Nyanndra Mun 25 - NYANMIƐN NDƐ'N 1998

¹ An `nian Salomɔn i nyanndra wie mun bɔ Ezekias b'ɔ ti Zida famiɛn'n i sran'm be klɛli-ɔ.

Salomɔn i nyanndra mun yɛ

² Sa nga ti bɔ Nyanmiɛn lɛ nyrun'n, yɛlɛ kɛ klɔ sran'n wun-mɛn i sa'm be ngba be bo. Famiɛn'm be kusu sa nga ti bɔ be nin manmanlɛ fata'n, yɛlɛ kɛ be yi bé sa nga be yo'n be nglo.

³ Kɛ nyanmiɛn b'ɔ la nglo lɔ plaii'n i tɛtrɛ kɔ lele ju'n, e si-mɛn i tiwa, yɛ kɛ asiɛ'n i bo'n ti kploun ju'n, bɔ e si-mɛn i bo'n, kɛ famiɛn'm be kusu be akunndan'n ti sɔ-ɔ. Be klun'n ti kɛ bo sa, e si i-ɔ ɔ yo-man ye.

⁴ Kɛ be ko yi sika'n i nun fiɛn'n, i ba'n b'ɔ ka lɛ'n yɛ ajuin difuɛ'n fa di i junman nin-ɔn.

⁵ Kɛ be ko kankan gblɛfuɛ'm be bo famiɛn'n i wun lɛ'n, yɛ i sielɛ'n ɔ taka-a. Yɛlɛ kɛ ɔ taka nanwlɛ dilɛ'n su.

⁶ A o famiɛn nyrun-ɔn, nán yo ɔ́ wun dandan. Sɛ sran dandan'm b'a yia'n, fa ɔ wunsu bia.

⁷ I liɛ'n, sɛ be se wɔ kɛ: «Lika kpa yɛ, bla wa tran wa'n.» Ɔ ti kpa tra kɛ b'a se wɔ kɛ: «Fa bia'n man kpɛnngbɛn'n .»

⁸ Nán kpli fa ndɛ kɔ nzanman. ?Sɛ a kpli, nan be kan ndɛ nan ɔ tɔ ɔ su'n, a ´yo i sɛ ?

⁹ Sɛ ndɛ o a nin ɔ wiengu amun afiɛn'n, amun `siesie. Sanngɛ aswre kan ng'ɔ wiengu kun tu wɔ'n, nán fa fite gua su.

¹⁰ Ɔ ti-mɛn i ti-ɔ, sɛ ɔ ti'n, ɔ ´fa usa wɔ. Sɛ ɔ usa wɔ kusu-ɔ, a su kwlɛ-mɛn i nuan yi, yɛ kusu ɔ dunman ´saci.

¹¹ Ndɛ nga be kan b'ɔ kpɛn su sɛsɛ'n, ɔ yo nyɛnmɛn kɛ b'a fa sika ɔkwlɛ nin jɛtɛ ufue b'a di ajuin wie sa.

¹² Sɛ akunndanfuɛ tu wɔ fɔ nan a ti'n, i kpa liɛ'n ti kɛ sika ɔkwlɛ nga annzɛ njuaba sa.

¹³ Sɛ a sunman sran nan ɔ nian like nga a sunmɛnnin i kɛ ɔ yo su yo i kpa'n, ɔ klun jɔ kɛ wawa blɛ nun nan w'a nyan nzue flɔlɔ kpa w'a nɔn sa.

¹⁴ Sran nga b'ɔ di i nuan sin kɛ ɔ cɛ sran like sanngɛ kusu ɔ yo-man'n, ɔ ti kɛ nzue b'ɔ mlan b'ɔ tɔ-man'n sa.

¹⁵ Sran ng'ɔ fa-man ya ndɛndɛ'n yɛ man jɔlɛ difuɛ'n kaci aniɛn-ɔn, ɔ yo ye-ɔ. Sran nga kusu b'ɔ si ijɔ'n yɛ ɔ kan ndɛ dandan mun yɛ be kpɛ-ɔ.

¹⁶ Sɛ a nyan awɛma nzue'n, di ng'ɔ ju wɔ'n. Ɔ ti-mɛn i ti-ɔ, sɛ ɔ fian ɔ klun-ɔn, a ´fi.

¹⁷ A kɔ ɔ wiengu wun-ɔn, go nun. Ɔ ti-mɛn i ti-ɔ, a ´flɛn i, ɔ man ɔ́ wun ´yo i tɛ.

¹⁸ Sɛ be fa kate, annzɛ tokofi, annzɛ ta mma piembie be fa yo sran like'n, ɔ wun i ya'n sa fiaan. Suɛn nga sran fa tɔn i wiengu'n, kɛ i kusu ti sɔ-ɔ.

¹⁹ Sɛ sa nyan wɔ nan a lafi gblɛfuɛ su kɛ ɔ wa uka wɔ'n, ɔ ti kɛ ɔ je keje nan a su fa di like sa, annzɛ ɔ́ ja yo wɔ ya nan a jran su'n sa.

²⁰ Ayrɛ o nun kpɛkuun b'a yi bé wun tralɛ'n, kannin kun wo sran wun kpɛkuun b'a fa vinɛgri b'a gua nun. I kunngba'n yɛlɛ kɛ sran kun klun jɔ-man kpɛkuun be su to jue be kle i. I sɔ yolɛ'n ti sinnzin like.

²¹ Sɛ awe kun ɔ kpɔfuɛ'n, mɛn i like man ɔ di, sɛ nzue we kun i'n, mɛn i nzue man ɔ nɔn.

²² Sɛ a yo sɔ'n, ɔ ti kɛ sɛnmlɛn nyannyan yɛ w'a tiɛn i nuan i ti'n su sa. Yɛ Anannganman kusu ɔ ´yo wɔ mo .

²³ Aunngban fɛfɛ'n, yɛ ɔ fa nzue'n ba-a. I kunngba'n, ijɔlɛ ngboko'n kusu ɔ kun sran wie ya.

²⁴ Kɛ a nin bla ng'ɔ klo utre'n an ko tran sua kun'n, ɔ flunman kɛ a `kɔ mian lika fii wie nun.

²⁵ Ndɛ fɛ ng'ɔ fin mɛn wie nun mmua ba'n, ɔ ti kɛ nzue flɔlɔ wie b'ɔ jɔ anwlɛn'n sa.

²⁶ Sran nga b'ɔ ti kpa'n, bɔ klunwifuɛ wie saci i ti nun'n, ɔ ti kɛ nzue bla annzɛ fɛtɛ, bɔ be nun nzue'n ti klengle laa bɔ ɔ'a kputu'n sa.

²⁷ Awɛma nzue nɔnlɛ ngboko'n ti-man kpa. Dunman klanman kunndɛlɛ ngboko'n kusu ti-man kpa.

²⁸ Sran nga bɔ sɛ ya kun i-ɔ, ɔ si-mɛn i bɔbɔ wun kpata'n, i sɔ sran liɛ'n ti kɛ klɔ bɔ sɛ be fa alɛ be man i su sran mun-ɔn, be kwla-man bé ti kpli'n sa.