Nyanndra Mun 28 - NYANMIƐN NDƐ'N 1998

¹ Klunwifuɛ'n, sran fuɛn-mɛn i, i bɔbɔ o lɛ kpɛkuun ɔ su ´wanndi. Klun-ufuefuɛ'n i liɛ'n, ɔ lafi i wun su kɛ asɔmɔli gbanflɛn sa.

² Kɛ sannganlɛ'n ko tɔ mɛn kun nun'n, i su ngbɛn'm be sɔn. Sanngɛ sɛ mɛn sɔ'n wo kpɛnngbɛn b'ɔ si ngwlɛlɛ, b'ɔ si sa'n, i sa nun'n, ɔ taka kpa.

³ Yalɛfuɛ bɔ b'a sie i bia su'n, b'ɔ mian-mian aunnvuɛfuɛ mun'n, ɔ ti kɛ nzue ng'ɔ tɔ b'ɔ saci fie'n su ninnge mun b'ɔ man awe kpɛn'n sa.

⁴ Be nga bɔ be fa-man Nyanmiɛn mmla'n su'n, be manman klunwifuɛ'n. Be bɔ be fa su'n kusu be nin klunwifuɛ'n bé ti sɛ-man.

⁵ Sran nga sa tɛ'n yɛ be waan be `fa man be nan be yo'n, be si-man sa nuan su yolɛ'n i bo. Sanngɛ be nga be mantan Nyanmiɛn'n, be liɛ'n be wun sa'n kwlaa wlɛ.

⁶ Kɛ be se kɛ n ti anyanbeunfuɛ kusu wuun n ti gblɛfuɛ'n, ɔ flunman kɛ n `yo yalɛfuɛ nan n yo nanwlɛfuɛ.

⁷ Ba ng'ɔ fa Nyanmiɛn mmla'n su'n, ɔ ti ba ngwlɛlɛfuɛ. Sanngɛ ba nga b'ɔ nin sran tɛtɛ mun yɛ be san nun'n, ɔ guɛ i si i nyin ase.

⁸ Sɛ sran kun ɔ nyɛn i wun sran'm be asubo manlɛ nun, i bo ninnge ɔ ´yo be nga be si yalɛfuɛ'm be aunnvuɛ'n be liɛ .

⁹ Sran nga bɔ kɛ be ´kan Nyanmiɛn mmla'n ɔ klo-man kɛ ɔ `ti wie'n, i Nyanmiɛn ng'ɔ srɛ'n bɔbɔ ɔ jɔ-man Nyanmiɛn i klun .

¹⁰ Sran kwlaa ng'ɔ lakalaka klun-ufuefuɛ mun, b'ɔ mlin be'n, i sɔfuɛ'n bli i nyin tɔ aya nga i bɔbɔ suali'n nun. Sanngɛ sran kpa'm be ´nyan muae.

¹¹ Anyanbeunfuɛ'n wun i wun-ɔn, i waan ɔ si ngwlɛlɛ. Sanngɛ yalɛfuɛ ng'ɔ lɛ akunndan'n, ɔ kwla wun anyanbeunfuɛ sɔ'n i sa'm bé bo.

¹² Sɛ klun-ufuefuɛ mun yɛ be sie klɔ'n, kɔmin nga be nyɛn i'n ɔ ti sran kwlaa liɛ. Sanngɛ sɛ klunwifuɛ mun yɛ be o lɛ'n, sran'm be fia.

¹³ Sran ng'ɔ fia sa tɛtɛ ng'ɔ yo be'n be su'n, ɔ yo-man kpa. Sanngɛ sran ng'ɔ kɛn i sɔ sa liɛ mun'n, b'ɔ yaci be yolɛ'n, Nyanmiɛn'n yaci í wun sa'n cɛ i .

¹⁴ Sran ng'ɔ sro sa tɛ'n i yolɛ mlɔnmlɔn'n, i liɛ su ti ye! Sran nga kusu bɔ be se i sa-a ɔ fɛ-mɛn i ti de-man'n, san nyrɛnnɛn'n yɛ ɔ ´tɔ i su-ɔ.

¹⁵ Famiɛn wlɛfuɛ b'ɔ sie sran yalɛfuɛ mun b'ɔ tin be su'n, ɔ ti kɛ asɔmɔli b'ɔ su kpan'n sa, yɛ ɔ ti kɛ atiekle bɔ awe kun i'n sa.

¹⁶ Mɛn siefuɛ kun b'ɔ si-man ngwlɛlɛ'n, i bo mma'm be mian-mianlɛ sa cɛ yɛ ɔ mian-mian be titi-ɔ. Nga kusu b'ɔ sro ndrunmun dilɛ'n, ɔ ´cɛ kpɛn dilɛ'n nun.

¹⁷ Sran ng'ɔ kun sran b'ɔ lɛ i wun-ɔn, ɔ lafi-man b'ɔ kunndɛ kɛ ɔ ´kun i wun wie ndɛndɛ'n, sɛ ɔ ´kɔ i wun kunlɛ'n, be `yaci i nun, nán be trɛ i.

¹⁸ Sran ng'ɔ nanti sein'n, ɔ ´nyɛn i ti. Gblɛfuɛ nga kusu b'ɔ kpanndan sin atin nnyɔn su'n, san ɔ ´fin ase kun nun.

¹⁹ Sran ng'ɔ di fie'n, i ku yi. Sran nga kusu bɔ finfin'n yɛ ɔ yo sin'n, san yalɛ'n yɛ ɔ di i-ɔ.

²⁰ Sran nga b'ɔ nian sa ng'ɔ ti i su'n su yo'n, san muae cɛ yɛ ɔ ´nyɛn i-ɔ. Sanngɛ sran nga bɔ i waan ɔ ´kpli nyɛn i wun'n, san ɔ ´tɔ nyrɛnnɛn nun.

²¹ Ndɛ kwlɛ dilɛ'n ti-man kpa. Sanngɛ sran wie mun'n, bé nuan nun aliɛ ngbɛn sa'n ti, be yo i sɔ gblɛ sa liɛ'n.

²² Kɛ konvifuɛ'n ɔ `kpli nyɛn i wun'n, ɔ si-man kɛ sa yalɛ'n ɔ wa tɔ i su.

²³ Sran nga b'ɔ wun i wiengu sran wun ndɛ-ɔ ɔ kan kle i'n, ɔ cɛ lele-ɔ ɔ ´nyan klolɛ tra sran nga gblɛ'n yɛ ɔ kpɛ'n.

²⁴ Sran kun nga bɔ ɔ wua i si nin i nin b'ɔ se kɛ: «N kpa'n, nguɛ sa tɛ yɛ n yoli'n,» i sɔ sran'n nin kodiawiefuɛ'n be ti kun.

²⁵ Wun tufuɛ'n ɔ kpɛ utre ba. Sran nga kusu b'ɔ fɛ i wun man Anannganman'n, ɔ nyan muae.

²⁶ Sran nga bɔ i bɔbɔ klun like liɛ nga i waan ɔ ´yo'n, i kunngba yɛ ɔ si i'n, i sɔ sran liɛ'n ɔ ti sinnglinfuɛ. Sran nga kusu b'ɔ nanti akunndan su'n, i sɔ sran liɛ'n, i nyrun atin'n ti wein.

²⁷ Sran nga b'ɔ lɛ like-ɔ ɔ man yalɛfuɛ'n wie'n, like tu-mɛn i sa nun mlɔnmlɔn. Sran nga kusu b'ɔ wun yalɛfuɛ-ɔ ɔ muɛn-muɛn i nyinma'n, i sɔ sran liɛ'n i sannzan bofuɛ'm be sɔnnin.

²⁸ Kɛ klunwifuɛ'm be ko fa lika'n, sran'm be wanndi fiafia. Kɛ klunwifuɛ'm be blɛ liɛ ko sin'n, yɛ sran'm be wa wun i kɛ kannzu klun-ufuefuɛ'm be sɔnnin-ɔn.