Nyanndra Mun 17 - NYANMIƐN NDƐ'N 1998

¹ Sɛ a nyan ɔ kpaun kee sin kan a di nan ndɛnngan nun-mɛn i sin'n, i li flunman tra kɛ a nyan aliɛ fɛ di sanngɛ awlo nga a o nun'n ɔ ti ndɛnngan-ndɛnngan ngunmin'n.

² Akua ng'ɔ ti ngwlɛlɛfuɛ'n i nyrun ba nyan tra awlo ba nga b'ɔ si-man ngwlɛlɛ'n. Ɔ man sɛ be ´cɛ awlo aja ninnge'n, bé wla fi-mɛn i su.

³ Sin yɛ be fa sa sika ɔkwlɛ'n nin jɛtɛ ufue'n be nian-an. Sanngɛ sran ng'ɔ sa sran i klun lɔ akunndan'n nian'n yɛlɛ Anannganman.

⁴ Sran ng'ɔ ´kunndɛ yo sa tɛ'n, san sran nga i nuan nun ndɛ'n ɔ ti-man kpa'n, i nuan bo yɛ i su'n wo-ɔ. Ato buafuɛ'm be kusu abla difuɛ'm bé nuan bo yɛ be sie bé su nin-ɔn.

⁵ Sran ng'ɔ sri yalɛfuɛ mun'n, wuun ɔ'a lo Anannganman b'ɔ boli be'n i ngasi. Sran nga bɔ sɛ ndɛ nyɛn i wiengu-ɔ ɔ sri i'n, Anannganman su yaci cɛ-mɛn i .

⁶ Anunman'm be ti kɛ oke'm be famiɛn kle sa. Siɛ'm be kusu be ti kɛ ba'm be anyrunnyan like sa .

⁷ Kɛ sinnglinfuɛ'n wo lɛ'n, be kan ndɛ kpa be kle i-ɔ, ɔ ti-mɛn i liɛ'n su. Siefuɛ'n kusu be kpɛ gblɛ kle i-ɔ, ɔ ti-mɛn i liɛ'n su.

⁸ Sran'm be bu i kɛ sran like cɛlɛ'n ɔ ti muae like nan be bɔ be yo i sɔ'n, i yɛ man like kwlaa nga be yo'n ɔ yo kpa man be-ɔ.

⁹ Sran nga be yo i sa b'ɔ fa sie-mɛn i klun'n, ɔ kunndɛ klolɛ. Sran nga kusu b'ɔ be yo i sa b'ɔ kan sin'n, ɔ fuɛn i wun sran.

¹⁰ Sran ng'ɔ si ngwlɛlɛ'n, sɛ be tu i fɔ bé nuan nun ngbɛn bɔbɔ'n, ɔ ti. Sanngɛ sinnglinfuɛ'n, man be tu i fɔ nin ngble nuan ya bɔbɔ, ɔ ti-man afɔtuɛ'n.

¹¹ Like kunngba nga klunwifuɛ'n kunndɛ'n yɛlɛ nyin kekle yolɛ. Ɔ man wunnzue'n kwlakwla i ti sin yiɛ i kusu.

¹² Sɛ a nin nnɛn sroesroe nga i mma'm b'a fi i sa'n be yia nun'n, ɔ ti kpa tra kɛ a nin sinnglinfuɛ nga sinnzin ɔ'a di i buɛ'n b'a yia nun'n .

¹³ Sran nga b'ɔ fa tɛ tua kpa'n i kalɛ'n, i sɔfuɛ'n ndɛ tu-mɛn i awlo le .

¹⁴ Kɛ be ´bo akplowa silɛ'n bo'n, ɔ ti kɛ ce wie yɛ be su bu i sa. I sɔ'n ti, kɛ ngondin'n nian tɔ-man'n, ɔ fata kɛ a cuɛn ɔ́ wun.

¹⁵ Kɛ Anannganman nyin fa ci sran nga bɔ sɛ i wiengu kun yo i sa-a, ɔ blublu su bɔ i waan nán be se kɛ i yɛ ɔ yoli'n, i kunngba'n yɛ i nyin fa ci sran nga bɔ sɛ i wiengu kun ɔ'a yo-man sa kpɛkuun ɔ kpɛ suɛn tɛ i wun'n .

¹⁶ ?Sinnglinfuɛ'n i sa nun sika'n, ɔ fa yo nguɛ ye? ?Ɔ fa to ngwlɛlɛ-ɔ ɔ yo ye? Kannzɛ be to bɔbɔ-ɔ, i sinnzin'n ti ɔ kwla to-man.

¹⁷ Janvuɛ kpa'n ɔ nunnun wunfle. Be niaan'n kusu, ɔ nunnun mmoja.

¹⁸ Sinnglinfuɛ'n kunngba yɛ sɛ i wiengu ´kɔ kalɛ falɛ-ɔ, ɔ dun mmua i nyrun yɛ ɔ kplin su kɛ be `fɛ i i bɔbɔ dunman nun-ɔn.

¹⁹ Sran ng'ɔ klo ndɛnngan'n, i kunngba'n klo sa tɛ yolɛ'n. Sran nga bɔ i klun sa'n cɛnnin trɛ i bɔbɔ'n, ɔ su yo-man kpa.

²⁰ Sran ng'ɔ ti gblɛ'n, ɔ nyan-man muae. Sran nga i nuan nun ndɛ ti nnyɔn-nnyɔn'n, sa yalɛ'n yɛ ɔ tɔ i su-ɔ .

²¹ Sran ng'ɔ wu sinnglinfuɛ'n, klunngbɔ'n yɛ ɔ kun i-ɔ. Sinnglinfuɛ'n si i klun jɔ-man le.

²² Aklunjuɛ'n ti kɛ ayre sa. Sɛ be klun ti-man jɔwa'n, bé wun kpaja-man be.

²³ Sran ng'ɔ ti-man kpa'n, sɛ be mɛn i sika kɛ ɔ jran ndɛ tɛ sin'n, ɔ sɔ nun.

²⁴ Sran ng'ɔ si sa'n, akunndan ndɛ mlin-mɛn i klun le, sanngɛ sran ng'ɔ wun-man sa wlɛ'n, like nga be o mmua-mmua'n, be akunndan yɛ ɔ bu-ɔ.

²⁵ Ba ng'ɔ si-man ngwlɛlɛ'n, akluntitiɛ'n yɛ ɔ fa mɛn i si-ɔ. Ngokoɛ'n kusu yɛ ɔ fa mɛn i nin b'ɔ wuli i nin-ɔn.

²⁶ Sran nga bɔ ɔ'a yo-man sa'n, ɔ fata-man kɛ be de i like. Sran nga kusu b'ɔ ti sran kpa'n, ɔ fata-man kɛ i nanwlɛ dilɛ'n ti be kle i nun.

²⁷ Sran nga b'ɔ si ngwlɛlɛ'n, ɔ klo-man ijɔlɛ kaka'n. Ngwlɛlɛfuɛ'n ´kan ndɛ-ɔ, ɔ bu i sin nan ɔ'a kan.

²⁸ Sinnglinfuɛ'n bɔbɔ sɛ ɔ o sa nan ɔ'a ijɔ-man'n, be bu i ngwlɛlɛfuɛ. Sran ng'ɔ si i nuan tra'n, ɔ ti ngwlɛlɛfuɛ.