Nyanndra Mun 20 - NYANMIƐN NDƐ'N 1998

¹ Nzan'n man sran di tutre, nzan kekleekle mun man sran ijɔ fiaii. Sran ng'ɔ nɔn nzan ngboko'n, ɔ si-man ngwlɛlɛ .

² Kɛ famiɛn kun ko fa ya'n, ɔ yo sro kpa kɛ asɔmɔli sa. Ɔ min kun nga a klɔklɔ famiɛn'n, wuun ɔ ti kɛ a su kunndɛ ɔ wie.

³ Sa'n i klanman'n yɛlɛ kɛ sɛ be ´si akplowa'n, yi ɔ́ wun nun, nán si wie. San sinnglinfuɛ'm be kunngba cenje yɛ be fa bé ti be tin nun-ɔn.

⁴ Junman dilɛ'n ju-ɔ, fuɛnfuɛ'n waan ayrɛ o nun i ti ɔ di-man wie, sanngɛ kɛ aliɛ'n ko fite'n, kpɛkuun i waan ɔ ´kunndɛ wie di, sanngɛ kusu ɔ nyɛn-mɛn i.

⁵ Sran klun akunndan'n ɔ ti kɛ nzue b'ɔ wo asiɛ'n i bo'n sa. Sran nga b'ɔ si ngwlɛlɛ'n, i bɔbɔ yɛ man be kwla wun akunndan ng'ɔ o i klun nin-ɔn.

⁶ Sran'm be pɛ lika be yi be bɔbɔ bé wun ayɛ. Sanngɛ sran ng'ɔ ti kpa'n be kunndɛ i-ɔ, be nyɛn-mɛn i.

⁷ Sran kun ng'ɔ ti sran kpa'n, bɔ i klun ti ufue'n, cɛn nga b'ɔ nun-man nun kun'n, i mma ng'ɔ yaci be i sin wa'n, be nanti muae su.

⁸ Kɛ famiɛn kun ko tran ase b'ɔ ´di jɔlɛ'n, ndɛ nga be kan b'ɔ ti gblɛ'n, ɔ ka lɛ wun i.

⁹ ?Wan yɛ ɔ kwla se kɛ: «Mín wla'n ɔ'a gua ase. N si n klun lɔ weiin kɛ sa tɛ nun-man mín wun-ɔn ?»

¹⁰ Jayɛbuɛ nin toe nnyɔn-nnyɔn nun tralɛ'n Anannganman i nyin ci i .

¹¹ Bakan nga i nzuɛn'n ko yo kpa b'ɔ ko yo nanwlɛfuɛ'n, ɔ fia-man.

¹² Anannganman yɛ ɔ yili bé su'n kɛ ɔ `ti sa-a, i kunngba'n yɛ ɔ yili be nyinma'n kɛ ɔ `wun ase-ɔ.

¹³ Sɛ lafilɛ'n yɛ ɔ waan be fa man wɔ nan a lafi'n, yalɛ ´di wɔ. Jaso nglɛmun ndɛ funndan yo like, i liɛ'n a ´di like ɔ ku ´yi.

¹⁴ Like tofuɛ'n se kɛ: «Like nga i gua ti kekle o! I gua ti kekle!» Sanngɛ kɛ ɔ ´kɔ b'ɔ ju i nyrun lɔ'n, kpɛkuun i waan: «N nyɛnnin i gua kpa o!»

¹⁵ Sika ɔkwlɛ nin nɛnnglɛnman'n, be di-man be yalɛ. Sanngɛ like nga i kpa ti be nyɛn-mɛn i'n, yɛlɛ bé nuan waka b'ɔ si ijɔ'n.

¹⁶ Sɛ sran nga bɔ a si-mɛn i bɔ i waan ɔ ´usa afɛ ɔ́ sa nun'n, sran ng'ɔ jran nun'n bɔ a si i'n, man ɔ fɛ i wun tralɛ'n wla nun aowa.

¹⁷ Awie like'n be ´di i klikli nun'n ɔ yo fɛ. Sanngɛ i bo agualiɛ su'n, aunnyan yɛ ɔ gua be je sin-ɔn.

¹⁸ Like nga be waan be ´yo'n, be fa akunndan sran sa nun yɛ be yo-ɔ ɔ yo kpa-a. Be fa akunndan yɛ be kɔ alɛ kunlɛ nin-ɔn.

¹⁹ Sran ng'ɔ ijɔ kaka'n, i nuan tra-man ndɛ. I sɔ'n ti, nán fa ɔ́ wun mantan be nga be ijɔ ngboko'n.

²⁰ Sran kun ng'ɔ bo i si nin i nin be sannzan'n, i bɔbɔ'n ɔ wa wun kɛ ɔ su wu blɛblɛblɛ kɛ kannin wie b'ɔ su nuan aosin nun'n sa.

²¹ Sran ng'ɔ nyɛn i wun ndɛndɛ nglɛmun nun'n, ɔ di yalɛ nnɔsua nun.

²² Sɛ sran kun yo wɔ sa'n, nán se kɛ a ´fa sie ɔ klun, nan a ´yo i wie. Yaci man Nyanmiɛn b'ɔ man a ´nyan ɔ ti'n .

²³ Jayɛbuɛ nga be ti-man nanwlɛ'n, be ti-man Anannganman liɛ'n su. Anannganman klo-man toe nga be fa di ndrunmun'n.

²⁴ Sran kun b'ɔ o sa'n, i ajalɛ ng'ɔ ´tu'n wo Anannganman sa nun. ?Ajalɛ sɔ'n i agualiɛ'n, sran'n bɔbɔ kwla si i sɛ yɛ ɔ ´yo ye-ɔ?

²⁵ A kpli ta Nyanmiɛn nda-a, a mian. Sɛ a ta nda kwlaa ka nan w'a bu i akunndan'n, ɔ ti-man kpa.

²⁶ Famiɛn ng'ɔ si ngwlɛlɛ'n, ɔ si be nga be ti klunwifuɛ'n mun, yɛ ɔ kle be nyrɛnnɛn.

²⁷ Wawɛ ng'ɔ o sran nun'n, ɔ ti kɛ Anannganman i kannin sa. Ɔ kpaja e klun lɔ longolongo'n kwlakwla nun .

²⁸ Kɛ famiɛn kun ´cɛ i bia'n su'n, ɔ fin i klun-ufue'n ɔ nin i nanwlɛ b'ɔ di'n. Klun-ufue'n yɛ man ɔ cɛ bia'n su-ɔ.

²⁹ Wunmiɛn bɔ gbanflɛn'm be lɛ i'n, ɔ ti be anyrunnyan like. Kpɛnngbɛn'm be kusu bé ti je'n, ɔ ti be anyrunnyan like.

³⁰ Kɛ like yaya'n ɔ yo klunwifuɛ'n, ɔ ti kɛ ayre yɛ b'a yo i sa. Ngble'n wie wluwlu ɔ́ wun kpɛkuun ɔ yo sa ye.