Nyanndra Mun 2 - NYANMIƐN NDƐ'N 1998

Sa fu-man akunndanfuɛ'n i nun

¹ Mín wa, like nga n kle wɔ'n, sɛ be ka ɔ klun'n, like nga min waan a yo be'n, nán ɔ́ wla fi be su,

² fa ɔ́ su sie akunndanfuɛ'n i nuan bo, kplin ɔ́ nyin kunndɛ akunndan nun ndɛ mun,

³ sun flɛ akunndan'n, kpan de ngwlɛlɛ'n i awuliɛ,

⁴ kunndɛ i kɛ be kunndɛ sika'n sa, tu ɔ klun kunndɛ i kɛ be fa kunndɛ anyanbeun'n sa,

⁵ sɛ a yo i kwlaa sɔ'n, a ´wun Anannganman i anyinyiɛ'n i wlɛ, kpɛkuun a ´kwla si Nyanmiɛn,

⁶ afin Anannganman yɛ ɔ man akunndan nin-ɔn. Sa silɛ'n nin ngwlɛlɛ'n be fin i.

⁷ Sran nga bɔ be ti sran kpa'n, Anannganman de be. Be nga be di nanwlɛ'n, ɔ sasa be kɛ nyrɛn'n ɔ sasa sran'n sa.

⁸ Ɔ sasa be, be fa atin kpa su. Ɔ sasa be bɔ be klo i'n.

⁹ Sɛ a sie ɔ́ su tie min ndɛ'n, a ´si sa nuan su yolɛ'n nin kpa yolɛ'n be nun ndɛ. A ´si sa kpa'n i yo.

¹⁰ A ´nyan akunndan. Kpɛkuun ɔ́ sa silɛ sɔ'n, ɔ ´man wɔ aklunjuɛ.

¹¹ Akunndan'n man a su mlin-man. Ngwlɛlɛ'n ɔ ´nian ɔ su kɛ sran sa.

¹² Ɔ man a su fa-man atin tɛ'n. A su su-man gblɛfuɛ'm be su.

¹³ Be bɔ be yaci atin kpa'n lɛ be ko fa atin sukusuku'n, a nin be su san-man nun.

¹⁴ Be bɔ sa tɛtɛ'n yɛ ɔ ti be aklunjuɛ like'n, bɔ be nyanko like liɛ'n yɛlɛ klunwi sa'n,

¹⁵ be bɔ atin ng'ɔ ti sein'n, be fa-man su'n, bɔ be atin'n ti sa klɛklɛ'n, nán a nin be san nun.

¹⁶ I liɛ'n, a su yaci-man bla wie lɛ ɔ su lakalaka-man wɔ. Bla nuan nun ndɛ nɛnkɛn-nɛnkɛn wie su lakalaka-man wɔ.

¹⁷ I sɔ bla liɛ'n, bɔ i talua nun bian'n ɔ'a yrɛ i'n, bɔ i wla ɔ'a fi fualɛ ng'ɔ fali Nyanmiɛn dunman'n fuali'n,

¹⁸ i sua'n ɔ kunman kɔ wie'n i nuan'n nun, i atin liɛ ng'ɔ fa su'n ti blɔlɔ atin.

¹⁹ Be nga be kɔ i awlo lɔ'n, be nun ba kun sa ɔ sɛ-mɛn i sin. Ba kun sa ɔ sɛ-mɛn i sin fite-man nun.

²⁰ I sɔ'n ti, sran nga bɔ be ti sran kpa'n, be atin liɛ'n yɛ nanti su-ɔ. Be nga bɔ be ti nanwlɛfuɛ'n be atin liɛ'n yɛ nanti su-ɔ.

²¹ Afin sran kpafuɛ mun, be yɛ be wa tran mɛn nga nun-ɔn, be ´tran be nga be nanti sein'n be mɛn'n nun.

²² Klunwifuɛ'm be liɛ'n, be ´tra be mɛn nga nun be ´kɔ. Be ´tu gblɛfuɛ'm bé bo.