Nyanndra Mun 26 - NYANMIƐN NDƐ'N 1998

Sinnglinfuɛ'm bé wun ndɛ

¹ Anwlanmannun'n, nzue tɔ-man wawa nun. Kɛ bɔlɛ gua-man'n yɛ ɔ waan nzue b'ɔ ´tɔ-ɔ nzraama gua'n yɛ ɔ ´tɔ-ɔ. Kɛ sinnglinfuɛ'n ɔ ti sɔ-ɔ, be kwla yi-mɛn i ayɛ.

² Sannzan nga sran ɔ'a yo-man like fi bɔ be bo i'n, ɔ ti ngbɛn. I wafa'n ti kɛ anunman b'ɔ tu kɔ lelele ɔ tran-man like su'n sa .

³ Be fin nnɛn kpanngɔ'n i ngble yɛ ɔ nanti-ɔ. Bé wla aflunmun'n i nuan nun blalɛ be cuɛn i yɛ ɔ nanti-ɔ. Sinnglinfuɛ'n kusu i liɛ'n, be bo i nin nyantiaan'n yɛ ɔ suan ngwlɛlɛ-ɔ.

⁴ Sɛ sinnglinfuɛ tu alakun'n, nán tu wie su i su. Ɔ cɛ-man nan b'a bu wɔ sinnglinfuɛ wie.

⁵ Kɛ ɔ ´yo nan sinnglinfuɛ'n ɔ'a bu-mɛn i klun lɔ kɛ ɔ ti ngwlɛlɛfuɛ'n ti'n, i sinnzin sa ng'ɔ fa yo wɔ'n, nian su yo i wie.

⁶ Sran ng'ɔ sunman sinnglinfuɛ'n, wuun ɔ'a di sinnzin. Ɔ ti kɛ ɔ'a kpɛkpɛ i bɔbɔ i ja'n ɔ'a gua sa. I sin afɛ ng'ɔ wa fɛ'n, ɔ wa yo kekle.

⁷ Sinnglinfuɛ'n, i nyanndra ng'ɔ bu'n, ɔ ti fɛtɛfɛtɛ. Ɔ ti kɛ fɔlɛfuɛ'n i ja'n sa.

⁸ Fiaunfuɛ'n yɛ ɔ fa kpafloko'n cici yɛbuɛ nin-ɔn. I kunngba'n, i yɛ ɔ kwla yo sinnglinfuɛ'n i mo-ɔ.

⁹ Sinnglinfuɛ'n i nyanndra ng'ɔ bu'n, ɔ ti kɛ nzanboɛfuɛ'n ɔ'a fa like wie b'ɔ ti owie-owie'n ɔ'a tra nun sa.

¹⁰ Junman su kpɛn nga sɛ sinnglinfuɛ nga be ´sin'n, ɔ fa be kwlaa wlɛ i junman nun'n, ɔ ti kɛ ta tofuɛ ng'ɔ to i ta'n wɔ sran'm be kwlaa'n sa.

¹¹ Kɛ alua'n kpu gua b'ɔ sɛ i sin di i ekun'n, kɛ sinnglinfuɛ'n kusu ti sɔ-ɔ. I sinnzin sa ng'ɔ yo be'n, ɔ flan be nun yo i ekun.

¹² Sran ng'ɔ bu i bɔbɔ wun ngwlɛlɛfuɛ'n, sinnglinfuɛ'n flunman trɛ i.

Kɛ fuɛnfuɛ'n fa ti'n yɛ

¹³ Kɛ fuɛnfuɛ'n ko fite-man'n ti, kpɛkuun i waan: «Asɔmɔli kun wo atin'n nun. Nnɛn sroesroe kun wo klɔ'n nun.»

¹⁴ Anuan'n kpɛ i wun i blalɛ kanngan nnyɔn'm be su. Fuɛnfuɛ'n kusu kpɛ i wun i bɛ'n su.

¹⁵ Fuɛnfuɛ'n fɛ i sa wla aliɛ talie'n nun kwlaa, sanngɛ kɛ ɔ ´fa wlɛ i nuan nun'n, i waan i sɔ'n ɔ ti afɛ dan.

¹⁶ Fuɛnfuɛ'n bu i wun ngwlɛlɛfuɛ tra sran nso bɔ be ´kan be ndɛ-ɔ, be kɛn i akunndan nun'n.

Nyanndra uflɛ mun

¹⁷ Sran nga b'ɔ ´sin kɔ i lika, bɔ sran wie'm be ´kan be ndɛ-ɔ ɔ fɛ i wun wla nun'n, i sɔ sran'n ti kɛ sran bɔ alua wie o i olɛ lɛ b'ɔ ko sɔ i sukpɔ'n sa.

^18-19 Sran nga b'ɔ lɛkɛlɛkɛ i wiengu'n, bɔ i sin ɔ wa se i kɛ: «Min waan n ´yo sɔ nan e sri'n,» i sɔ sran liɛ'n ti kɛ fiaunfuɛ b'ɔ toto yiendre nin ta mma mun, ɔ nin like b'ɔ kun sran'n sa.

²⁰ Kɛ yie'n wie'n, sin'n nuan. Kɛ ablafuɛ kusu nun-man lɛ'n, utre'n kusu wie lɛ.

²¹ Utre klofuɛ b'ɔ wlawla ndɛ'n, ɔ ti kɛ sin nun yie sa, ɔ ti kɛ bunnde nun sin sa. Sɛ sin'n ´nyan ta'n, ɔ fin bunnde'n.

²² Abla difuɛ nuan nun ndɛ'n ti kɛ like fɛfɛ bɔ be di'n bɔ tɔ be klun lɔ klanman'n sa.

²³ Sran nga bɔ i nuan nun ndɛ'n ti nɛnkɛn-nɛnkɛn ngbɛn bɔ i klun ti-man ufue'n, ɔ ti kɛ sika fiɛn bɔ b'a klo i b'a guɛ i sɛ wie wun'n sa.

²⁴ Sran ng'ɔ kpɔ wɔ'n i sa'm be yolɛ nun'n, ɔ yo i wun kɛ ɔ klo wɔ sa. Sanngɛ wuun ɔ́ wun kpɔɛ o i klun lɔ.

²⁵ Kɛ ɔ ´kan ndɛ'n i fɛfɛ ´kle wɔ lɛ'n, nán fa su. Afin ɔ́ wun akunndan ng'ɔ bu'n, ɔ ti-man kpa mlɔnmlɔn.

²⁶ Ɔ si i wun ngwlɛlɛ, ɔ yo kɛ ɔ kpɔ-man sran sa, sanngɛ ɔ ´ju kɔ-ɔ, klɔfuɛ'm be ´si kɛ i klun yo wi.

²⁷ Sɛ a kpɛ sran i wun kunman'n, ɔ bɔbɔ yɛ a ´tɔ nun-ɔn, sɛ yɛbuɛ kusu yɛ a kondo fu kpɔlɛ wie b'ɔ su sɛ i sin ba'n, san ɔ su cɛ yɛ ɔ ´tɔ-ɔ .

²⁸ Sran suɛn tɔnlɛ'n ti i kpɔlɛ. Abla ndɛ'n ɔ bo awlo.