Nyanndra Mun 18 - NYANMIƐN NDƐ'N 1998

¹ Sran nga bɔ i bɔbɔ i wun akunndan yɛ ɔ bu'n, ɔ fɛ-mɛn i wun mantan-man sran. Sɛ be se kɛ be ´ukɛ i nan ɔ yo like wie'n, ɔ yo-mɛn i fɛ.

² Ngwlɛlɛ ndɛ nga be kan kle sinnglinfuɛ'n, ɔ ti-mɛn i cinnjin. Ng'ɔ lo i'n, yɛlɛ i bɔbɔ i ti nun akunndan liɛ'n i kan sinlɛ.

³ Klunwi yolɛ'n man be yo finfin, sa sukusuku yolɛ'n man be kuakua.

⁴ Sran nuan ndɛ'n, ɔ ti kploun kɛ nzue bunman sa. Be si-mɛn i ngba bo. Nzue ti'n i nun nzue'n, sɛ be nɔn-ɔn, be anwlɛn ba'n tɔ nzue nun, kɛ ngwlɛlɛ'n ti sɔ-ɔ.

⁵ Sran nga b'ɔ yo sa'n, ɔ fata-man kɛ be jrɛn i sin nan be fa ndɛ'n gua sran nga bɔ ɔ'a yo-man sa'n i su.

⁶ Sinnglinfuɛ'n i ndɛ ng'ɔ kan'n, ndɛnngan yɛ ɔ bɛ i sin-ɔn, i kunngba'n ɔ klɔklɔ utre.

⁷ Sinnglinfuɛ'n i ndɛ ng'ɔ kan'n, ɔ ti i bɔbɔ i nguan nyanman nun kpɛkpɛlɛ. I bɔbɔ i nuan'n yɛ ɔ kun i-ɔ.

⁸ Abla difuɛ nuan nun ndɛ'n ɔ ti kɛ like fɛfɛ bɔ be di, ɔ tɔ be klun klanman'n sa.

⁹ Sran nga b'ɔ lafi-mɛn i junman'n su di-man'n, ɔ nin sran nga b'ɔ saci junman'n, be nnyɔn'n be ti kunngba.

¹⁰ Anannganman ti kɛ awa dan wie bɔ b'a si'n sa. Sran kpa ng'ɔ wanndi ko talo i'n, ɔ nyan manndran.

¹¹ Sikafuɛ'n ɔ bu kɛ i anyanbeun'n ti i fiawlɛ kpa. I akunndan'n nun'n i waan ɔ ti kɛ talɛ sa yɛ ɔ sɛsɛ i-ɔ.

¹² Tutre'n man be di yalɛ, sanngɛ wun ase kanlɛ'n ɔ man be anyrunnyan.

¹³ Sran ng'ɔ sie-mɛn i su ti-man ndɛ nan ɔ'a sɔ su'n, ɔ yi i sinnzin'n nglo, kpɛkuun ɔ guɛ i bɔbɔ nyin ase.

¹⁴ Sɛ a tɔ tukpacɛ nan ɔ́ wla'n ti-man bowa'n, ɔ uka wɔ. Sanngɛ sɛ ɔ́ wla'n ɔ bo wɔ wun'n, ɔ lɛ-man ayre.

¹⁵ Sran ng'ɔ si ngwlɛlɛ'n, ɔ kunndɛ kɛ ɔ ´si sa. Sran ng'ɔ si akunndan'n, akunndan nun ndɛ yɛ ɔ kunndɛ kɛ ɔ ´ti-ɔ.

¹⁶ Sran like cɛlɛ'n, ɔ bo sran nyrun atin, ɔ bo be nyrun atin man be si sran dandan mun.

¹⁷ Kɛ sran nnyɔn be nyan ndɛ'n, kun ng'ɔ dun mmua kɛn i liɛ'n, ɔ waan i ndɛ'n yo fɛ. Kɛ kun'n kusu ɔ wa kɛn i liɛ'n, a wun-man kun nga i liɛ'n yo fɛ-ɔ.

¹⁸ Like nga be guɛ i ase be fa si Nyanmiɛn klun sa'n ɔ kwla yo man utre'n wie, ɔ kwla kpɛ sran nnyɔn bɔ be lɛ nyrun'n be nun.

¹⁹ Sɛ ndɛ tɔ a nin ɔ niaan amun afiɛn'n, i mantanlɛ'n yo ya tra klɔ wun talɛ bulɛ. Utre'n wie yo sro kɛ bisua anuan nun gboklo sa.

²⁰ Sran kun i nuan nun ndɛ'n yɛ man ɔ nyan like di mɛn i ku sɛ-ɔ. Sran kun i nuan su ndɛ'n, yɛ man i ku yi-ɔ.

²¹ Ndɛ ng'ɔ fin e nuan fite'n, i ti yɛ e wu-ɔ, i ti yɛ e nyan nguan-an. Sran ng'ɔ kwla ijɔ'n, sɛ i ijɔlɛ'n ti sa nyɛn i'n, ɔ fata kɛ ɔ sɔ nun .

²² Sran nga b'ɔ nyan bla kpa ja'n, wuun ɔ'a nyan muae, afin like yɛ Anannganman fa cɛli i-ɔ.

²³ Yalɛfuɛ'n ´ijɔ-ɔ, ɔ ijɔ amanniɛn su, sanngɛ sikafuɛ'n kɛn i liɛ'n wunmiɛn su.

²⁴ Janvuɛ kaka'n kwla kun be, sanngɛ janvuɛ'n wie kusu ti kpa tra be niaan.