Nyanndra Mun 24 - NYANMIƐN NDƐ'N 1998

Ngwlɛlɛfuɛ nin klunwifuɛ

¹ Nán sɔnnzɔn klunwifuɛ mun. Nán a nin be san nun.

² Afin sa tɛ yolɛ akunndan yɛ be bu-ɔ. Abɔlɛ like nga be ko yo'n i ndɛ yɛ be kan-an.

³ Akunndan'n yɛ be fa kplan sua-a. Ngwlɛlɛ'n kusu yɛ man ɔ jran-an.

⁴ Ngwlɛlɛ'n yɛ man be fa ninnge kpakpa nga be yo nyɛnmɛn'n be siesie nun-ɔn.

⁵ Sran kun b'ɔ o sa'n, i akunndan ng'ɔ o i ti nun'n yɛ ɔ mɛn i wunmiɛn nin-ɔn. I ngwlɛlɛ b'ɔ si i'n yɛ man ɔ kwla-a.

⁶ Sɛ a ´kɔ alɛ kunlɛ'n, nian ɔ́ wun kpa. Sɛ a usa ngwlɛlɛ afɛ sran sunman sa nun'n yɛ a nyan jranwlɛ-ɔ.

⁷ Ngwlɛlɛ'n tra sinnglinfuɛ'n i kpɛn. I sɔ'n ti, kɛ be ´kan nzra nun ndɛ'n, ɔ fata-man kɛ ɔ uke i nuan.

⁸ Sran nga b'ɔ sa tɛ yolɛ akunndan yɛ ɔ o i klun'n, i sɔfuɛ'n ɔ ti sa sukusuku yofuɛ.

⁹ Sinnglinfuɛ'n i klun akunndan'n ti tɛtɛ ngunmin. Sran ng'ɔ srisri i wiengu'n, ɔ mɛn i bɔbɔ wun kpɔɛ.

¹⁰ Sɛ sa kekle wie tɔ wɔ su nan ɔ́ sa sin bubu wɔ'n, wuun a lɛ-man anwlɛn.

¹¹ Be nga be su kɔ be kunlɛ'n, de be. Be nga be di be ndɛ bɔ be su kɔ be kunlɛ'n, yo man be yaci be nun.

¹² Sɛ a se kɛ: «M'an wun-man nun o!» Nyanmiɛn bɔbɔ si nun. Ɔ si ɔ sa nga a yo be'n. I nyin ta wɔ. Ɔ si sa ngba. Sran kun i sa ng'ɔ yo be'n, i su yɛ ɔ nian fa bu i fɔ-ɔ.

¹³ Mín wa, nɔn awɛma nzue'n, afin ɔ ti kpa. Ɔ yo fɛ.

¹⁴ Kɛ awɛma nzue'n fa ti'n yɛ ngwlɛlɛ'n fa ti-ɔ. Sɛ a si ngwlɛlɛ-ɔ ɔ nyrun atin'n ´yo weiin. Like nga a sunnzun'n, ɔ ´yo ye, yɛ blɛ ng'ɔ ´ba lɔ nun'n, ɔ klun ´jɔ.

¹⁵ Nán sua sran kpa'n i nganzua i sua'n ti. Nán de i tranwlɛ'n i sa nun.

¹⁶ Afin sran kpa'n, blɛ wie nun ɔ kwla tɔ. Sɛ ɔ tɔ kpɛ nso sɔ bɔbɔ'n, sanngɛ ɔ jaso. Klunwifuɛ'm be liɛ'n, kɛ sa'n ko nyan be'n, wuun i ala!

¹⁷ Sɛ ɔ kpɔfuɛ'n tɔ'n, nán ɔ klun jɔ i sɔ'n ti. Yɛ sɛ sa nyɛn i'n, nán ɔ klun jɔ i sɔ'n ti.

¹⁸ Sɛ a yo sɔ-ɔ, Anannganman klun su jɔ-man ɔ́ wun. Yɛ sɛ ɔ gugu kɛ ɔ ´tu i fɔ-ɔ, ɔ su tu-mɛn i kun.

¹⁹ Be nga be klun yo wi'n, nán se kɛ a nin be ´si akplowa yo like. Nán se kɛ a ´nian be like liɛ bɔ be yo'n su a ´yo wie.

²⁰ Afin be liɛ'n, be lɛ-man like be nyrun lɔ. Be nguan'n ti kɛ kannin b'ɔ su nuan'n sa.

²¹ Mín wa, man ɔ́ nyin yi Anannganman nin famiɛn'n. Be nga be waan be ´kpɛ like'n kwlakwla wun'n, nán kuku ɔ́ wun yi be nun.

²² Afin awieliɛ'n ´wie be cɛn ba kunngba. ?Sa nga Anannganman wa fa wla be nun'n, wan yɛ ɔ si-ɔ?

Afɔtuɛ uflɛ bɔ akunndanfuɛ'm be mɛnnin i ekun'n

²³ Akunndanfuɛ'm be ndɛ nga be kannin'n i wie ekun yɛ. Sɛ be ´di jɔlɛ'n, ndɛ kwlɛ dilɛ'n ɔ ti-man kpa.

²⁴ Sɛ sran kun se klunwifuɛ kun kɛ: «A ti kpa yɛ ɔ klun ti ufue'n,» nzrafuɛ'm be ´bo i sannzan, nzrafuɛ'm be ´fɛ i wun ya.

²⁵ Be nga kusu bɔ be tu klunwifuɛ'm be fɔ'n, be di alaje, be nyan muae, be sri.

²⁶ Sran ng'ɔ kan ndɛ nanwlɛ kle wɔ'n, wuun ɔ su yi klolɛ b'ɔ klɔ wɔ'n i nglo ´kle wɔ.

²⁷ Dun mmua wie ɔ junman nga be o guasu lɔ'n be di, yɛ ɔ fie'm bé su junman mun, wie be di nan w'a bu sua kplanlɛ'n wun akunndan.

²⁸ Nán tɔn ɔ wiengu wie suɛn. I sɔ gblɛ liɛ'n, nán kpɛ !

²⁹ Nán se kɛ: «Sran nga ɔ'a yo min sa ti n ´yo i wie yɛ sa nga ɔ'a yo min yɛ, n ´yo i wie n ´sie i osu .»

Kɛ fuɛnfuɛ'n fa ti'n yɛ

³⁰ Cɛn kun n sinnin fuɛnfuɛ komofuɛ kun i vinyi fie'n wun lɛ.

³¹ N ´nian-an, yaokanndrɔwa nin ijre tɛtɛ mun b'a de i fie wunmuan'n. Ɔ lɛ-man i lika kun. Jasa ng'ɔ sili'n kusu ɔ'a bu.

³² Kɛ n wunnin i sɔ'n, n niɛnnin i siin! Kpɛkuun sa nga n nyɛnnin i nun'n yɛ.

³³ Sɛ ɔ waan man n lafi kan ke! Min wun bubu min, man n la n tinngɛ n wi ke. Nan sɛ a bubu ɔ́ sa nin ɔ́ ja tran su a lafi'n,

³⁴ yalɛ'n yɛ ɔ ´fu ɔ nun kɛ awiefuɛ sa-a, yɛ nyrɛnnɛn'n yɛ ɔ ´fu ɔ nun kɛ kodiawiefuɛ'n fu sran nun sa-a.