɛ be nɔn be bo'n, bé wla ´fi mmla'n, yɛ be ´di yalɛfuɛ'm be ndɛ kwlɛ.

⁶ Sran ng'ɔ su wu'n, yɛ ɔ ti bɔ be mɛn i nzan kekleekle mun-ɔn. Sran nga klunngbɔ o i klun'n, yɛ ɔ ti bɔ be mɛn i nzan nin-ɔn.

⁷ Sɛ ɔ nɔn nzan'n i wla ´fi i wun, yɛ i wla ´trɛ i yalɛ nin i afɛ'm bé su.

⁸ Bobo'n nin be bɔ b'a yi be blo'n, jran bé nuan fa bé ti ndɛ `di.

⁹ Sɛ a ´kan ndɛ nin-ɔn, di nanwlɛ weiin. Aunnvuɛfuɛ mun nin yalɛfuɛ mun, fa bé ti ndɛ `di.»

Kɛ bla waka-waka'n ɔ fa ti'n

¹⁰ Sran ng'ɔ nyan bla kpa'n, wuun ɔ'a nyan like dan. Afin i sɔ bla liɛ'n i kpa tra nɛnnglɛnman'n lelele.

¹¹ I wun fɛ i wla'n guɛ i su. Like kwlaa nga bian sɔ'n ɔ kunndɛ'n ɔ nyɛn i.

¹² Sa kpa yɛ ɔ yo bian'n cɛn kwlaa-a. Ɔ lɛ-man kɛ ndɛ ɔ'a yo i tɛ.

¹³ Ɔ jin bua ndrɛ kpɛlɛ'n su, yɛ ɔ jin lɛn kplɔkɔɔ'n i kunndɛlɛ'n su. Ɔ fa-man junman dilɛ'n kankan-man ngowa.

¹⁴ Ɔ ti kɛ mmeli b'ɔ sua aata ninnge'n sa. Ɔ ko fɛ i nuan nun aliɛ'n mmua kpa yɛ ɔ fa ba-a.

¹⁵ Aliɛ cɛn-mɛn i bɛ su, i afanniɛn mmla'm be junman nga be ko di'n, ɔ klekle be nun kpa. A ´nian-an, i awlofuɛ'm be aliɛ'n ɔ'a be.

¹⁶ Sɛ ɔ bu asiɛ wie akunndan'n, a ´nian-an, ɔ'a to .

¹⁷ Ɔ di junman'n kpa kɛ ɔ fata'n sa. Ɔ fa kankan-man ngowa.

¹⁸ Ɔ wun kɛ like ng'ɔ yo'n, ɔ nyɛn i nuan like. I kannin'n ɔ nuan-man kɔnguɛ.

¹⁹ Ɔ to jese, i kunngba'n ɔ wu tralɛ.

²⁰ Be nga be o nyrɛnnɛn nun'n, ɔ uka be.

²¹ Ayrɛ blɛ nun'n, ayrɛ kpɛkpɛ kpa'n nun bɔbɔ'n, i klun ti-mɛn i. Afin i awlofuɛ'm be kwlaa be lɛ ayrɛ tralɛ sɛsɛsɛ.

²² Ɔ yo kondro mun. Ɔ wla tralɛ kplɛkɛɛ klanman nga lɛn youn yɛ be fa yoli be'n yɛ ɔ kla i sɔ tannin mun.

²³ Klɔ'n su kpɛnngbɛn'm be nun, i wun'n lɛ nyrun. Kɛ ɔ nin i wiengu mun yia'n, be bu i sran.

²⁴ Ɔ kpa tralɛ mun, ɔ yo be atɛ. Ɔ yo bé bo kplo atɛ aata difuɛ'n i sa nun.

²⁵ Wunmiɛn nin anyrunnyan ninnge mun, sɛ be ti tralɛ'n, wuun be ´se kɛ i sɔ ninnge mun yɛ be wlɛ i wun-ɔn. Kɛ ɔ bu i nyrun atin'n i akunndan'n, i klun kaan sa ti-mɛn i trɛ.

²⁶ Ndɛ kun nga b'ɔ uke i nuan kɛn i sa'n, ɔ ti akunndan ndɛ. Kpɛkuun ngwlɛlɛ ndɛ nga bɔ sran ti-ɔ ɔ yo i fɛ'n, yɛ ɔ wo i nuan-an.

²⁷ Like kwlaa nga be yo i awlo nun'n ɔ fɛ i nyin sie su. Ɔ kplin i nyin tɔn aliɛ kpa yɛ ɔ fa mɛn i awlofuɛ mun-ɔn .

²⁸ I mma'm be jaso-ɔ, be yo i mo! I wun kusu jaso-ɔ, ɔ yi i ayɛ. Ɔ sɛ kɛ:

²⁹ «Bla nga bɔ be nantilɛ'n ti klanman'n be sɔnnin. Sanngɛ ɔ liɛ'n ɔ tin be ngba be liɛ'n su.»

³⁰ Be wunnɛn su saun yolɛ'n, nɛ́n i-ɔ, ɔ laka sran. Klanman'n ti ngbɛn, ɔ yro. Bla nga i nyin yi Anannganman'n, i yɛ ɔ nin manmanlɛ'n fata-a.

³¹ I junman klanman b'ɔ di'n ti man be yo i mo, yɛ be yo i kwla. I sa ti like ng'ɔ yo be'n be ti man klɔ wunmuan'n mɛnmɛn i.