Nyanndra Mun 22 - NYANMIƐN NDƐ'N 1998

¹ Sɛ be bo ɔ dunman kpa'n, ɔ ti kpa tra anyanbeun ninnge'n kwlaa. Sɛ sran'm be bo ɔ dunman kpa'n, ɔ ti kpa tra sika ɔkwlɛ nin jɛtɛ ufuɛ'n.

² Sikafuɛ nin yalɛfuɛ'n be kpaci-man, Anannganman yɛ ɔ boli be nnyɔn nin-ɔn.

³ Sran ng'ɔ ti ngwlɛlɛfuɛ'n, kɛ ɔ wun kɛ ndɛ tɛ wie su ba'n, kpɛkuun ɔ'a cuɛn i wun ɔ'a yi i ja. Sanngɛ be nga be bɔbɔ be kwla uka-man be wun'n be liɛ'n, be ko kuku bé wun yi nun, kpɛkuun b'a wun i nuan sa fiaan.

⁴ Sran nga b'ɔ kɛn i wun ase b'ɔ i nyin yi Anannganman'n, ɔ nyɛn i wun. Sran wun i-ɔ, i nyin yi i. Ɔ cɛ.

⁵ Gblɛfuɛ'n i atin liɛ nun'n, owie-owie nin aya'm be o nun. Sran ng'ɔ kunndɛ nguan tɛnndɛn'n, ɔ nin gblɛ'n be mantan-man.

⁶ Atin b'ɔ ti klanman bɔ bakan'n ko fa su'n, kle i i bakan nun. I liɛ'n, kɛ ɔ ´fa yo kpɛnngbɛn'n, ɔ su yaci ko fa-man uflɛ.

⁷ Sikafuɛ yɛ ɔ sie yalɛfuɛ-ɔ. Sran ng'ɔ fa like sran sa nun'n, ɔ kaci kɛ sran sɔ i akua sa.

⁸ Sran ng'ɔ yo sa ng'ɔ ti-mɛn i nuan su'n, nyrɛnnɛn'n cɛ yɛ ɔ tɔ i su-ɔ. Afin wunmiɛn ng'ɔ lɛ i b'ɔ fa yo sa tɛtɛ'n ɔ ´wie cɛn kun.

⁹ Sran nga bɔ i klun ti ufue'n, bɔ kɛ ɔ ´di like-ɔ ɔ man yalɛfuɛ wie'n, ɔ ´nyan muae.

¹⁰ Fuan sran ng'ɔ yo sran finfin man utre'n ɔ wie, sɛ a yo sɔ'n, ndɛnngan nin ndɛ tɛ'm be ´wie.

¹¹ Sɛ a klo kɛ a ´yo famiɛn'n i janvuɛ'n, man ɔ klun akunndan'm be yo kpakpa. Yɛ ng'ɔ o su ekun'n man ndɛ klanman yɛ ɔ fin ɔ́ nuan fite-ɔ.

¹² Sran ng'ɔ si akunndan'n, Anannganman sɛsɛ i. Be nga be ti gblɛfuɛ'n, be liɛ'n ɔ nin be bé ti sɛ-man.

¹³ Kɛ fitelɛ yo-man fuɛnfuɛ'n i fɛ'n ti, kpɛkuun ɔ ko se kɛ yoo: «Asɔmɔli kun wo gua su lɔ. Sɛ n fite-ɔ, ɔ ko kun min gua'n i afiɛn.»

¹⁴ Bla nga bian yɛ be kunndɛ'n, bé nuan nun ti nɛnkɛn-nɛnkɛn. Be nuan nun ndɛ'n ti kɛ kunman dan wie sa. I sɔ kunman liɛ'n, sran nga Anannganman fɛ i wun ya'n kpɛkuun ɔ'a tɔ nun.

¹⁵ Sinnzin'n wo bakan'n i nun. Nyantiaan'n yɛ ɔ tu i-ɔ.

¹⁶ Sran ng'ɔ kle yalɛfuɛ'n i yalɛ'n, wuun ɔ su mɛn i anyanbeun. Sran nga kusu b'ɔ cɛ wlengbifuɛ like'n, i bɔbɔ di yalɛ.

Bé wun su nianlɛ sa wafa-wafa'm be nun

¹⁷ Sie ɔ́ su diin tie i kpa. Ngwlɛlɛ ndɛ yɛ n su kan kle wɔ lɛ-ɔ. Akunndan nun ndɛ nga n ´kan kle wɔ yɛ, man ɔ wlu ɔ́ su nun.

¹⁸ Sɛ ɔ ka ɔ klun'n, nan ɔ́ nuan bli i kanlɛ nun'n, ɔ ti kpa.

¹⁹ N klo kɛ a fa ɔ́ wla'n gua Anannganman su, i sɔ'n ti, n ´fa like sɔ'n ´kle wɔ ndɛkɛn.

²⁰ N klɛli afɔtuɛ ndɛ nin akunndan ndɛ ablasan m mannin wɔ.

²¹ Min waan, n ´klɛ man wɔ sɔ nan sɛ be sunman wɔ kɛ a ko usa sa'n, w'a wun nanwlɛ'n w'a kan kle sran ng'ɔ sunmannin wɔ'n.

²² Nán nian kɛ yalɛfuɛ'n lɛ-man sran'n ti de i wun ninnge mun. Sran b'ɔ lɛ-man wie'n, bɔ sɛ jɔlɛ diwlɛ lɔ be su di i ndɛ kwlɛ'n nán jran bé sin.

²³ Afin Anannganman de i sɔ sran liɛ'm bé ti ndɛ kan. Ɔ sran nga a de yalɛfuɛ i wun ninnge mun'n, Anannganman ´kpɛ ɔ nguan'n i sin.

²⁴ Sran ng'ɔ ti ya fafuɛ'n, nán fa ɔ́ wun mɛntɛn i. Wanndi wankan-wankanfuɛ mun.

²⁵ Ɔ ti-mɛn i ti-ɔ, be nzuɛn tɛ'n ɔ ´sa wɔ, kpɛkuun a ´kuku ɔ́ wun yi i saɛ nun ngbɛn.

²⁶ Sɛ sran wie ´ko fɛ i kalɛ wie'n, nán dun mmua i nyrun se kɛ: «Sɛ ɔ'a tannin-man-an n ´tannin.»

²⁷ Afin sɛ w'a nyan-man sika w'a tannin-man'n, ɔ́ bo bɛ nga a la su'n, be ´de. Sɛ ɔ wie ɔ́ wun kondro'n bɔbɔ-ɔ, be ´de.

²⁸ Fie'm be awɛ su yɛbuɛ nga ɔ́ nannan'm be sieli'n, nán tutu be bo, nán kaci be takatakawlɛ mun.

²⁹ Nian sran kun nga bɔ i sa si ngwlɛlɛ'n, cɛn wie lele a ´nian-an, ɔ su di famiɛn'n i junman. Ɔ su ka-man bui bo sa mlɔnmlɔn.