Nyanndra Mun 3 - NYANMIƐN NDƐ'N 1998

Bé nyin b'ɔ yi Nyanmiɛn'n

¹ Mín wa, ndɛ nga n kan kle wɔ'n, nán be mlin ɔ klun. Yɛ like nga n kle wɔ'n, nán ɔ́ nyin kpa be su.

² Afin sɛ a ´cɛ asiɛ'n su'n, ɔ fin be. Sɛ a ´di alaje'n, ɔ fin be.

³ Nán yaci klun-ufue yolɛ'n, nán ɔ́ nyin kpa sran su. Man ninnge sɔ'm be yo wɔ cinnjin kpa .

⁴ I liɛ'n, sɛ ɔ ti klolɛ-ɔ, a ´nyɛn i Nyanmiɛn nin i sran'm bé sa nun . A nin bé nuan ´sɛ.

⁵ Nán lafi ɔ bɔbɔ wɔ akunndan liɛ'n su. Anannganman i su yɛ lafi-ɔ.

⁶ Sɛ a ´fin ase o a ´jao o, Anannganman i dunman yɛ bo-ɔ. Sɛ a bo i dunman'n, ɔ ´bo ɔ nyrun atin'n.

⁷ Nán bu ɔ wun kɛ a si akunndan, man ɔ́ nyin yi Anannganman, nán yo tɛ .

⁸ I liɛ'n, ɔ wunnɛn'n nun ´sanndi wɔ weiin, ɔ́ wun ´jɔ wɔ fɔuun!

⁹ Fa ɔ́ sa nun ninnge kpakpa'n wie la Anannganman i ase. Ɔ fie'n su ninnge klikli nga a dun mmua nyan be'n, fa be lɛ i ase .

¹⁰ Kɛ ɔ ko yo sɔ'n, ɔ tanngannin'm be ´yi, aliɛ'n ɔ ´yi be. Ɔ tomua'm be ´yi be ´bu gua. Nzan lɔflɛ'n ɔ ´yi be.

¹¹ Mín wa, sɛ Anannganman tu wɔ fɔ'n, nán se kɛ a fa-man ɔ́ su sie-mɛn i bo . Sɛ ɔ kpan wɔ su'n, nán ɔ klun titi wɔ mlɔnmlɔn.

¹² Afin sran nga bɔ Anannganman klo i'n, yɛ ɔ tu i fɔ-ɔ. Siɛ b'ɔ klo i wa'n kɛ ɔ yo i sɔ-ɔ .

Akunndan nin muae

¹³ Sran nga b'ɔ si akunndan'n, nanwlɛ, i liɛ su ti ye! Yɛ sran nga b'ɔ si ngwlɛlɛ'n, aa, sakpa, i liɛ su ti ye!

¹⁴ I liɛ su ti ye, afin mmlusuɛ nga be nyɛn i su'n, i nyrun ba nyan tra jɛtɛ ufue su mmlusuɛ liɛ'n. Ngwlɛlɛ'n i su like ng'ɔ nyɛn i'n, i kpa tra sika ɔkwlɛ.

¹⁵ Be miɛn i sa tra nɛnnglɛnman. Ninnge nga be to be gua kpan'n, ɔ yo nɔnnin tra be.

¹⁶ Ɔ man sran sɔ'n i nguan tɛnndɛn, yɛ ɔ mɛn i anyanbeun nin anyrunnyan.

¹⁷ I atin'm be ti kpa. I atin mma'm be kwlaa be su falɛ yo fɛ.

¹⁸ Be nga be nyɛn i'n, ɔ man be nguan.

¹⁹ Akunndan'n yɛ Anannganman fa yili asiɛ nin-ɔn. Ngwlɛlɛ'n yɛ ɔ fa yoli nyanmiɛn su lɔ nin-ɔn .

²⁰ I sa silɛ'n yɛ ɔ fa tikeli asiɛ'n i bo lɔ nzue'n i nyinma mun-ɔn, i yɛ man nyanmiɛn'n gua bɔlɛ'n i ase-ɔ.

Anannganman sasa akunndanfuɛ'n

²¹ Mín wa, nán ndɛ nga'm be fi ɔ́ nyin. Man akunndan nin ngwlɛlɛ ndɛ nga'm be ka ɔ klun.

²² Be yɛ be ti ɔ nguan nyanman nin-ɔn. Be yɛ be ti ɔ kɔmin njuaba nin-ɔn.

²³ Kɛ ɔ ko yo sɔ'n, atin nga a ´fa bɔ a ´nanti su'n, ɔ́ ja'n ɔ ´ti asiɛ. Yɛ kusu ɔ́ ja su kpla-man.

²⁴ Sɛ a ´la'n, ɔ klun su titi-man wɔ. A ´la yɛ a ´lafi klanman.

²⁵ Sɛ ɔ wie sa kekle wie yɛ ɔ fu wɔ nun'n, nán srɛ kun wɔ. Sɛ klunwifuɛ yɛ ɔ nin wɔ be nyɛn i'n, nán srɛ kun wɔ.

²⁶ Afin Anannganman yɛ ɔ ti ɔ sasafuɛ-ɔ. Sɛ be sua aya ɔ́ bo-ɔ, Anannganman man a su tɔ-man nun.

Be wiengu klolɛ

²⁷ Sɛ a lɛ ninnge nan ɔ wiengu lɛ-man wie'n, nán yo i anwɛn .

²⁸ Sɛ like o ɔ́ sa nun nan sɛ ɔ wiengu srɛ wɔ'n, nán se i kɛ: «Kɔ nan w'a ba, ainman n ko man wɔ .»

²⁹ A nin ɔ wiengu wie be o, bɔ yɛ ɔ o i olɛ bliin'n, nán sunnzun i nin tɛ.

³⁰ Sɛ ɔ wiengu kun ɔ'a yo-man wɔ tɛ'n, nán a nin i be kaci bé nuan.

³¹ Anwlɛn fufufuɛ'm be like nga be yo'n nán nian su yo wie. Be atin nga be fa su'n, nán fa wie fi su.

³² Afin Anannganman nyin ci klunwifuɛ mun. I aenguɛ kusu yɛlɛ klun-ufuefuɛ mun.

³³ Sa wiwi'n cɛ yɛ Anannganman to yi klunwifuɛ'n i awlo nun-ɔn. Klun-ufuefuɛ'm be kusu, muae klanman yɛ ɔ bo man be-ɔ.

³⁴ Be nga bɔ sran yɛ be sri i'n, srilɛ yɛ Anannganman kusu sri be-ɔ. Sanngɛ anyinyiɛfuɛ mun'n, ye yɛ ɔ fa yo be-ɔ .

³⁵ Anyrunnyan'n ti akunndanfuɛ'm be liɛ. Be nga be wun-man sa wlɛ'n kusu nyannzuɛn dan'n ti be liɛ.