Nyanndra Mun 23 - NYANMIƐN NDƐ'N 1998

¹ Sɛ a nin sran lɔun kun amun ti amun su di like'n, like nga a ´di'n, bu i akunndan.

² Sɛ a ti aliɛ safuɛ'n, tra wɔ anwlɛn.

³ Nán ɔ konvi trɛn i aliɛ kpakpa'm bé su. Be kwla fa aliɛ sɔ'n be wie sa wɔ nian.

⁴ Nán kle ɔ́ wun yalɛ ngboko kɛ a ´nyan ɔ́ wun. Nán bu i akunndan beblebe .

⁵ Kɛ sika'n wo lɛ'n, ɔ ti kɛ anunman nyin b'ɔ tu kɔ nglo mmua'n sa. Ɔ lɛ ndɛwa yɛ ɔ o lɛ-ɔ. Kɛ ɔ waan a ´nian'n, wuun ɔ'a tu anunman lalaa. ?A kunndɛ i-ɔ a wun i nin?

⁶ Sɛ anwɛnfuɛ flɛ wɔ aliɛ su'n, nán di. Nán ɔ konvi trɛn i aliɛ kpakpa'm bé su.

⁷ Afin akunndan ng'ɔ bu i klun lɔ'n, ɔ nin i nuan su ndɛ'n ti-man kun. Ɔ se wɔ kɛ: «Aliɛ yɛ ɔ o lɛ-ɔ, di, yɛ nzan yɛ ɔ o lɛ-ɔ, nɔn.» Sanngɛ ng'ɔ ´kɛn i lɛ'n, nɛ́n i klun su-ɔ.

⁸ I sɔ'n ti, aliɛ nga a dili'n, san a ´fi. Yɛ ndɛ kpakpa nga a kannin be'n, wuun b'a yo ngbɛn.

⁹ Sran ng'ɔ wun-man sa wlɛ'n, nán tu i aswre. Afin ɔ su si-man kɛ ndɛ kpa yɛ a ´kan kle i lɛ-ɔ.

¹⁰ Lalafuɛ like nga be fa jali awɛ'n, nán tu i bo, nán wlu aika mma'm be fie'n nun kɛ a ´ko de fie sɔ'n bé sa nun .

¹¹ Afin Anannganman ´jran bé sin ɔ nin wɔ be ´kan.

¹² Ngwlɛlɛ nga be kle wɔ'n, man ɔ́ nyin tran su. Be kan ngwlɛlɛ ndɛ kle wɔ-ɔ, fa ɔ́ su sie su.

¹³ Nán yaci ɔ́ wa kan'n i fɔ tulɛ. Nán nyantiaan nga a ´fa bo i lɛ'n ti yɛ ɔ wa wu-ɔ.

¹⁴ Sɛ a bo i'n, i yɛ man sa tɛ b'ɔ ti i wie like'n ɔ su ko nyɛn-mɛn i-ɔ.

Ba afɔtuɛ manlɛ

¹⁵ Mín wa, sɛ a yo ngwlɛlɛfuɛ'n yɛ n kusu n klun ´jɔ-ɔ.

¹⁶ Sɛ a di nanwlɛ'n, n klun ´jɔ kpa!

¹⁷ Nán ɔ́ nyin ka klunwifuɛ'm bé sin, aliɛ ba blu-nin-nso nun'n, man ɔ́ nyin yi Anannganman.

¹⁸ I liɛ'n, ɔ klun kwla jɔ cɛn wie, sa nga a sunnzun'n ɔ ´ju.

¹⁹ Mín wa, sie ɔ́ su mín nuan bo nan fa akunndan. Atin ng'ɔ ti kpa'n yɛ kunndɛ fa su-ɔ.

²⁰ Nán kɔ nzannunmunfuɛ'm bé wun. Nán a nin aliɛ safuɛ mun san nun .

²¹ Afin nzannunmunfuɛ mun nin aliɛ safuɛ mun be ´ka yalɛ'n nun. Lafilɛ'n i ngboko'n kusu ɔ man be tralɛ tafuɛn wlalɛ.

²² Ɔ si b'ɔ wuli wɔ'n, sie ɔ́ su ti i nuan bo ndɛ'n. Nán nian kɛ ɔ́ nin ɔ'a yo oke'n ti a ´yo i finfin.

²³ Sɔnnzɔn nanwlɛ dilɛ'n, sɔnnzɔn akunndan bulɛ'n, kunndɛ sa silɛ'n, yo sa cɛcɛ yofuɛ, i sɔ ninnge kpakpa liɛ mun'n, kɛ bé ti ko sin ko yia wɔ'n, nán ɔ́ nyin kpa wie fi su.

²⁴ Siɛ kun wu ba nan sɛ ba'n yo sran kpa'n, i klun ng'ɔ jɔ'n, be kan-man. Sɛ ɔ wu akunndanfuɛ'n, ɔ sri.

²⁵ I sɔ aklunjuɛ liɛ'n, fa man ɔ́ si nin ɔ́ nin. Fa man ɔ́ nin b'ɔ wuli wɔ'n.

²⁶ Mín wa, fa ɔ́ wla'n gua min su. Min atin liɛ nga n fali su'n, fa su wie klanman.

²⁷ Fa sie ɔ́ ti nun kɛ yo: tekle bla'n, kɛ ɔ o lɛ'n, ɔ ti kɛ kunman kploun bɔ be si-mɛn i bo'n sa. Bla b'ɔ lɛ bian'n i kunndɛlɛ'n ti sa tɛ kpa, ɔ ti kɛ ngblɔn fii wie sa.

²⁸ Tekle bla'n nin bla b'ɔ lɛ bian'n, be bu be sa kɛ kodiawie wie sa. Be dunman nun ti yɛ man yasua sunman be yaci bé yi lɛ be nin bla uflɛ be ko la nin-ɔn.

Kɛ nzannunmunfuɛ'n fa ti'n

²⁹ ?Wan yɛ ɔ o nyrɛnnɛn nin ngokoɛ nun-ɔn? ?Wan yɛ ɔ kpan ɔo nin cuekee nin-ɔn? ?Wan yɛ i ngunmin tu ngondin sa ɔ wie-man nin-ɔn? ?Wan yɛ ɔ tri nin-ɔn? ?Wan yɛ be fin i like ngbɛn nin-ɔn? ?Wan yɛ ɔ wun-man ase kpa nin-ɔn?

³⁰ Sran nga b'ɔ tran nzan wun ɔ nɔn i lele ɔ ka su nin-ɔn, sran nga b'ɔ flanflan nzan wafa-wafa'm be nun nin-ɔn.

³¹ Nán ɔ konvi tran nzan b'ɔ wun fiɛfiɛ klowa nun'n, bɔ i nyin ti klanman'n su. A ´nɔn i klanman bɔ cɛ, ɔ ´sin wɔ alowa'n nun klanman bɔ cɛ,

³² sanngɛ i sin'n ɔ wunnɛn ɔ wa yo kɛ wuo wie yɛ ɔ'a ka wɔ sa, kɛ wuo bɔyre wie yɛ ɔ o ɔ́ kplo'n nun sa.

³³ A wa wun ninnge mun sa sukusukuu, yɛ a ´kan ndɛ mun sa sukusukuu.

³⁴ Ɔ wa yo wɔ kɛ a o jenvie'n i afiɛn sa, ɔ wa yo wɔ kɛ a o mmeli'n i waka'n i ti'n su sa.

³⁵ A ´se ɔ klun lɔ kɛ: «?N kpa'n, sran wie boli min kusu min lika yo-man min ya? Be boli min nin ngble, m'an wun-man nun. ?N ´yo sɛ nan m'an jaso? Sɛ n yo blɛblɛ nan n jaso'n, n ´srɛ nzan ekun n ´nɔn.»