Nyanndra Mun 30 - NYANMIƐN NDƐ'N 1998

Agir i ndɛ mun

¹ Zake i wa Agir yɛ ɔ kannin ndɛ yɛ nin-ɔn. «M'an fɛ, m'an kpɛ Nyanmiɛn sin atin'n lele m'an fɛ ngbɛn.»

² Min sinnzin liɛ'n nin sran fi liɛ'n sɛ-man. Sran'm be ngwlɛlɛ liɛ nga be si i'n, n si-man wie.

³ Ngwlɛlɛ nga bɔ man n ko si Nyanmiɛn'n, m'an suan-man.

⁴ ?Wan li cɛ yɛ ɔ'a fu Nyanmiɛn su lɔ bɔ ɔ'a ba-a ? ?Wan li cɛ yɛ ɔ'a fɛ i sa ɔ'a tra aunngban le-ɔ? ?Wan li cɛ yɛ ɔ'a fa nzue'n ɔ'a bo i tralɛ i nuan le-ɔ? ?Wan yɛ ɔ siesieli asiɛ'n i nuan su nin-ɔn? ?Sran sɔ'n be flɛ i sɛ? ?Be flɛ i wa'n sɛ? Sɛ a si i-ɔ, kan.

⁵ Nyanmiɛn ndɛ'n i kwlaa ti nanwlɛ lele kpe nun. Be nga be talo Nyanmiɛn'n, ɔ sasa be kɛ nyrɛn sa.

⁶ I nuan su ndɛ sa'n, nán kpɛ wie gua su. Sɛ ɔ yo sɔ-ɔ, ɔ ti kɛ w'a yo gblɛfuɛ sa, ɔ nin wɔ be ´nyɛn i.

⁷ Agir kɛnnin i ekun kɛ: «Min Min Anannganman, like nnyɔn cɛ yɛ n srɛ wɔ-ɔ. Kɛ min nyin tɛ o su'n, nán kpɛ min like sɔ mun.

⁸ Be yɛ: nán man n kpɛ gblɛ yɛ nán man m bua ato le. Nán man n di yalɛ kusu nán man n nyan mín wun. Mín nuan nun aliɛ b'ɔ ju min'n yɛ ´man min-ɔn.

⁹ Sɛ n nyɛn i pɛ'n, ɔ cɛ-man nan mín wla'n ɔ'a tra wɔ su nan m'an se kɛ: ‹?Wan li yɛlɛ Anannganman?› Sɛ yalɛ'n kusu yɛ ɔ di min'n, ɔ cɛ-man nan m'an ko wua nan m'an gua ɔ i nyin ase .»

¹⁰ I waan nán tɔn akua'n i suɛn kle i min'n. Ɔ cɛ-man nan ɔ'a bo wɔ sannzan nan w'a wun i nuan.

¹¹ Sran wie o lɛ'n, sannzan yɛ ɔ bo i si-ɔ, i nin i wun ndɛ tɛtɛ'n yɛ ɔ kan-an.

¹² Sran'n wie o lɛ'n, ɔ bu i wun saun kusu wuun ɔ nian salo-mɛn i wun fiɛn'n le.

¹³ Sran'n wie o lɛ'n, ɔ yo-mɛn i wun kpakpa ngowa. Sran fi ti-man sran i nyrun.

¹⁴ Sran wie'm be o lɛ'n, be je'm be la kɛ kue sa yɛ bé nuan'm be la kɛ laliɛ sa. Mɛn'n nun afɛfuɛ'm be ti kɛ be nnɛn sa yɛ be di-ɔ. Be nin yalɛfuɛ'm be lɛ i. Be kunndɛ kɛ be ´yi be sran nun.

Nyanndra nga be bo ninnge'm bé nuan'n be nun'n

^15-16 Amlɛnmlɛn lɛ ba bla nnyɔn. Ndɛ nga be kɛn i titi'n yɛlɛ kɛ: Fa man min! Fa man min! Like nsan be o lɛ bɔ be ku yi-man. Kun ekun uka bé su. Be nian se-man le kɛ: «Ɔ'a yo kpa sɔ.» Be yɛlɛ blɔlɔ'n nin bla klunkpanfuɛ'n, nin asiɛ b'ɔ srɛ nzue'n, ɔ nin sin'n. Be nian se-man le kɛ: «Ɔ'a yo kpa sɔ.»

¹⁷ Sran nga b'ɔ sri i si'n, bɔ i nyin yi-mɛn i nin'n, kuankuan'm be ´fiti i nyinma'n, kpɛkuun anunman nyin'n i mma'm be ´di i.

^18-19 Like nsan be tra min kpɛn. Sanngɛ kun ekun wo lɛ n wun-mɛn i wlɛ mlɔnmlɔn. Kun yɛlɛ atin nga anunman nyin fa b'ɔ fa tu sin nglo lɔ bɔ be wun-mɛn i osu'n. Kun ekun yɛlɛ wuo b'ɔ cuɛn i wun ase yɛbuɛ su bɔ be wun-mɛn osu'n. Kun ekun yɛlɛ atin nga mmeli'n fa b'ɔ fa sin jenvie'n su kɔ bɔ be wun-mɛn osu'n. Yɛ kun ekun yɛlɛ like ng'ɔ su yasua kun bo bɔ i ti yɛ ɔ kɔ bla i wun'n.

²⁰ Bla nga b'ɔ kunndɛ bian i wun bo'n, i atin ng'ɔ fa su'n yɛ. Ɔ di like'n kpɛkuun ɔ nunnun i nuan wun kpɛkuun ɔ se kɛ yoo: «M'an yo-man sa tɛ fi.»

^21-23 Like nsan yɛ be keje asiɛ nin-ɔn. Sanngɛ kun ekun o lɛ bɔ asiɛ'n kwla suɛn-mɛn i bo. Kun yɛlɛ kanga'n i mɛn sielɛ'n. Kun ekun yɛlɛ sinnglinfuɛ bɔ aliɛ bu i sa su'n. Kun ekun yɛlɛ bla ng'ɔ ti finfinfuɛ sanngɛ ɔ nyan bian ja'n. Yɛ i kun ekun yɛlɛ afanniɛn bla b'ɔ di i min bla'n i aja'n.

²⁴ Nnɛn kanngan nnan be o asiɛ'n su. Be ngwlɛlɛ nga be si i'n ɔ ti dan.

²⁵ Ijrewa'm be lɛ-man wunmiɛn mlɔnmlɔn, sanngɛ aliɛ nga be ko di'n, kɛ wawa'n ko kpɛn'n be kunndɛ be sie.

²⁶ Oya'm be lɛ-man jransuɛ mlɔnmlɔn, sanngɛ kpɛkuun be yo bé sua'n yɛbuɛ-yɛbuɛ'm be nun.

²⁷ Lalo'm be lɛ-man famiɛn, sanngɛ kpɛkuun be ´fite kɔ lika-a, be sin akpasua-akpasua.

²⁸ Ablɔ bɔ be trɛ i bé sa nun-ɔn ɔ yo ye'n, sanngɛ kpɛkuun famiɛn'm bé sua nun yɛ ɔ wluwlu lele ko tran-an.

^29-31 Like nsan be o lɛ, be nantilɛ'n ɔ yo nyɛnmɛn, sanngɛ kun ekun o lɛ bɔ i nantilɛ'n ɔ yo nyɛnmɛn tra su. Kun yɛlɛ asɔmɔli b'ɔ ti nnɛn'm be famiɛn'n b'ɔ wanndi-man like fi nyrun'n. Kun ekun yɛlɛ nnɛn kpanngɔ bɔ b'a fɛ i su fulɛ like b'a wlɛwlɛ i wun'n, kun ekun yɛlɛ boli kpakpuɛ'n, yɛ kun ekun yɛlɛ famiɛn bɔ i sonja'm bɔ b'a yia b'ɔ su tiatia kɔ'n.

³² Sɛ wun tulɛ'n ɔ su wɔ bo kɛ a yo sinnzin sa'n yɛ sɛ wɔ akunndan'm be ti tɛtɛ'n, fa ɔ sa sie ɔ́ nuan'n su nan w'a ijɔ-man tɛtɛ.

³³ Afin kɛ be tɔn kpetre'n yɛ ɔ yo blɔ nin-ɔn. Sɛ be mian be bue nin-ɔn, ɔ tu mmoja. Ya bɔ be klɔklɔ i'n kusu yɛ ɔ flɛ utre nin-ɔn.