Nyanndra Mun 27 - NYANMIƐN NDƐ'N 1998

¹ Nán di ɔ́ nuan se kɛ ainman n ´yo nga n ´yo nga, afin sa ng'ɔ ´ju cɛn kun sa'n, sran kun si-mɛn .

² Nán yi ɔ bɔbɔ wun ayɛ. Yaci i lɛ man ɔ wiengu uflɛ kan. Nán wɔ yɛ a ´kan-an, man sran uflɛ kan.

³ Yɛbuɛ'n yo nɔnnin. Aunnyan'n kusu ti kpɛnkplɛnkpɛn. Sanngɛ sinnglinfuɛ'n i ya'n yo nɔnnin tra be bue nnyɔn'n.

⁴ Ya tɛ'n ɔ man be kun sran-an ɔ yo ye. Anwlɛn fufu'n ɔ man be ´yo sa-a be wun-man nun. Anyinbloɛ'n i liɛ'n tra ngba, sran fi kwla jrɛn-mɛn i nyrun.

⁵ Kɛ be ko klo min nin gblɛ klolɛ'n, ɔ flunman kɛ like nga n yo b'ɔ ti-man kpa'n, be kan be kle min weiin.

⁶ Sɛ ɔ janvuɛ tu wɔ fɔ'n, wuun ɔ klo wɔ ti-ɔ. Ɔ kpɔfuɛ nga kusu b'ɔ ´tɔ ɔ nun lɛ'n, ɔ lakalɛ yɛ ɔ laka wɔ-ɔ.

⁷ Sran nga bɔ i ku ti yiwa'n, kannzɛ be mɛn i awɛma nzue-ɔ, ɔ di-man. Sanngɛ sran nga bɔ awe kun i'n, kannzɛ man like'n ɔ yo wi sɛ, sanngɛ ɔ yo fɛ i nuan nun.

⁸ Sran ng'ɔ jaso i mɛn liɛ'n nun kɔ mɛn uflɛ nun lɔ ko wlan-wlan ngbɛn'n, i sɔ sran liɛ'n ti kɛ anunman wie bɔ ɔ'a yaci i sua'n lɛ ɔ'a ɔ wlanlɛ mmua'n sa.

⁹ Nyanngo nin parfɛn'n, be jɔ sran anwlɛn. Afɔtuɛ kpa bɔ sran kun mɛn i janvuɛ'n, i klolɛ ti'n, ɔ jɔ anwlɛn tra su.

¹⁰ Ɔ janvuɛ kun, yɛ ɔ́ si i janvuɛ kun, nán kpɔci be. Sɛ ndɛ nyan wɔ'n, nán wanndi kɔ ɔ niaan'n sin, afin janvuɛ nga a nin i be mantan'n, wie i kpa tra ɔ niaan b'ɔ nin wɔ be mantan-man'n.

¹¹ Mín wa, fa akunndan nanti. Sɛ a fa akunndan nanti'n, n klun ´jɔ. I liɛ'n, sɛ sran kan mín wun ndɛ'n, n ´kwla sɔ su.

¹² Kɛ ngwlɛlɛfuɛ'n wun ndɛ'n bɔ ɔ'a wla trɔ b'ɔ ´ba'n, ɔ cuɛn i wun. Sanngɛ sran nga i bɔbɔ ɔ kwla ukɛ-mɛn i wun'n, ɔ fɛ i wun ko yi nun. Ɔ man kusu ɔ isa ndɛ sɔ'n i bo nzuɛn'n.

¹³ Sɛ sran wie bɔ a si-mɛn i, bɔ i waan ɔ ´usa afɛ ɔ́ sa nun'n, sran nga b'ɔ jran nun'n, i sɔ sran liɛ'n man ɔ fɛ i wun tralɛ'n ɔ wla aowa.

¹⁴ Sɛ sran kun kpan kekle njɛnniɛn su yo i wiengu kun like'n, i like ng'ɔ yoli i lɛ'n, be kwla se kɛ nzowa yɛ ɔ'a kpɛ i-ɔ.

¹⁵ Bla ng'ɔ di utre ngboko'n, i sɔ bla liɛ'n, ɔ nin crɔlɔ nga cɛn nga nzue tɔ-ɔ ɔ yaci-man gualɛ'n, be ti kun.

¹⁶ Sran nga i waan ɔ su trɛ i nun'n, ɔ ti kɛ i waan ɔ su jran aunngban, annzɛ kusu ɔ ´fɛ i sa fa fa ngo sa.

¹⁷ Sran wun kɔlɛ'n, ɔ kaci be kɛ limun bɔ be fa si bese'n sa, ɔ man be yo kpa.

¹⁸ Sran ng'ɔ nian figie'n su'n, ɔ ´di i su mma. Sran nga kusu bɔ niɛn i min bian'n i lika kpa'n, ɔ ´nyan nyrun .

¹⁹ Sɛ a nian nzue nun'n, a wun ɔ bɔbɔ ɔ nyrun'n. I kunngba'n, kɛ a nian sran wie mun siin'n, kpɛkuun a wun ɔ bɔbɔ ɔ klun lɔ akunndan'n i wlɛ.

²⁰ Like nga be flɛ i kɛ wie'n, ɔ nin blɔlɔ'n be ku yi-man le. Kɛ sran'n kusu ti sɔ-ɔ, i nyin yi-man like le .

²¹ Sika ɔkwlɛ nin jɛtɛ ufue'n, sin'n yɛ be fa sa be nian-an. Sran'n kusu i like nga be fa si i'n yɛlɛ i dunman b'ɔ fu'n.

²² Man be tu sinnglinfuɛ'n wun kɛ be su tu nviɛlɛ wun sa, nán kɛ i sinnzin'n ´tu i wun le ti-ɔ.

²³ Nian ɔ nnɛn'm be lika kpa, nian bé su kpa.

²⁴ Afin anyanbeun'n ka-man sran kun sa nun mlɔnmlɔn. Ɔ bɔbɔ a si jrɛiin kɛ famiɛn kle'n ka-man awlo kunngba nun tititi.

²⁵ Kɛ a kpɛ ijre'n bɔ ijre uflɛ fu'n, isa ijre ng'a kpɛli b'ɔ gua oka'm be su'n,

²⁶ i yɛ man a nyan bua b'ɔ man a nyan kondro-ɔ. Yɛ man a nyan boli kpakpuɛ yo i atɛ fa to asiɛ-ɔ.

²⁷ Yɛ man ɔ́ boli bla'm be nɔnnɔn'n ´ju wɔ nɔnlɛ-ɔ, a nin wɔ awlofuɛ mun, ɔ nin wɔ afanniɛn mmla mun.