Nyanndra Mun 19 - NYANMIƐN NDƐ'N 1998

¹ Kɛ n ko to gblɛ n ko sin nan n ko yo sinnglinfuɛ'n, ɔ flunman kɛ n `yo yalɛfuɛ nan n yo nanwlɛfuɛ.

² Sɛ a ´yo like wie bɔ a lɛ-mɛn i wun akunndan mlɔnmlɔn'n, ɔ ti tɛ man wɔ. Sɛ a kpli yo sa'n, ɔ cɛ-man nan fɔnlɛ ɔ'a tran nun.

³ Kɛ sran kun ko di sinnzin ko yo sa tɛ wie'n, kpɛkuun Anannganman su yɛ ɔ fɛ i ya'n gua-a.

⁴ Sikafuɛ'n lɛ janvuɛ kaka. Yalɛfuɛ'n i liɛ ba kun ng'ɔ ka'n, ɔ wanndi i.

⁵ Lalofuɛ ng'ɔ bua ato'n, san be ´tu i fɔ. Fɔ ng'ɔ fata kɛ be tu gblɛfuɛ'n, san be ´tu i.

⁶ Sran dan'n i lakafuɛ sɔnnin. Sran ng'ɔ cɛcɛ sran'n be ninnge'n, be di-mɛn i janvuɛ'm be yalɛ.

⁷ Yalɛfuɛ'n i niaan'm be bɔbɔ be kpɔ i, nan nán se kɛ i janvuɛ mun. Sɛ i waan ɔ ´koko yalɛ-ɔ, ɔ kunndɛ be-ɔ ɔ wun-man be.

⁸ Sran ng'ɔ kpɛ ngwlɛlɛ'n i wun atin'n, wuun ɔ klo i bɔbɔ i wun. Sran ng'ɔ tra ngwlɛlɛ'n nun kekle'n, ɔ nyan muae.

⁹ Lalofuɛ ng'ɔ bua ato'n, san be ´tu i fɔ. Gblɛfuɛ'n i bɔbɔ wun mlinlɛ yɛ ɔ mlin-ɔn.

¹⁰ Kɛ sinnglinfuɛ kun `di wlengbi'n, ɔ nin i sɔ'n fata-man. Kɛ kanga ba kun yɛ ɔ `sie wlengbi mun'n, ɔ nin i sɔ'n fata-man.

¹¹ Sran ng'ɔ si ngwlɛlɛ'n ɔ fa-man ya ndɛndɛ. Sa nga be yo i'n, ɔ yaci cɛ, i sɔ yolɛ yɛ ɔ kunndɛ-ɔ.

¹² Kɛ famiɛn kun ko fa ya'n, ɔ yo sro kɛ asɔmɔli b'ɔ su kpan'n sa. Sɛ kusu ɔ nian ɔ nyrun klanman'n, ɔ ti kɛ bɔlɛ b'ɔ gua nnya'm bé su'n sa.

¹³ Ba nga b'ɔ si-man ngwlɛlɛ'n, i si ti nyrɛnnɛnfuɛ. Bla ng'ɔ klo utre'n, ɔ ti kɛ crɔlɔ b'ɔ gua-a ɔ lɛ-man kpɛbo'n sa.

¹⁴ Aja like nga be nyɛn i bé nannan'm bé sin'n yɛlɛ sika nin sua. Sanngɛ bla ngwlɛlɛfuɛ'n, Anannganman yɛ ɔ man-an.

¹⁵ Fuɛnfuɛ'n i junman b'ɔ di'n yɛlɛ lafilɛ. Sran nga kusu b'ɔ kwlɛ-mɛn i wun keje'n, awe'n yɛ ɔ ´kun i-ɔ.

¹⁶ Sran ng'ɔ nanti mmla'n su'n, ɔ sɛsɛ i nguan'n. Sran nga kusu b'ɔ si-man nanti'n, wie'n yɛ ɔ ´kun i-ɔ.

¹⁷ Like nga sran kun fa cɛ yalɛfuɛ'n, ɔ ti kɛ Anannganman yɛ ɔ'a fa mɛn i sa . Ɔ man Anannganman ɔ ´yo i mo.

¹⁸ Blɛ nga a bli ɔ́ wa'n ɔ tɛ yo ye'n, tu i fɔ. Sanngɛ nán fa ya bo i kun i.

¹⁹ Sran nga i ya ti tɛ ngboko'n, ɔ fata kɛ be de i like. Sɛ be yaci cɛ i'n, wuun ɔ ti i wlawlalɛ kɛ ɔ `ko yo like kunngba'n ekun.

²⁰ Be man wɔ afɔtuɛ-ɔ, fa ɔ́ su sie su. Lo ɔ́ wun man be kle wɔ ngwlɛlɛ, i liɛ'n cɛn wie a ´fa si ɔ ngwlɛlɛ liɛ.

²¹ Sran i klun akunndan'n sɔnnin, sanngɛ Anannganman i klun lɔ liɛ nga i waan ɔ ´yo'n, yɛ ɔ yo-ɔ.

²² Like ng'ɔ nin sran fata'n yɛlɛ nanwlɛ'n. Kɛ n ko yo gblɛfuɛ'n, ɔ flunman kɛ n yo yalɛfuɛ.

²³ Sran nga i nyin yi Anannganman'n, wuun ɔ'a fa nguan atin'n, like fi miɛn-mɛn i sa. Sa yalɛ nyɛn-mɛn i kɔnguɛ .

²⁴ Fuɛnfuɛ'n ɔ fɛ i sa wlɛ i aliɛ talie'n nun, sanngɛ ɔ kwla fa wlɛ-mɛn i nuan nun.

²⁵ Kɛ be ´bo sran nga b'ɔ yo i wun dandan'n, sran ng'ɔ si-man ngwlɛlɛ'n ɔ fa tu i wun fɔ. Sran nga kusu b'ɔ si ngwlɛlɛ'n, be kan ndɛ be kle i-ɔ, ɔ fa.

²⁶ Sran nga b'ɔ yo i si kpokokpoko'n, b'ɔ kɛnkɛn i nin bo'n, i sɔ ba liɛ'n i si nin i nin bé nyin gua ase.

²⁷ Mín wa, afɔtuɛ nga be man wɔ'n, sɛ a su fa-man su'n nan a ´kaci ɔ́ sin si ngwlɛlɛ'n, wuun nán bo wɛ sie ɔ́ su tie.

²⁸ Lalofuɛ ng'ɔ di-man nanwlɛ'n ɔ sanngan ndɛ. Klunwifuɛ'm be liɛ'n sa tɛ'n i yolɛ'n yɛ ɔ yo be fɛ-ɔ.

²⁹ Be nga bɔ be nyinman-nyinman bé wun'n, ɔ ti kɛ be fa bé wun man kɛ be `tu be fɔ. Sinnglinfuɛ'm be kusu, be fa bé wun man kɛ be `bo be.