Nyanndra Mun 21 - NYANMIƐN NDƐ'N 1998

¹ Famiɛn'n i klun akunndan'n, ɔ ti kɛ nzue ba sa. Kan Anannganman tinndin i sa'n lɛ'n, lɛ yɛ ɔ kɔ-ɔ.

² Like nga sran bɔbɔ yo'n, ɔ ti kpa i nyrun, sanngɛ sran nga b'ɔ sunnzun sran klun akunndan'n yɛlɛ Anannganman.

³ Nanwlɛ dilɛ'n nin nzuɛn kpa'n be ti cinnjin Anannganman nyrun tra tɛ yilɛ'n .

⁴ Sa tɛ yofuɛ'm be like b'ɔ o bé wun'n yɛlɛ bé wun nyinman-nyinmanlɛ nin bé wun tulɛ.

⁵ Sran ng'ɔ ´yo like-ɔ ɔ sunnzun i klun nan ɔ'a yo'n, ɔ ´di alaje. Nga kusu b'ɔ kpli yo like'n, awe'n yɛ ɔ nin i be ´yia nun-ɔn.

⁶ Be nga bɔ awie yɛ be fa nyan bé wun'n, be ti sinnglinfuɛ. Be su kpɛkpɛ be nguan nyanman'n nun.

⁷ Klunwifuɛ'm bé sa tɛtɛ'n ɔ mlin be, afin be kunndɛ-man kɛ be ´yo sa kpa.

⁸ Atin nga sran kunfuɛ'm be fa su'n, ɔ ti-man kpa. Sran nga be ti kpa'n, be nzuɛn liɛ'n ti kpa.

⁹ Kɛ a nin bla saɛfuɛ amun ko tran sua kun'n, ɔ flunman kɛ a `ko wɔsɔ sua wie ti su.

¹⁰ Klunwifuɛ'n i klun akunndan'n yɛlɛ i wiengu tɛ yolɛ. I janvuɛ mun bɔbɔ, ɔ yaci cɛ-man be.

¹¹ Kɛ be ´tu sran b'ɔ yo i wun dandan'n i fɔ'n, sinnglinfuɛ b'ɔ o lɛ'n ɔ fa tu i wun fɔ nun. Sran nga b'ɔ ti ngwlɛlɛfuɛ'n, be kan ndɛ be kle i-ɔ ɔ fa.

¹² Sa ng'ɔ ju klunwifuɛ'm be awlo'n nun'n, Anannganman b'ɔ yo sa i nuan su'n, ɔ wun i. Kɛ ɔ wun i sɔ'n, kpɛkuun ɔ'a kan be ɔ'a guɛ i nyrɛnnɛn nun.

¹³ Sran nga bɔ kɛ nyrɛnnɛnfuɛ'n ´kpan-an ɔ bu i sukpɔ nun waka'n, i sɔfuɛ'n, cɛn ng'ɔ ´kpan kɛ: «Be `de min o!» Ɔ su nyan-man sran tɛ-mɛn i su .

¹⁴ Sɛ sran wie ɔ'a fa ya dan nan a cɛ i like nvialiɛ nun'n, i ya'n wie. Sɛ ya ble'n bɔbɔ yɛ ɔ fali'n, sɛ a cɛ i like nvialiɛ nun'n, ya sɔ'n wie.

¹⁵ Nanwlɛ dilɛ'n, ɔ jɔ klun-ufuefuɛ'n i anwlɛn su. Sran tɛ'n liɛ'n, kɛ be di nanwlɛ be kle i'n, ɔ ti kɛ i wiewielɛ yɛ be su wiewie i-ɔ.

¹⁶ Sran nga b'ɔ wun ngwlɛlɛ atin nin-ɔn ɔ fa-man su'n, i sɔfuɛ'n blɔlɔ atin'n yɛ ɔ fa-a.

¹⁷ Sran nga b'ɔ klo fɛ ngboko'n, ɔ ´di yalɛ. Sran nga bɔ ninnge kpakpa'n nin nzan'n yɛ i waan be fa mɛn i man ɔ di ɔ nɔn'n, i sɔfuɛ'n ɔ nyɛn-mɛn i wun le.

¹⁸ Klunwifuɛ'n yɛ klun-ufuefuɛ'n fa wla aowa-a. Gblɛfuɛ'n yɛ nanwlɛ difuɛ'n fa wla aowa-a.

¹⁹ Kɛ a nin bla saɛfuɛ nin ndɛnnganfuɛ amun ko tran'n, ɔ flunman kɛ a `ko tran lika koun wie nun.

²⁰ Sran ng'ɔ ti akunndanfuɛ'n, be wlu i awlo-ɔ bé wun ninnge kpakpa wafa-wafa'n kwlaa, sanngɛ sran ng'ɔ wun-man sa wlɛ'n, ɔ saci i wun ninnge'm be kwlaa.

²¹ Sran nga nanwlɛ dilɛ nin klun-ufue yolɛ'n ɔ yo i fɛ'n, i sɔfuɛ'n ɔ ´di mɛn ´cɛ. Be bu i sran kpa yɛ ɔ nyan nyrun.

²² Klɔ nga bɔ be si i wun kpa'n, bɔ be waan nán be kpɔfuɛ'n i ja tia su'n, sran ng'ɔ si akunndan'n ɔ kwla utu i sɔ klɔ'n, yɛ ɔ kwla bubu i wun talɛ'n bɔ be lafi su'n.

²³ Sran nga b'ɔ ´kan ndɛ-ɔ ɔ bu i sin'n, ɔ nyan-man saɛ.

²⁴ Sran nga b'ɔ bu-man sran fi sran'n, bɔ i nuan nun ndɛ'n ti tɛtɛ'n, i sɔ sran liɛ'n, be flɛ i kɛ sran finfin yofuɛ. Ɔ tu i wun sa kwlaa nun.

²⁵ Fuɛnfuɛ'n i konvi'n yɛ ɔ kun i-ɔ. Afin i sa kan-man i ja kan-man.

²⁶ I konvi'n jaso-man ninnge'm bé su le. Sran kpa'n kusu, ɔ ´man sran like-ɔ ɔ bu-mɛn i sin.

²⁷ Klunwifuɛ'm bé tɛ nga be yi'n ɔ yo Anannganman i tɛ, afin be klun akunndan nga be fa yi'n ɔ ti-man kpa.

²⁸ Sran ng'ɔ bua ato'n, be fɛ-mɛn i nuan su ndɛ'n. Nanwlɛfuɛ'n ɔ kan ndɛ ng'ɔ tili'n i weiin.

²⁹ Sran ng'ɔ yo sa tɛ'n, ɔ lafi i bɔbɔ i wun su. Sran ng'ɔ ti sran ndɛnman su'n, be kwla lafi i su.

³⁰ Anannganman i like nga i waan ɔ ´yo i sa'n, sran i akunndan o, sran i ngwlɛlɛ o, sran i gugulɛ o, i wie fi kwla jrɛn-mɛn i.

³¹ Be tanndan nnɛn kpanngɔ'n kɛ be ´fa kɔ alɛ kunlɛ. Sanngɛ Anannganman yɛ ɔ man be kwlalɛ nin-ɔn.