Nyanndra Mun 29 - NYANMIƐN NDƐ'N 1998

¹ Sran nga bɔ ɔ'a yo-man sa kpa bɔ i waan nán be tu i fɔ mlɔnmlɔn'n, cɛn ng'ɔ ´tɔ'n ɔ ti le kunngba.

² Kɛ sran kpa'm be sɔn'n, ɔ ti sran'm be cenjele like. Kɛ klunwifuɛ'n yɛ ɔ kwla'n, sran'm be koko.

³ Sran ng'ɔ klo kɛ ɔ ´si akunndan'n, sran sɔ'n ti i si klun jɔ. Sran nga kusu bɔ tekle mmla'm bé wun yɛ ɔ kɔ'n, ɔ mlin i wun ninnge kpakpa mun.

⁴ Sɛ famiɛn kun ɔ yo sa i nuan su'n, yɛ i mɛn'n kɔ i nyrun-ɔn. Sɛ lapo nga i waan i sran'm be su'n ɔ cɛnnin'n, ɔ saci mɛn'n.

⁵ Sran ng'ɔ lɛkɛ i wiengu'n, ɔ sua i bɔbɔ wun aya.

⁶ Klunwifuɛ'n i sa ng'ɔ yo'n ɔ ti i bɔbɔ wun aya yɛ ɔ sua-a. Sran kpa'n kusu i klun jɔ lele bobo su.

⁷ Klun-ufuefuɛ'n ɔ jin yalɛfuɛ'm bé sin, sanngɛ klunwifuɛ'n si-mɛn i sɔ akunndan'n.

⁸ Sran finfin yofuɛ'm be junman liɛ nga be di i klɔ wunmuan nun'n yɛlɛ ndɛnngan ba kpɛlɛ. Akunndanfuɛ'm be kusu be liɛ'n yɛlɛ be bɔ b'a fa ya'n be kpatalɛ.

⁹ Sɛ ngwlɛlɛfuɛ kun nin sinnglinfuɛ kun be nyan akplowa silɛ'n, man ngwlɛlɛfuɛ'n ɔ fa ya sɛ annzɛ kusu man ɔ sri sɛ, nán kɛ be wa ti bé wun aniɛn ti-ɔ.

¹⁰ Sran kunfuɛ'm bé nyin ci nanwlɛ difuɛ'n, sanngɛ sran kpa'm be sɛsɛ i.

¹¹ Sɛ sinnglinfuɛ fa ya-a, ɔ yi i nglo. Sanngɛ ngwlɛlɛfuɛ'n i liɛ'n, be wun-mɛn i.

¹² Sɛ be kpɛ gblɛ be kle kpɛnngbɛn kun nan ɔ fa su'n, san klunwifuɛ'm be ngunmin yɛ be mɛntɛn i-ɔ.

¹³ Yalɛfuɛ'n nin sran ng'ɔ yo yalɛfuɛ'm be tɛtɛ'n be ti kun. Be kun bɔ be ti'n yɛlɛ kɛ Anannganman yɛ man be nnyɔn'n be nyinma wun ase-ɔ.

¹⁴ Famiɛn kun nga b'ɔ di yalɛfuɛ'm be ndɛ klanman'n, i sielɛ'n taka kpa.

¹⁵ Nyantiaan'n nin fɔ tulɛ'n be kle ngwlɛlɛ, sanngɛ ba nga bɔ i bɔbɔ yɛ ɔ sie i wun'n, ɔ guɛ i nin nyin ase.

¹⁶ Kɛ klunwifuɛ'm be ´sɔn kɔ'n, wuun sa tɛtɛ'n kusu ´kɔ i nyrun.

¹⁷ Tu ɔ́ wa'n i fɔ. Sɛ a tu i fɔ'n, wɔ anwlɛn'n ɔ ´tɔ ɔ nun yɛ ɔ klun ´jɔ.

¹⁸ Blɛ nga Nyanmiɛn yi-man sa nglo kle-man sran'n, sran'm be yo ninnge sukusuku. Sran ng'ɔ fa Nyanmiɛn mmla'n su'n, i liɛ su ti ye !

¹⁹ Nán bé nuan'n yɛ be fa tu akua'n i fɔ-ɔ. Afin kannzɛ ɔ wun sa'n jrɛiin, sanngɛ ɔ fa-man su.

²⁰ Sran ng'ɔ kan ndɛ ka nan ɔ'a bu akunndan'n, i sɔ sran liɛ'n sinnglinfuɛ'n bɔn fannin trɛ i.

²¹ Akua nga b'a yo-mɛn i akua yolɛ i kaan nun'n, kɛ ɔ ´ju kɔ'n, ɔ bu i wun diewa ba.

²² Sran nga i anwlɛn ti fufu'n, ɔ kpɛ utre ba. Nga b'ɔ ti nyannyrinfuɛ'n ɔ yo sa tɛtɛ sunman.

²³ Wun tulɛ'n ɔ gua bé nyin ase. Sanngɛ sran ng'ɔ kɛn i wun ase'n ɔ nyan nyrun.

²⁴ Sran ng'ɔ nin awiefuɛ'n be cɛ i awie ninnge nun'n, i sɔ sran liɛ'n ɔ kpɔ i bɔbɔ wun. Ɔ si kɛ be su wua amuɛn, sanngɛ ɔ kan-man ndɛ fi.

²⁵ Srongble'n i agualiɛ'n ti-man kpa. Sran ng'ɔ fɛ i wun wlɛ i Anannganman sa nun'n i liɛ'n, kɛ ɔ o lɛ'n yɛ ɔ wo-ɔ.

²⁶ Sran sunman be kunndɛ kɛ sran ng'ɔ sie be'n ɔ yi be ayɛ. Sanngɛ kɛ Anannganman yi sran ayɛ'n, yɛ ɔ ti i su-ɔ.

²⁷ Nanwlɛfuɛ'm be klo-man gblɛfuɛ'm bé sa. Klunwifuɛ'm be kusu, be klo-man sran kpa'm bé sa.